الغباين أكتر...... والديوك تعاين! (ستو) لمن مرقت من البيضة حقتا وفتحت عيونا على الدنيا,أخدت كم مشوار في الحياة وهي بتكتشف كل يوم حاجة جديدة,الى أن............................................................... لاقت (كتكوت) نظرة ومشوار,ونشوف القفص دا ,ويلاكا للقفص داك و......ريد شديد وبيض شديد والعكس صحيح هههه تقول ليهو: بيض يا (كتكوت)؟ يقول ليها:بيض يا (ستو)......دي طبعا" بدل (زيت) البقولوها البيض بتاعين اليومين ديل ابتداءأ" مني ... ما علينا,الى أن ظهروا في حياتهم ناس كدة جابوهم أصحاب المزارع وقالوا انو دايرين مجموعة من الديوك والجدادات ويشترط صغر السن......طبعا" الديوك الكبار لبدواوقعدوا يعاينوا.... ( شكلهم فاهمين الحاصل),و...و تم اختيار (كتكوت) من ضمن المجموعة و(ستو) تم استبعادا لأنها شوية نحيفة و...راسا كبير الموضوع دا ما عجبا وما فاهماهو وبالنسبة ليها انو كتكوت مافيش وخلاص ....,سألت الديوك الكبار انو الموضوع دا لي شنو؟ ما في واحد داير يجاوب ... الديوك الكبار لابدة.... وبعاينوا ! ومرت الأيام وكتكوت والمعاهو ساقوهم من غير رجعة.الى ان جا واحد من مجموعة (كتكوت) جا راجع, مغبر ومكتح وعيونوا مزهللات...والجماعة بسألوهو وفي نصهم ستو: يا زول الحاصل شنو؟؟ جيت براك مالك؟؟ قال ليهم :والله رجعوني الدكاترة ,قالوا غير لائق طبيا" والسكين في رقبتي.(ستو) نطت ليو:يا زول سكين شنو؟!! رد ليها ونفسو قايم: ( ذبح اسلامي) والديوك الكبار كانوا عارفين القصة,لكن أبت أنفسهم الا أن يسكتو ويعاينوا.... وطبعا" ستو فقدت هنا أي احساس بي البيض,والحياة بقت ليها بيضة كبيرة.....(البدق جواها دا كان قلب)... وبقت لافة زي المجنونة, وتفكر:كتكوت ضبحوهو؟؟ذبح اسلامي؟؟ ديوك يعاينوا لي أولادم بيضبحوهم و هم بعاينو؟؟ أصحاب المزارع لي يعملوا كدة؟؟ ما كفاهم بيضة؟ ما كفاهم بيضتين؟ قبلت على الديوك كلهم.. هو دور الديك في الدين الاسلامي شنو؟؟! نصحيكم عشان تكوركو أذان الصبح ! و ترجعوا تنوموا. ديك واحد داير يرد مافي... وهي مدورة ... طيب دور الدين في الديك الاسلامي شنو ؟؟ نوم ورقاد شديد؟؟! والديوك ساكتين ويعاينو! أصحاب المزارع ديل أساسا" لاقين فيكم فرقة يا ديوك يا.... ومن هنا بدأت الشرارة .... وطبعا" أهم حاجة مع الشرارة,انو تكون في عواطف ...عواطف حقيقية,والجداد طبعا" ملك العواطف,لا بودي الكوشة ولا حاجة..... البوديك الكوشة حبيبنا الديك ! وهنا اتلمت القضية مع العاطفة وبدا الاضراب الشفنا بدايتو...... و,و,و وتستمر الحكاية د. هوازن عباس [email protected]