بمناسبة إحتفال "أبالسة" الإنقاذ بعيد إستقلال السودان التاسع والخمسين "قوة عين"!! بى إستقلالنا محتفلين من دون خجلة محتفلين يغشغشو فينا لينا سنين يغشغشو فينا بإسم الدين ... إستقلالنا جابو رجال بالجد كان بخدمو الدين نهارن كلو قضو عباده يقيمو الليل .... بالقرآن دوام سالكين رجالا كانوا كيف صادقين مو زي ديلا كضابين ... إستقلالنا جابو رجال فى دنيانا كيف زاهدين من تجارو مديونين فشان يبنوهو بيت من طين ... إستقلالنا جابو رجال تب ما سمعو بالتمكين ما أكلوها مليارات عشان هم بالقليل راضين ولا أكلوها مليارت.... ونص الشعب جيعانين ونصوالتاني مرضانين وما سكنو القصور العالي جاورو للضعيف مسكين مو زي ديل من الضالين ... إستقلالنا جابو رجال يكدحو بالنهار والليل دمومن سايلي شقيانين تب ما كانوا ناس تمكين ولا هم كانوا ناس فاسدين مو زي ديلا بطرانين!؟ ... إستقلالنا جابو رجال جدودن جيش من الفرسان جدودن كانوا كيف صالحين جدودن فى القبب راقدين وبى إسم الله محروسين مو زي ديلا أفاكين ... إستقلالنا جابو رجال ما ركبوها طيارات ولا شافو الركوب فارهات ولا لبسو الهدوم ماركات و لا فاتو البلد فد مره و لا أماتنا كان سايحات كان نسوانا مستورات وكت الحاره كنداكات ديل الجابو إستقلالنا مو ز يديلا بس آفات ... عمركن شفتو كوزن بعرف السودان هو من درفون... لا بيشوف.. ولا بيسمع هو من درفون... بشوف الدنيا دي الكيزان ودنياهن بديلن ديمه للأوطان ... بى إستقلالنا محتفلين من دون خجلة محتفلين تحتفلوبو إستقلالنا لافي خجل ولا خايفين كل الناس دي مندهشه كيف تحتفلو بى إستقلالنا؟ قسمتو البلد كومين!! دايرين النصيحه الجد سر الدهشه أصلو الكوز صناعتو الأولى قوة عين!! إبراهيم الكرسني الجمعة 2/1/2015م [email protected]
