فكي ماسورة أسماء الجنيد [email protected] حتى الفكي طلع ماسورة ؟ معقول دجال يصدق دجال ؟ دي غايتو قلبتوا فيها الهوبة يا ناس أبو جكة !!! اها والفكي ده رتبته شنو ؟ فكي بي 3 دبابير ولا عسكري بي شريطين؟ولا زول عنقالي ساي؟ إنقلاباتكم بي فكي! إنتخاباتكم بي الخج والتزوير! تعييناتكم بالواسطة , تصريحاتكم بالرجالة، كلو شغل أوانطة!! لكن حكاية فكي يساعد في الإنقلاب و إستلام الحكم دي قوية جدا جدا. نهنئكم على الإنجاز الغريب وعجيب، والفهم الحامض أكتر من العرديب،والأفق القصير أقصر من طول العنقريب!! هسه الفكي ده يا ربي حا تنتقموا منو كيف؟ بعدما فشلت المحاولة وقبضتوا عليه؟ معقولة تحاسبوه وإنتو اصلا مؤمنين بيه؟ يعني بتسجنوه وتعذبوه في بيوت الأشباح؟ ولا بتخافوا منو يجيكم ناطي الصباح؟ وينقلب ليكم وطواط بالليل ويوريكم الويل؟ غايتو التسوي بي إيدك يغلب اجاويدك!! يا ربي الفكي ده واحد تاني غير بلة الغائب ؟ الفكي الحدد المدة الزمنية بالسنة والشهر واليوم والساعة لبقاء الرئيس في الحكم ؟؟ دخل في حكم الله !! سبحان الله !! ويقولوا ليك نحن بالدين إهتدينا !! ياتو دين ده وياتو سنة دي عليكم الله؟حكمتو باااالغة. اها نجي لي فكي الإنقلابات والمهمات المستحيلة !! إتخيلت الجماعة ديل ملمومين في دارة ووسطهم الفكي الماسورة ضاحك علي دقونهم ولابع ليه كم مليون كده. وما بعيد يكون عنده كم عمارة وعربية وجواز دبلوماسي !! ما اصلو الحكاية جايطة ، يعني بقت على الفكي ؟ يكونوا قاعدين والفكي مدور بخورو ولابس كشاكيشو وقاعد ليه في نصيبة تصدر منهااصوات غريبة لزوم الرهبة والتخويف. ويبدأ يهضرب , شخارم بخارم ,, كوزنا الظالم ودفاعوا الكاضم , نصو حائم ونصو نائم وكلو طاشم ,كو كرو كب كرب لب .. بدون شطارة، تخبتنا الطيارة،نسمع الصفارة ونجريى نتضارا وكيف الدبارة؟ نمرق نتدبأ نشوف الخسارة ونفك الجوعارة وروروروروووو. هي لله هي لله.. نعم للسلطة ونعم للجاه .. بلة الغائب في الركائب لهطونا ضرائب، سرقوا حلايب،جانا كلب، سنونو صفر، عيونو حمر، حلب الناقة في السنقاقة. (( كرج يا فلان))الرئيس الجاي منو؟((طبعا كرج))دي فيها قرصة حااارة من الفكي للزول البتقع يدوا عليه. لازم يستحمل القرصة لأنه إحتمال يكون هو الرئيس القادم حسب بخرات الفكي! كلو بي تمنو ! وانا اقول الجماعة ديل مشلوطين و محروقين وممغوسين كده ليه؟؟ تراه كلو من قريص الفكي الطلع ماسورة ! يومك نحس يا فكي الجن، شيل شيلتك وشوفلك دبارة مع ناس دفاع الساطور والنظارة! مغايس الخسارات دي كلها بفكوها فيك.. وهكذا الفكي الضلالي يكون شغال طوااالي مدور وسطهم و الجماعه متنحين ومجهمين حوالينو!! وهكذا حال البلد في ال 23 سنة الفاتت مشاركين في حكمها دجالين ومشعوذين!! وما نستغرب إن وجدت عندهم وظائف كبيرة ومميزات ومخصصات من مال هذا البلد الهامل!! معقولة يا عالم مستوى الجماعة ديل وصل الحضيض للدرجة دي؟ لو قلنا الناس ديل ناس دنيا ساااي! معقول مستوى تعليمهم و ثقافتهم مضمحل للدرجة دي؟ ومعظمهم دارع ليه شهادة دكتوارة في ضهره!! جهل مركب وعقلية متخلفة لدرجة إنهم يصدقوا الخرافات والدجل ده؟؟؟ و كانوا ماسكين البلد دي بي ياتو شريعة وياتو فهم؟؟ ودكتوارتهم دي جايبنها من ياتو جامعات؟وبرضو تقولوا علينا شذاذ آفاق ؟؟ حسبي الله ونعم الوكيل ,,, متاوقة معقولة يا ناس الحكومة ؟ عندكم بلة الغائب وما تقدروا ترجعوا حلايب ؟؟
