*..وفي موسم التسجيلات كنا نقف عند القصة الشهيرة التي تحكي عن (حاج اللمين) الذي وصل إستياؤه من زوجته وأم ابنائه (ميمونة) سدرة المنتهى وبات لا يطيق سماع اسمها ناهيك عن رؤيتها لأنها كانت تحدث من الوصايفة بالكربون ، والسيناريو يشخص أمام اعيننا تماماً دون أن يستطيع أحد (خطف) أوجه الشبه..!! * (ميمونة) المغضوب عليها تطلب من زوجها (حاج اللمين) المجبور بسبب ابنائه على العيش معها تحت سقف بيت واحد منحها (عشرة جنيه) حتى تذهب مع نساء منطقتها لأداء واجب عزاء في قرية مجاورة..ويرفض (حاج اللمين) اعطائها مليما واحداً ثم يغادر المنزل بسرعة البرق لتقضية بعض الوقت مع أصحابه في (لعب الكوتشينة) أمام (دكان حاج الطاهر)..وبينما (قيم) التحدي الأخير يصل نهاياته و (حاج اللمين) يدخل (الزون) بعد (خمسين خاطفة) مشكوك في سرعتها إذا بإبنه عوض يقف أمامه ويقول :( يابا البوكس الودا نسوان حلتنا البكاء إنقلب..!!)..ليرد الأب (الممكون وصابر) بسرعة :( يا ود امك ما لقت ليها زول دينا..؟؟). * وصحف الوصايفة عندما كانت تحدثنا وقتها عن محاولة مريخية لإختطاف وارغو بمطار الخرطوم قبل قيامهم بتسجيله كانت تعيد القصة بحذافيرها وتجبرنا على ترديد جملة (حاج اللمين) التي تساءل فيها بقوله :(يا ود امك دي ما لقيت زول ادينا عشرة جنيه) ، فلو حدث وان اقدم معتوها على خطف وارغو لتكفلنا بمسؤولية ملاحقة المختطفين وإعادته للوصايفة سالماً فالنسر النيجيري الخطير يعتبر بلا شك (سيد شباب المواسير)..!! * لم يصدقنا الوصايفة ونحن ندعم تسجيله ونراهن على فشله، ونقول لهم اذا خطف المريخ وارغو من المطار فإنه حتماً سيذهب به لغرفة تسجيلات الهلال..!! * كان الجواب واضحاً من عنوانه..ووارغو (جايي الخرطوم مكسوف ووشو مخطوف)...! * فعلاً وارغو بكسف ..!! * لما ناس الرشيد قالوا المريخ عايز يخطف وارغو قلنا لناس مصطفى توفيق (يا جماعة امشوا جيبو الود دا المكتب التنفيذي خليهو يكتب (تعهد) ما يلعب في المريخ مدى الحياة)..!! * نحنا حفظنا (التعهد لليوم الأسود) وصحف الوصايفة تقول ليك (حاولوا فى المطار يقلعوهو وسكوا في شارع عبيد (خطف)..! *..تمخض الجبل فولد وارغو..!! * أمس الأول مدرب الوصايفة نصر الدين النابي قال الكلام القلناهو نحنا قبل الجماعة (يتمسوروا) وما سمعوا الكلام ..(ويا سلام على صراحتك يا نابي يا سلام)..!! * يوم يا نابي بتكتل ليك (سيمبو) بي صراحتك دي ..!! * إختصر التونسي في حديثه للزميل أحمد إدريس عبر إذاعة الشباب وكل الرياضيين المشوار وقال بالحرف الواحد : ( وارغو لاعب سلبي و غير مقنع ولا يمكن أن أشركه أساسيا حتى في التمارين، ولا يهمني ان يكون وارغو لعب في المريخ او انيمبا او هدافا لبطولة افريقيا يوما من الايام و كل ما يهمني هو اللاعب الذي ينفذ ما اطلبه منه) ..وأضاف التونسي بصراحته التي لا تحترم مشاعر لاعب لا يزال في كشوفات الفريق : ( وارغو يضيع الأهداف حتى في التمارين، فكيف اشركه في المباريات ؟)...!! * لو زول فعلاً كان داير يخطف وارغو مفروض تحفزوهو قبل ما تسلمو (ماسورتو) في يدو ..!! * قالوا وارغو بنجح لأنهم أعدوا ليهو البيئة المثالية ..(زول بضيع أقوان في التمارين دا ما محتاج منكم تعب كتير بيئتكم دي مناسبة بتنفع معاهو)..!! * بعدين النابي دا اتكلمو معاهو ما يتكلم عن اللعيبة كدا ..قولوا ليهو (المواسير) دي لسه في الكشف ..(شوية دبلوماسية وبيئة مثالية)..!! * وارغو دا لو عندو كرامة مفروض إمبارح ما يكون مبيت في الخرطوم ..!! * النابي عينو لبكري المدينة يشتم في وارغو ...!! * الإضافة الوحيدة القدما بكري المدينة (حلاقتو الجديدة) ..!! * بكري يعمل على تطوير نفسو بالحلاقة ..!! * الزول دا داير يبقي محترف (كسر رقبة)..!! * غايتو يا بكري حلاقتك دي بتلعبك في الدوري الصومالي لكن كورتك ما بتطلعك من البلد دي شبر ..!! * بكري محتاج (ينقص) السرعة و(يزيد) القطعية ...!! * بكري المدينة بقوم بنمرة خمسة وحلاقتو نمرة اتنين ..(ودا الكلام البجيب الضرب بالخمسات وبزعل ناس المجموعات)..!! * بكري خلوهو اصلو زول جري ما زول كورة ..سيمبو دا الكنبة ما بقعدوا فيها ..!! * انتو الناس ديل بتجيبوهم من وين ..؟؟ * أمس النابي بعد (كسح) في وارغو جاء (مسح) سيمبو وقال : ( استنفد سمبو اغراضه وهو لاعب غير مجدي واي لاعب لا يشارك اساسيا من الاجانب فهو غير مفيد فاللاعب المحترف في الاصل يستقدم من اجل الاستفادة منه) ..!! * النابي ما قدر يجيب قون في ليوباردز بالخرطوم قام قال أحسن اجرب التهديف في وارغو وسيمبو ..!! * بس يا النابي سيمبو عمل شنو عشان يكون (إستنفد اغراضو) غايتو الا يكون جاكم (منتهي الصلاحية)..!! * النابي قال ما تقولوا ليهو (وارغو زمان كان وكان لانو هو قبل عشرين سنة كان شعرو منسدل في كتفو وهسه عندو صلعة)..يا سلام على الأمثلة يا نابي يا صاحب الصلعة، وفعلاً البقاء (للاصلع) ..!! * يعني وارغو لو ضفايرو في نص ضهرو تاني ما بدقها..فرصة تاني مافي لو جاب واسطة ولا عمل الشعر (راستا) ..!! نقش أخير * يا أم (صفاير) قودي الرسن ولتهتفي فليحيا الوطن ...!!
