بالرصاص!! شريفة شرف الدين [email protected] المشهد الأول مدرسة ابتدائية داخل فصل أول ابتدائي الأستاذ: يا عمر لا تكتب بقلم الحبر أكتب بقلم الرصاص عمر: كويس يا أستاذ في اليوم التالي المدرس: الظاهر إنت نسيت يا عمر .. إحنا مش قلنا نكتب بالرصاص و ما نكتب بالحبر؟ عمر: صح يا أستاذ المدرس: خلاص و لا يهمك .. بكرة جيب لي الواجب و إنت كاتبو بقلم الرصاص عمر: كويس يا أستاذ اليوم التالي عمر: صحح لي يا استاذ الأستاذ: تاني بقلم الحبر يا عمر؟ شوف يا عمر ده قلم حبر .. أوعك تكتب بيهو .. ده قلم رصاص أكتب بيهو .. واضح؟ عمر: واضح الأستاذ: شنو الواضح؟ أنا قلت ليك شنوحسع؟ عمر: ده قلم رصاص أكتب بيهو .. ده قلم الحبر الما أكتب بيهو الأستاذ: شاطر .. تعال لي بكرة كاتب بقلم الرصاص و عندك جائزة حلوة مني .. سمح؟ عمرك: كويس يا أستاذ اليوم التالي عمر: هاك يا أستاذ صحح لي الأستاذ: تاآآآآآآآآآآآني يا عمر!!! ما قلنا ليك مليون مرة ما تكتب بالحبر أكتب بالرصاص يا أخي .. إيه ده .. ما بتفهم و لا شنو؟ عمر: بفهم يا أستاذ الأستاذ: طيب ما تكتب بقلم الرصاص عمر: كويس يا أستاذ الأستاذ: شوف بكرة آخر يوم .. لو جيتني كاتب بالرصاص حأجلدك شدييييد .. فاهم و لا ما فاهم؟ عمر: فاهم يا أستاذ الأستاذ: أديني قلم الحبر بتاعك ده .. خليهو معاي لغاية بكرة عمر: كويس يا أستاذ .. هاك الأستاذ: ده أسبوع كامل و أنحن في تكتب بشنو .. إنت مستعجل مالك؟ لمن تمشي الصف الرابع حتكتب بالحبر .. عمر كويس يا أستاذ اليوم التالي عمر: هاك صحح لي يا أستاذ الأستاذ: كتبت بالرصاص يا عمر؟ عمر يطرق صامتا الأستاذ: جيب كراسك عمر: هاك يا أستاذ _______________ الأستاذ: يرمي الكراس في وجه عمر و يذهب إلى المدير المدير: مالك زعلان يا أستاذ الأستاذ: عايز اتنقل المدير: مالك؟ في شي مضايقك؟ الأستاذ: يا أخي عايز اانقل و بس المدير: حاضر يا يا أستاذ __________________ المشهد الثاني بعد أكثر من أربعين سنة المستشار: يا يا سيادة المشير عمر .. في حبة تمرد كده في دارفور .. أنا شايف إننا نجلس معاهم و نشوفهم عايزين إيه؟ المشير البشير: لا. حنحسمهم عسكريا و بس و بالرصاص!!! المستشار: بالرصاص و لا بالحبر المشير البشير: لا بالرصاص ... بالرصاص المستشار: ممكن أسألك يا سيادة الرئيس إنت درست الإبتدائي وين؟ المشير البشير في مدرسة حوش بانقا المشتشار: غريبة أنا ذاتي اشتغلت هناك .. آه ... إنت عمر ذاتو البكتب بالحبر بدل الرصاص .. صح؟ المشير البشير: صح لكن حسع بقينا نكتب بالرصاص يا أستاذ!!!
