إيه يعني لو أن أمين تغول علي ساحة صغيرة و إيه يضير لو شقيقته مريم كمان حوّلت مدرسة حكومية إلى مدرسة خاصة ..الغريب في الموضوع شنو !!.. ما البلد كلها تحولت لإقطاعية خاصة لرفاق أمين..خط هيثرو إنباع في سوق الله واكبر و قبله مشروع الجزيرة ومستشفى العيون والبنوك وسوق الخضار القديم والمساحة المخصصة للملعب الرياضي !!.. وغيرو وغيرو .. الما إنباع شنو والما باع منو !! ..كلهم باعوا وقبضوا التمن دهب أحمر وعلى عينك يا تاجر..مين الحاسبهم والا قال ليهم تلت التلاتة كم !!؟ ... ليش معنى جات علي أمين!!..هو نبي!؟ ما بشر وكمان في البشر إنقاذي يعرف الله أكثر مننا كلنا ويعرف العدل أكتر مننا كلنا ..مش هم جونا عشان يعلمونا الدين الصحيح ويرفعوا راية الدين ويحاربوا الفساد ويملوا الأرض عدلاً.. الرجل ذكر بعضمة لسانه إنو المدرسة حقت خاله وخاله كندي كمان مش أي كلام!... وراه حكومة تسنده وتحميه وتاخد ليه حقه بالقوة.. مش كندا بت عم أمريكا ؟ وما بعيد مدرسة ميمونة بنت الحارث التي أصبحت بقدرة قادر مدرسة الموهبة والتميز ان تكون ملك لزوجة خال أمين وخال مريم وهي أكيد حاملة للجنسية الكندية طالما ان زوجها كندي !! كلها يا جماعة قطعة واطة صغيرة لا تودي لا تجيب منها تتوسع المدرسة ومنها عمكم خال أمين يبحبح شوية ويحصّل الجماعة الفاتوا ود أختو.. ليه يعني هو أقل من المتعافي او أقل من الشريف اوالجاز او كرتي او فلان او فلتكان..وكان للصلاة فالصلاة ملحوقة والأكل بطلو ليه الصلاة يا جماعة ..والرسول (ص) قال جعلت لأمتي الأرض مسجدا وتربتها طهورا.. فيبقى يا اخوان فتشوا ليكم اي حتة فاضية تاني إن شاءالله في سقط لقط ما كل خطوة بحسنة ودا قصد أمين .. عفواً خال أمين ... وما تفتكروا إنه زول إستثمار والا تفتكروا إنو تمساح او إنو ساعي للغنى...المسكين إتلقي مطلوب ومطالب زيي وزيكم..المدرسة حقت خاله وكان مغالطِّنو أسألوا خاله عبدالعزيز كما قال أخونا (كباشي) وهو يدحض التهمة عن نفسه حين دخلنا خلسة ونحن مجموعة أيام المدرسة الوسطى إحدى الجنائن فقط لنرفه عن أنفسنا من سجن الداخلية ولكن لسوء الحظ صادف ذلك وجود صاحب المزرعة والذي كان صديقا لناظر المدرسة التي ندرس فيها فكتب أسماء البعض وقدمها مساء ذلك اليوم لنديمه الناظر فكان طابور صباح السبت كيوم القيامة ..سياط ومطارق نيم وكنبة طويلة يُمَطّ عليها المتغولون فلم يتمالك كباشي نفسه وهو يرى السياط والمطارق تنهال على الأجساد وانفجر باكياً مردداً : " والله يا فندي أنا مشيت أجيب لي ليمون من جنينة جدي عبدالعزيز"!! وإنتوا كمان يا ناس حلة خوجلي ما تبقوا ناشفين للدرجة دي.. مريم دي ما أخت أمين وأمين دا خاله كندي وكامبردج حقت خاله الكندي دا وإحتمال تكون الموهبة حقت زوجة الخال الكندي يعني ما حقت مريم وبالتالي ميمونة بنت الحارث ح تبقى علي إستايل كندي..حاجة حديثة يعني و علي مستوى مش أي كلام والا إنتوا مش وش نعمة ؟!!