كثيراً ما قُلنا وردَّدنا عبر هذه الصفحة بأن الجداد الإليكتروني لنُشطاء حكومة الثلاثي الفاشل (فضل السيد، بخيت والزبير) هُو من النُوع (الكَاطْ) وكل من عاش في الريف أو رَبَّى ليهُو جداد بيَّاض في بيتُو بيعرف يعني شنو (كاط).. هؤلاء يفتقرون لأبسط درجات الإبداع في التفكير والتحليل وحتى للأسف الزمزغة لا يجيدونها.. وبالجد خسارة فيهُم قروشنا البِتِتْبَعزق فُوقُن دي!!! كانت النغمة السائدة ومنتشرة جداً عند سلفهم أيام الإنقاذ.. لو الحكومة دي سقطت البلد دي حا تبقى زي سوريا واليمن والصُومال.. وحكمة الله طلعُوا متسلفين من الأخيرة دي!!! ولو سقطت الحكومة دي الحا يكون البديل منو؟؟؟ ويمُر الزمن.. وتسقط حكومة البشير (الصف الأول) وتأتي حكومة البشير (الصف التاني) ولا طلقة ما قامت بين مكونات هذا الشعب السودان المتصالح السمح.. بل زاد قتل هذا الشعب من حكومة (الزبير) بالمرض والجُوع وتفنَّنُوا في إذلاله بإصطناع الأزمات، قطعُوا عنه الماء والنيل يجري بجواره سلسبيلا.. وسحبُوا التيار الكهربائي عن البيوت ودرجة الحرارة هذه الأيام تُقارب الخمسين.. وحتى لو تشجَّعت وطلعت وقُلت (لع) لهذا الوضع، يقطعوا رقبتك من قعرها!!!! عندما قالها الكاتب الصحفي عثمان ميرغني بأن (الزبير) فشل ويجب عليه أن يغادر ويأتي الأجدر والأقوى والأصلب منه لإدارة هذه البلاد.. كاكَى جداده (الكاطْ)، وبدلاً من أن يقابله بتفنيد مزاعمه تلك، وذلك بعرض إنجازات حمدوك وحكومته.. صار يتصايَح بنفس النغمة القبيح ترديدها (البديل منو)؟؟؟؟ ردَّ عليهُم أحد الساخرين.. أُقسم بالله جدي مُحُمَّد ود منصُوري (صَمَدْ الساقية 42 بالمقل وسط) يقُوم من قبرُوا إلاَّ يدير البلد دي أحسن من خبيركم الإقتصادي دا!!!! بي شنو؟؟؟:: يضع يده بس على موارد البلاد المُهدَرة والمُتحَكَّم فيها من قِبَل الرأسمالية الطُفيلية. (ذهب السودان) دا كفيل بأن يجعلنا في مصاف الدول المُستقرة.. دا لو ما حلمنا زي (وجدي صالح أيَّام سُواقة الخلا) وقُلنا نشَتِّت السبعة مليار الفايضة من الميزانية هُوبَتَلِّي سااااااكت!!!!! *خارج النص: ما يحدث في قطاع الكهرباء هذه الأيام من إنقطاع يصل إلى 8 و10 ساعات في اليوم، وصفه كثير من المُتابعين بالإنتقام المُمنهج.. ومحاولة لإذلال هذا الشعب العظيم.. وكأنهم يريدُون إيصال رسالة مفادها.. عشان تاني تمُرقُوا علينا!!!! . . . ويظل سؤالنا الدائم.. البلد دي السايقها منووووووو؟؟؟ + يا ربي صلاح منَّاع تمكَّن من قبض الدكتورة هبة الهاربة من عدالته ولَّة لسَّع؟؟؟ *++ خبر الجماعة القبضوهم في مطار الخرطوم مهرِّبين (الذهب) برَّة شنو؟؟؟؟ *وأخيراً.. بعد تعويم الجنيه منُو المتسبِّب في أزمة المواد الإستراتيجية يا جبريل؟؟!!!
