قبل أسابيع تم تداول (سيناريو) للعبد لله على الأسافير قام بكتابته قبل سنوات بعنوان (المدافن النموذجية) وقد تكهنا فيه بدخول (المقابر) إلى دنيا الإستثمار كآخر ما تبقي من أنواع الإستثمار بعد أن تم الإستثمار في الأحياء حتى إستغاثوا ، ويبدو أن الأمر في طريقه إلى التحقق بعد أن أوردت ، الزميلة السوداني في صدر صفحتها الأولى بعدد الأمس هذا الخبر (أكدت مصادر مطلعة للسوداني إزدياد ظاهرة بيع القبور الجاهزة بمقابر حمدالنيل بأم درمان وأضافت ذات المصادر بان سعر القبر الواحد يتراوح بين 200 إلى 300 جنيه ، واشارت المصادر إلى أن تلك الظاهرة باتت في حالة من التمدد مما أثار إستياء الكثير من الأهالي والمواطنين) !! بالله عليكم ألا يشكل هذا الخبر المسمار الأخير في نعش هذه البلاد التي باتت هي نفسها تحتاج إلى مقبرة ندفنها فيها ثم نهيل عليها التراب؟ هل بلغت بالبعض شهوة المال والجشع إلى الضرب بعرض الحائط بكل موروثاتنا الإنسانية إلى (المتاجرة في القبور)؟ ، إنها فعلاً ظاهرة تدعو إلى التأمل والرثاء ثم البكاء والنحيب وتوضح جلياً أن القائمين على الأمر من ولاة أمرنا يغطون في سبات عميق وإلا بالله كيف يقوم أشخاص ببيع القبور للمواطنين؟ وهل هم يملكون الأرض التي عليها هذه المقابر؟ وكيف لا يتم القبض عليهم ومحاكمتهم بتهمة (التملك الجنائي) وهم يتملكون ما ليس لهم؟ وهل وصلت الجرأة بالبعض للمتاجرة في الأموات (عرفنا المتاجرة في الأحياء) !! لقد شطح خيال العبدلله وهو يقوم بقراءة هذا الخبر وإليكم النتيجة : سيناريو (1) : - (مواطنون يحملون نعشاً وما ان يقتربون من المقابر حتي يهرع إليهم (سماسرة المقابر) فيضعون ذوي المرحوم (العنقريب) على الأرض: - سمسار 1 : يا جماعة كل طلباتكم موجودة .. عاوزين (قبر ناصية) ، قبر فاتح علي الظلط ، قبر (سنقل) ، قبرين وبرنده أقصد وشواهد ! - والقبر الناصية ده بي كم ؟ - والله خمسمية (راسمالو) بنديكم ليهو بي ستمية !! - سمسار 2: خليكم من الجماعة ديل نحنا عندنا قبور (ديلوكس) والدفن والشواهد والبلاط والبلوكات والموية مننا أيه رايكم ؟ - اها وبتدونا ليهو بي كم باقي نحنا المرحوم ده كان راقد في العناية أسبوعين وناس المستشفي عدمونا التعريفة - والله عشان خاطركم بس جيبو سبعمية مع الخدمات ! - خدماتكم دي ما عاوزنها بس عاوزين قبر حاف كده - في الحالة دي بناخد منكم أربعمبة وخمسين ! - سمسار 3: نخنا عندنا قبور حاف كده .. ملك حر لكن من غير خدمات - القبر تدونا ليهو بي كم؟ - بي أربعمية جنيه بس رايكم شنووو؟ - (الميت يخرج راسه من النعش ) : يا جماعة أرحمونا وإنتهوا لينا من الموضوع ده .. خلاس زهجتا ! - سيناريو (2) : - يا جماعة شنو جايبين (مرحومكم) وجايين؟ - وعاوزننا نجيب منو يعني ؟ مش دي مقابر؟ - أيوا مقابر بس القبر ده أنحنا مشترنو ودافعين حقو؟ - انحنا برضو مشترنو ودافعين حقو - يعني شنو؟ - يعني الناس ديل بعوا ليكم القبر ده وكمان باعوهو لينا - والعمل شنو؟ - (يتدخل أحد الأشخاص) : يا جماعة بسيطة تمشوا تقدموا عريضة (لنيابة القبور) وتشتكوا الناس الحرامية ديل - اها هسه ح تدفنو المرحوم وين؟ - والجثث دي لكن بتنتظر؟ - (نفس الشخص) : ما عشان كده عمانا ليكم (تلاجة الرحمة التجارية) دييييك عشان تختو فيها الجثث لحدت ما القضية تخلص !!! سيناريو (3) : أعلانات : (1) عزيزى المواطن .. عزيزتى المواطنة .. سارع بحجز قبرك من الآن وتسلم شهادة البحث .. (شركة الموت حق) توفر لكم قبور سنقل .. قبور ناصية .. قبور عادية .. قبور سياحية وقبور فاخرة (تشطيب ديلوكس) .. التسليم فوراً .. أسعارنا في متناول الجميع (2) أعمال (تحتسبون) لشراء وبيع وإستبدال القبور توفر لكم قبوراً بالأقساط المريحة .. .. قبورنا منتشرة في العاصمة والأقاليم .. أشتر قبرين واحصل على الثالث مجانن .. للإستفسار زوروا مقابرنا على المواقع الموضحة ادناه .. (صوت جهوري) .. دي الموتة وللا بلاش ! (3) المقابر الاليكترونية ترحب بكم وأحسن الله عزاءكم.. صوت (مسجل) أنثوى : لشراء قبر أضغط على الرقم (1) لإستبدال قبر أضغط على الرقم (2) قبور جماعية أضغط على الرقم (3) للإستفسار والتحدث لموظف الإستقبال أضغط على الرقم (4) .. ننبهكم إلى ان هذه المحادثة يتم تسجيلها لأغراض الجودة !! كسرة: عاوزين تموتوا سااااي كسرة ثابتة (قديمة) أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +(وووو) كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+(وووو) [email protected]
