الورد دايماً بيبسم جوّ قلب النّاس بيرسم صورة لِروعة جمالو لرشاقتو وإنفعالو سر عظمتو واكتمالو برضوواضع في احتمالو إيه بنقّص من كرامتو لمّا يكشف عن وسامتو ويهدي للنّاس إبتسامتو .................... الورد خات في ضميرو إيه بضيرو .......... لو مصيرو يفوح شذاهو ويهدي للأحباب عبيرو .................... ديمة في أعماقو شايل لهفة الشّوق والرّسائل خاتي دايماً في اعتبارو إنّو درب الحب مسارو في شعارو الإعتيادي الورد لابعرف إكره لابعادي .................... مرّة طلّت وردة قالت من رحيقها الدّمع سالت تشكي من روعة صِباها من جمالها ومن بهاها تبكي من حُرقَة حشاها من فراش مغرور غِشاها جرح خدودها رشف نداها .................... ديمة شايله جمالي غُنيا قلبي فاتح أبوابو دُنيا ماني فاكره في ناس بتقسَي وللمحبة كمان بتنَسي عارفه إنو خدودي واحة وقلبي دايما ليها مرسي زي نضاري واخضراري حبي ظاهر في احمراري لا مظنّة ولا مدسّة ..................... الفراش كايس طريقة يسكت الوردة الرّقيقة " يا وردة يا متورِّدة أصلاً بداية الحب كدا لما شُفتِك إنزهلتَ وبِجمالك إنبهرتَ قلبي رفّ وحلقي جفّ قُلت لو ألمس خدودك من رحيقك شلت رشفة لاني خاين مرة خنتَ لاني غدار يوم غدرتَ إلاّ بس أغراني حسنك قُلتً اقاوم ما قِدرتَ منو البقاوم لِجمَالك؟ كل زول في قلبو شالِك؟ في المناديل والأغاني مرة في كروت التّهاني مع الاماني ؟؟؟ ..... ياوردة مالموضوع غرور لمسة خدود رشفة ندي ياوردة ما جربتى حب ولا عيونك سهّدا ؟؟؟؟ الحب دا نار مُتوقِدا رويحتي بالشّوق مُجهدا من يوم بدا ....... قلبي لا ارتاح لا هَدا مرات بيسرح في المَدي يرجع يكلِّم في الصّدي يا وردة يا متورِّده الحب دا حال متفرّده لا عندو ساس لا قاعدة ناس تقصدو وناس يقصدا ناس تزهدو وناس يزهدا ناس تعبدو ويستعبدا ناس تكتمو ويسهدا ناس ترفضو ويتوددا ناس تنكرو ويهددا ناس تقربو ويستبعدا ناس تبعدو ويتوعدا ناس تقبلو ويوحدا ناس تجبرو ويحايدا ناس سارحه فيهو مشرّدا ناس ساكنة بيوه مقيّدا ناس في سعاتو ممددّا ناس للجحيم متوسّدا يا وردة يا متمردة اصلا حكايةالحب كدا؟ ................. الوردة ملّت للجِدال يا فراش ما فيش مجال للملام والإنفعال ماانت عارف فى المثال زي الغمامة لِقاي مُحال لو كنتَ عاشق للجمال أغزل وأنسج في الخيال ................... الفراش أصبح وجيع ياوردة خوفي بلاك اضيع كيف استطيع.......... بعدك احلّق في الغمام وافرح واغني مع الرّبيع؟؟ ماانتي عارفه هواي دفين وقلبي في حُبك سجين لو رفض قلبِك يلين بقبل هلاكي مع اليقين يا وردة يا متوردة معقولة بس للحدّي دا تصبح حياتي مهددا .................. مرّالنّسيم والدّنياغيم شاهد الجّو متطرب الدّنيا زي ساحة حرب الوردة تبكي وتنتحب الفراش واقف حزين مجروح قلب يشكي ويسب في الحبّ يوم أو عايز يحب ............ النّسيم سمع الحكاية من البداية ،، قال للفراش خليك بعيد، وشوش علي الوردة ومسح دمع الخِديد ..... " معذورة يا ست الجّمال يالفي الحسن ما ليك مثال أصل الفراش مغرور بليد وكمان عنيد .. تعال ياغبي..!؟ نادي الفراش بانفعال أديك كدا..!!!؟؟ خلاص شِفت ومقدده وعامل صبي ؟ بئر التّفاهة محدذِده وفي الحب كمان عامل نبي الحب دا حالة مجردة يسري في الرّوح يسعده ناس تعرفو ومتأكده ناس تجهلو زيك كده الحب دا ما لعبة حشر ولا كمان حالة سعر منو العَلّمك خلاك عنيف وملاك شر؟؟ ردّ الفراش في صوت حزين " تعلمت من فعل البشر تعلمت من فعل البشر تعلمت من فعل البشر " عوض شيخ إدريس حسن ولاية أريزونا أمريكا [email protected]
