تكررت حالات الإعتداء من قبل مرافقي المرضى بكافة مستشفيات البلاد المختلفة وبخاصة المستشفيات الحكومية وقد تفاوتت حالات الإعتداء بين الشتم والإساءة مروراً (بالبونية) والإشتباك بالأيدي وصولاً إلى ما هو لا يمكن أن يخطر بالعقل وهو (إطلاق الذخيرة الحية) وهذا ما حدث في تمام الساعه التاسعه من مساء يوم الاحد الموافق 30 اغسطس 2015 حيث تعرض المدير الطبي المناوب لمستشفي بحري التعليمي لاطلاق رصاص ومعه اتنين من كادر التمريض داخل عنبر الباطنيه رجال والحمدلله (جات سلامة) ولم يصب أحد بأذي . من الواضح أن معظم أفراد الشعب الفضل أصبحو شايلين في نفسهم على ابنائنا وأخواننا الأطباء وأضبح الكثيرون ينظرون إليهم وكأنهم (ما من البلد ده) علماً بأنهم أكثر الفئات التي تعطي دون من أو أذي في ظروف بالغة الرداءة وبعائد مادي لا يسد الرمق ولا يكفيهم (مواصلات وشاي) ! للأسف الشديد فإن كثرا بل معظم المواطنين يخلطون خلطاً عجيباً بين واجبات الطبيب وواجبات إدارة المستشفى .. يعني الزول لو مشى ليهو مستشفي مرافق ليهو مريض وقالو ليهو (أسطوانة أوكسجين) مافي او جهاز شفط السوائل (متعطل) أو مافيش جونتيات حقو يعرف إنو الحاجة دي الطبيب ما عندو بيها علاقة لأنو ببساطة شديدة دي من مهام إدارة المستشفي ، فيا سادة يا كرام ما تطلعو (غلكم) وحنقكم في الأطباء ساي .. وعينكم في الفيل ما تطعنو في ضلو والفيل هو (حكومتنا الرشيدة) التي تقوم بالصرف على (مسؤوليها) أضعاف أضعاف ما تصرفه على صحة مواطنيها ودونكم هذا الوضع الردئ والمؤسف لمستشفياتنا حيث تفتقر إلى كل شي ..ابتداء من الكادر البشري مرورا بالمعدات والاجهزة .. تخيلو معى يا سادة يا أفاضل إن مستشفى أم درمان (كمثال) لا يوجد به جهاز أشعة مقطعية (ما قلنا رنين) وثمنه يقل كثيراً عن أي من العربات البرادو المظللة التي ترونها يوميا في الشوارع وأمامها (موتر) ويييو ويييو وييو !! يا أيها السادة الكرام يجب الإعتراف بأن الخدمات الصحية (الحكومية) في بلادنا متدنية تماماً فلا تجعلوا من الأطباء كبش فداء ، كما مطلوب منك أ تتثقفوا (طبياً) فالأخطاء الطبية لا تشمل التفاعلات الدوائية والاعراض الجانبية للادوية ولا تشمل مضاعفات العمليات التي تحصل بعد اجراء العمليات بنجاح يعني زول إتعملت ليهو عملية (استكشاف) مثلا وبعد فترة جاهو(فتاق) في مكان الجرح معقولة بس دي تكون مسؤولية الطبيب !! كمان ماممكن تجي مرافق لمريض عندو سرطان رئة منتشر وعنده ضيق تنفس ولمن يموت في الطوارئ تقعد تفرد عضلاتك وتعمل فيها (جون سينا) يعني الطبيب في الحالة دي عايزو يعمل ليك شنوو؟ الطبيب يا جماعة الخير بشر .. وكمان في البشر (بشر سوداني) وقاعد معانا في السخانة دي .. سخانة الجو وسخانة (الجيوب) بيشتري الطماطم (أم خمسين ألف) والعجورة (أم عشرة ألف) بعاين للجمرة الخبيثة فضل فيها كم .. وبجيهو سيد البيت كل أول شهر عايز الإيجار وأولادو كل صباح عاوزين حق الفطور وكل صباح راسو بيكون ضارب يوصل للمستشفي كيف مع الزحمة دي وصعوبة المواصلات وبعد ده كوووولو شغالين في بيئة تفتقر إلى كل شيء ، وبعد ده كوووولو بيصرفو مرتبات (ملاليم) .. وبعد ده كووولو بيبذلوا أقصي جهدهم عشان (يعالجونا) والله أعرف الكثير من أولادنا الأطباء بيعملو (شيرينق) عشان يشتروا دواء لي مريض أو يعملو ليهو فحص ! ما بنقول إنو مافيش (أخطاء) طبية .. وكتبنا في الموضوع ده كتير لكن لو حصل خطأ طبي ناتج عن جهل (طبعن مستحيل يكون عن عمد) حقو الناس تلجأ للأسلوب الحضاري الراقي وتقدم شكوي للمجلس الطبي والقضاء ح يحسم الموضوع بدلاً عن الإشتباك ... وكمان القصة جابت ليها (مسدسات) كسرة : عملية الزول في الطوارئ يرافقوهو (مية) زول دي إلا عندنا !! كسرة ثابتة (قديمة) : أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و
