[email protected] دي حالة تصعب على الكافر الواحد كل يوم يصحا من الصباح والدنيا تعقد زيادة وبعدين مع الحاصل ده يعني لو ما كانوا عايزين ينقذونا كان عملوا فينا شنو ؟ الرغيف طار السما وكشه يعني الرغيفة الواحدة تاكلها في لقمة واحدة وتلات حبات بيه جنيه والبنزين البقى بي تلاتشر ده يعني تاني السيارات الا شمومه ساي (كان هذا حديث حاج بله لنفسه ) وصادف ان مرت به حاجة السرة فقالت في نفسها الليلة زولنا ده منتحل شخصيتي ولا شنو قاعد يناضم في روحه زي العربي الراميه الجمل (حكم الايام دول) حاجة السرة : مالك يا اخوي قايم من الصباح تكلم في نفسك ؟ حاج بله : الايده في النار ما زي الايده في المويه ؟ حاجة السرة : مويه ونار يازول انت قاعد تجهز نفسك للمشاركة في عرب قوت تالنت الموسم الرابع وله شنو ؟ حاج بله : له دمك خفيفة يا رايا ابي راشد !!! حاج السرة : وانت اظنك قصي !!! حاج بله : يا مرة ما تقفليها معانا كفاية علينا ناس لحس الكوع ديل حاج السرة : يا حاج روقة المنقه انت ما فيك حيل في البسوه الناس ديل !! حاج بله : كيف يعني حيل لشنو انا ماشي اشتغل عتالي في السكة حديد . حاجة السرة : انت ما سمعت بهنو ولد الجيران حصل ليه شنو؟ حاج بله : لا مالوه ؟ حاجة السرة : قالوا ليك الولد مشي المظاهرات في ام درمان قاموا الجماعة قبضوه من الصباح فكوه اخر الليل ورجع بيتهم مرضرض تفوه تف العيش . حاجة بله : الدقه هينة الكلام يوده عند الجماعة ديك ؟ حاجة السرة : ديل منو ؟ حاج بله : يا وليه ماليك شغلة ابعدينا من المشاكل !!! حاجة السرة : اسع ما كنت عامل فيها خالد سعيد و من مناضلي الفيس بوك !!!! حاج بله : والله انا ساي كنت مستهون بيك يا خرابة تراكي مثقفة وماكي هينة حاجة السرة : عشان تأمنوا ما تفلسف فينا تاني وتعمل لينا فيها ابو عران !!! حاج بله : خلاص يا مريم الصادق المهدي انقلعي من قدام وشي الواحد بس ما يديكم فرصة !!! حاجة السرة : خلاص فقدت المنطق اها انقلعت من وشك !!!! خرج حاج بله امام منزله في مكان جلوسه المعتاد في انتظار حضور عمران وبينما هو كذلك مر عليه هيثم هيثم : اخبارك يا حجوج . حاج بله : المطرطش اخبارك وين مختفي ليك زمن ؟ هيثم : موجودين يا فردة حاج بله : اها يا جزمة لحست كوعك ؟ هيثم : انت يا حاج شايفك بقيت ثورجي وعالم فيها مناضل يا زول انت ما بتقدر على ناس لحس الكوع ديل ؟ حاج بله : ليه حق لما قال عليكم شذاذ افاق . كان الناس راجية منكم عمار واضاتها اصبحت . هيثم : والله يا حجوج ماك هين انت عندك صفحة في الفيس بوك ولا توتير ؟ حاج بله : لا عندي جنبة !!!! يا خلف الله انا راجل مواكب ومثقف مش زي حالتك !!! هيثم : تعرف يا حجوج انا بعرف شدة البتاعة بحالتك ، مما القاك بتقول في حكم بعرف الريحة الليلة كانت شديدة قلت لي جنبه هههههههه حاج بله : جنبتك بالقطع قال ريحة قال ان شاء الله يقبضوك ناس النظام العام يريحونا منك . هيثم : يازول احسن ليك ابعد من قصة السياسة دي بتجيب ليك الضغط ساي . حاج بله : اها وامشي معاك البحر ؟!!!! هيثم : مش احسن ليك من وجع القلب ده ؟ حاج بله : بالله دي امة يرفعوا ليها علم ديل حالتهم الشباب الناس معتمدة عليهم . هيثم : يا عمك نحن ما حمل التلتة والتف البتفوا للناس ده ما سمعت هنو عملوا فيه شنو ؟ حاج بله : كلمتني خالتك السرة لكن يا مطرطش اي ثورة ليها ضحايا انت ما شفت في بوعزبزي في تونس و خالد سعيد في مصر وكثيرين في ليبيا واسع في سوريا بموتوا بالكميات يعني اي ثورة لازام يكون عندها شهداء يلا دق صدرك و امش استشهد عشان البلد دي . هيثم : كلامك بقي ما حلو يا حجوج احسن الواحد يتخارج من جنبك عايز تضيع علينا الاستصباحية . حاج بله : تصبح ان شاء الله في المبني الجنب القيادة داك . هيثم : هههههههه بطريقتك دي انت اللي ح تمشي وح يفسوحك ويخلوك تشوف فيلم الاشباح . حاج بله : الاشباح اللي يحموك النوم . هيثم : مع السلامة يا حجوج . حاج بله : الله يسلمك يا مسخوظ ؟ ذهب هيثم وحاج بله يتابعه بنظراته بالله دي امة يرفعو ليها علم ديل قال الشباب الراجينهم يعمل لينا حاجة قال ليك نحن ما حمل التلتة طيب البتلتل منو قال تلتلة قال ... يحضر عمران ليجد حاج بله وهو يحدث نفسه فضحك بصوت عالي يلتفت عليه حاج بله قائلا : جيت يا بص الحلة مالك بتضحك براك زي المجنون . عمران : هههههههه الفيك بدربوه يا حاج يازول انت قاعد تنضم براك وما معاك زول يعني حاجة السرة دي شاني عليها حملة ساي حاج بله : ده ما كلوا من المسخوط ده . عمران : ده منو المسخوط ده ؟ حاج بله : مالوه هيثم عمران : وينوه هيثم ؟ حاج بله : كان معاي اسع هنا ومشي . عمران : ومالوه خلاك تتكلم براك ؟ حاج بله : يازول سالتوا قلت ليه رايك شنو في الحاصل ده الود بقي زي ود الموية تمسك بجاي يجيك بجاي !!!! عمران : هو الحاصل شنو ؟ حاج بله : انت كمان !!!! ذكرتني نكتة الولد الشليق المجنن امه بالاسئلة المحرجة قدام الناس (هو لكن مالوه) تلقاك دي انت ذاتك ما عارفها !!! عمران : ههههههه لا عارفها لكن برضو ما وريتني هيثم مالوه ؟ حاج بله : يازول كنا بنتكلم عن الوضع الايام دي !!!! عمران : ليه هي الوضعت منو ؟ حاج بله : ان شاء الله يضعوك في عربية الكشة !!! انت مالك الليلة ؟!!! عمران : ياحاج بله يا اخوي السياسة دي ابعدنا منها انت ما سمعت سيادة الرئيس مرة قال عن الجماعة شذاذ افاق والمرة الثانية قال ح يشوي الجماعة . حاج بله : خرفان هم يا كافي البلاء يشويهم شنو كمان ، انا المحيرني يا عمران الناس ما بتعظ ما شوفوا حصل شنو في القذافي عمران : والله انت ما تجيبها على بر داير توديني في داهية حاج بله : زمن نحن في المدرسة الابتدائية كان عندنا مسرحية واحد من اشخاصها بتكلم في السياسة والتاني بقول ليه زي كلامك ده قام قال ليه شفت ليك اقرع بخاف ليه من قوبا بتعرف القوبة يا عمران ؟ عمران : مالي ما بعرفها لكن القوبة والحاجات دي كانت قبل زمن الانقاذ حاج بله : ان شاء ينقذوا بالاسعاف انت باين عليك من ناس 1800 دولار !!! عمران : دي كمان شنو دي ؟ مالو كلامك بقي كبار كبار كده حاج بله : انت نائم وما ناقش اي حاجة امس في برنامج الاتجاه المعاكس في الجزيرة استضاف فيصل قاسم واحد اسمه ربيع عبدالعاطي ما عارف شنو كده من قيادي المؤتمر الوطني والضيف الثاني كان دكتور اسمه القراي . عمران : طيب عادي شنو الحصل ؟ حاج بله : ربيع عبدالعطي يا عمران رمي قنبلة لما هو زاتو اتخلع !!! عمران : مالوه قال شنو ؟ في زول بتخلع من كلامه . حاج بله : اي ناس الانقاذ . عمران : يا زول ما تبطل حراق الروح ده وقول لي قال شنو ؟ حاج بله : السيد المبجل ربيع عبدالعاطي شالتوه الهاشمية قايل نفسه راجي عبدالعطي . عمران : والله يا حاج عندك مقدرة عجيبة للتشويق ياخي خلينا من راجي عبدالعاطي وقول لينا ربيع قال شنو ؟ حاج بله : الغريبة اسمه ربيع وجاي يتكلم عن الربيع السوداني وقال ليك نحن اصلنا ما عندنا ربيع بلدنا سخانة طول العام ههههههه صاحبك فقد المنطق . عمران : الله يطولك يا روح طيب حكاية 1800 دولار دي شنو ؟ حاج بله : روحك تطلع ان شاء الله يازول ربيع ده بقول كلام زي الفل . عمران : سمح قال شنو ؟ حاج بله : قال ليك متوسط دخل الفرد في السودان 1800دولار عمران : يازول ده جادي ؟ حاج بله : يازول ما قلت ليك الراجل بقول كلام زي الفل عمران : وبعدين ؟ حاج بله : وقال ليك الانقاذ عملت خرطومية شارع ظلط وما عارف خرطومية جامعة وحكي كثير كده وقال نحن فصلنا الجنوب عشان نحن ناس بنحترم المواثيق الدولية وبنحترم كلمتنا ههههههه عمران : والله لكن بالغ سي عبدالعاطي ده !!! حاج بله : يازول ده زكرني بي الصحاف وزير اعلام صدام حسين عمران : الناس ديل فقدوا النطق باين عليهم . حاج بله : في واحد بعد ما سمع كلام 1800 دولار قال ليه ياخي خلاص نحن موافقين انت شيلوا 1000 وادونا 800 ونحن راضين عمران : ههههههه والله ياها زاتها . حاج بله : اسع انت يا عمران ح تقدر علي الشوي ده ؟ عمران : يا زول نحن خائفين من جهنم جابت ليه كمان شوي في الدنيا !!! حاج بله : هو في شوي اكثر من الحاصل ده ؟!!! عمران : والله صدقت يا حاج الحالة بقت صعبة خالص . حاج بله : صعبة ساي سهير البابلي في مسرحية كانت بتقول الجماعة سنة 80 قالوا عايزين يطلعونا من عنق الزجاجة قلنا ليهم نحن ماعايزين نطلع من عنق الزجاجة افضل نكون في قعر الزجاجة لانه اوسع واكبر قاموا الجماعة جابوا فلة وقفلوا الزجاجة . عمران : هههههههههههه حاج بله : تذكر يا عمران في بداية الانقاذ لما قالوا هم جاين عشان ينقذونا وصلاح دولار داك قال لو ما نحن جينا كان الدولار ح يصل عشرين جنيه !!! عمران : هههههههه ياربي كان دخل الفرد كم في الفترة ديك ؟ حاج بله : اسع نحن دايرنهم يرجعون محل ما جوا عشان ينقذون . عمران : يازول كفاية كده حتودينا في داهية ؟ حاج بله : انا قلت ليك شفت ليك اقرع بخاف من قوبة عمران : السلام عليكم ياحاج . حاج بله : مع السلامة يا عمران ما تنسي تمشي جمعة الكنداكة.
