[email protected] ( عفوا اواصل الحديث عن ايقاف الصحف يوم الاحد القادم باذن الله، واعلق اليوم على حديث لنائب رئيس الجمهورية الدكتور الحاج آدم): * مولانا الحاج آدم ( عفوا، سعادة مولانا الدكتورالحاج آدم) نائب رئيس جمهورية السودان والعضو المنشق عن حزب المؤتمر الشعبى سابقا، والمنضم لحزب المؤتمر الوطنى الحاكم حاليا ولا يدرى إلا الله وحده بأى حزب سيلتحق فى المستقبل القريب عندما تتغير الاحوال تبعا لسنة الحياة " يوم لك ويوم عليك " التى يقابلها باللهجة السودانية الفصيحة القول المعروف " الدنيا ما دوامة " أسعدنا وأبهجنا بحديثه العذب بمقر الدفاع الشعبى با مدرمان والذى حضره بضع عشرات قبل ثلاثة أيام، وبشرنا ( بشره الله بالجنة) بأن يوم التاسع من أبريل المقبل هو آخر موعد لوجود المواطنين الجنوبيين في السودان .. !! * وأضاف مزهواً زهاه الله فى الدنيا وجعل زهوه فى ميزان حسناته يوم القيامة باذن الله : (بعد التاسع من أبريل مافى جنوبى ينزل فى مطار الخرطوم إلا يكون عندو فيزا) ..أى حديث عذب هذا، وأي بشارة تسر النفس وتطرد الملل وترفع المعنويات المنهارة وتخفض الاسعار وتوقف الدولار عند حده .. بارك الله فيك ايها الشيخ الجليل ..!! * ثم استطرد النائب لا طرده الله : (ما بنكُش الجنوبيين إلاّ الما مرغوب فيهم). والله انها لجميلة لن ينساها لك الجنوبيون طول عمرهم يا صاحب الكرم الأصيل والرحمة المهداة. هل رأيتم أريحية أكثر من هذه ايها الأعداء وأذنابهم الخونة؟! بأبى أنت وأمى يا حبيب السودانيين ومجير الجنوبيين ( المرغوب فيهم فقط او من لديهم فيزا) ..!! * ولكى يؤكد مولانا النائب وعضو الحزب الحاكم حاليا والعضو المنشق عن حزب المؤتمر الشعبى المعارض ( زاده الله انشقاقا) الحزب وليس العضو، حتى لا يخرج علينا احد الباشكتبة غدا ويتهمنا بالطعن فى الذات الرئاسية اريحيته وكرمه، أطلق سيادته تحذيرا واضحا للجنوبيين غير المرغوب فيهم جعل الله لسانه مطلوقا بكل خير قال فيه : ( أى زول ما دايرنو يتخارج من هسى ) لا فض فوك ايها النائب فلقد أعذرت وأنذرت، وجزاك الله عنا كل خير بأنك لم تضع زمننا بذكر اسماء غير المرغوب فيهم ( نفر نفر)، لانهم ( عارفين رقبتهم ) الطويلة دى، ومن الأفضل لهم أن يتخارجوا قبل ان نخارجهم !! * وإمعانا فى الكرم، أوضح سيادته بانهم خاطبوا سفارة الجنوب فى الخرطوم فى وقت سابق لاعداد اوراق رسمية لمنسوبى دولتهم ولكنهم رفضوا ( فى ستين، دى من عندى ) أو كما قال سيادة النائب ( بعد دا نحنا تانى ما ملامين ) حاشاك من اللوم يا شيخنا ( وأى جنوبى يشعر بعدم الرغبة فيهو، يتخارج يمشى ) ..!! * الله يجزيك عنا كل خير يا دكتور الحاج وكلامك بالجد سمح، بس دحين دايرين نعرف ( المليون سودانى البيمشوا كل سنة يرعوا بهايمم فى الجنوب ديل، طلعتوا ليهم ورق رسمى ولا لسة؟!).