بسم الله الرحمن الرحيم حنين لمراتع الطفولة والصبا .. إلى قريتي الوادعة (ودالنور) عروة علي موسى [email protected] بعيد عنك ... حكيتِك لي القمر والنيل وكت إتلاقو في طيف الظِلال بي الليل وهَجس خاطِر حفيف الدوح وإتوسد دواخلي البوح وبدت ربابة الأحزان تنقر في جِراح الروح حكيتِك يا رِميش العين ويا طَرف الصباح الزين ويا وعداً رِِجيتو سِنين قطفتو نَداكِ من حرفاً بِقالي ضنين عملتَ أطياف غُناكِ ضَرا واسيت حدي بي حد الصباح حدين سرت رعشة تذمر ليلِك الياسمين غِشاني نسِيم أغاني الريف وقمر الصيف طريق عَمران مجمَّل بي حُجا الجدات مشيتو وريف حكيتِك يا أمان القيف ويا خيمة مقيل الطيف ويا وعد الصباح الهيف حكيتو غَمام زمن جيتِك مع المطر البِرُقو عزاز أسافر في الرياح الشايلة نومي خزاز أحاحي رويحتِك الشفافة في غيماً دعاشو رزاز أفتش ليك في العِينة السِيُولا هَزاز وكت ضلت خطاي مفاز حكيتِك يا حقيقة مجاز حكيتِك يا أغاني لُذاذ حكيتِك يا حنين الروح دموع مكسورة فاقدة ملاذ حكيتِك ... وبعد ضلت خطاي بابكِ كتبت ليك حرفين علي درب شابك حرف مستني من باكر حنين وحرف محتار إلملم بعضو من بابك حكاية زول .. طرق شوقو علي بابك ! ويا وجه الغنا الصادح وكت إلمح وجيهك ضو بيخجل لنهار الشوق وتترد حروفي تجيك وتسرق من ملامحك ذوق علي بابكِ حروفي تروق وليك تتنهد الأبيات وكت تحكيك . وكيف ترتاح .. رحيلكِ في العصب جوة تهد اللهفة روح معشوق ويا وجه الغنا الصادح خلي دليل هواكِ معاي وفِكي الطوق بجيك راجع مُحمِّل كل حروفي حنين وحرف محتار بيعرف سر هواك فيني بتلمع في سماهو بروق .. زمانكِ يا حنين الروح بودي معاكِ براح السوح ويا وجه الغنا الصادح معاك تقدل حروفي تبوح حرف مستني من باكر حنين وحرف محتار إلملم بعضو من النوح حكيتك يا زمان البوح حكيتك ... عروة علي موسى ،،،