تغلب (الجوي) عصر أمس فى أول ظهور محلي بالدوري الممتاز على (النقص وأرضية الملعب والظروف) وحصد ثلاث نقاط غالية من مريخ الفاشر بإستاد النقعة ..(وقطر الزعيم لو أتحرك تاني مافي لا وقفة ولا رجعة) ..!! * قطر الزعيم مدور .. (وقطر الجماعة قام وأسألوا مبارك سلمان) ..!! * حقق المريخ أمس نقاطاً غالية في ظل ظروف بالغة التعقيد ..(والصفوة موعودين بالمزيد) ..!! * أجمل مافي مباراة أمس أنها أتاحت الفرصة لعناصر غابت فترة طويلة جداً عن المشاركة لا سيما وأن الموسم يمضي نحو الخواتيم (ولا بد من الوقوف على مستوى كل اللاعبين الموجودين بكشف الزعيم) ..!! * أتوقع لمبارك سلمان مستقبلاً باهراً في التدريب طالما أنه ضحى بتدريب الهلال حتى نهاية الموسم وفضل السفر لأمريكا لعشرة أيام فقط ..و(عاقل يا بركة) ..!! * قالوا أن مبارك سلمان ضحى بالهلال من أجل المشاركة في كورس غير معتمد لدى (الفيفا) أو (الكاف) وكل مدته لا تتجاوز العشرة أيام، ونوعية (المضحى له) توضح قيمة (المضحى به) ..!! * يا الهجروك عليا ..و(صفرك) طال متين الجية ..؟؟ * أخطأ المدرب أبو عبيدة سليمان بوصفه لتدريب الهلال بأنه (أكبر كورس)، فالمعطيات الآن تؤكد أن تدريب الهلال (أصعب إمتحان) ..!! * إذا كان تدريب الهلال (أصعب امتحان)، فإن خليفة سؤال يصعب الإجابة عليه ..!! * (ما ساهل) يا ود يا خليفة ..!! * لم يستجب مبارك سلمان لرجاءات إدارة الهلال التي طلبت منه عدم السفر لأمريكا وإكمال ما تبقى من مباريات، وحاول المجلس إغراء مدرب الفريق وقطعوا له وعداً بتعويضه ب(كورس في إنجلترا) إلا أنه رفض بشدة، وأعلن زهده في الهلال وتمسك بالسفر ..(وأي حاجة ولا "الصفر") ..!! * انتو يا عماد الطيب طالما مبارك دا ما أقتنع كان تحلفوا عليه، (علي الأقل تساعدوا الكاردينال بالحليفة بدل ما الرشيد يشيل حسكم) ..!! * والبشيل فوق (الصفر) ما بميل ..!! * (كورس لمدة عشرة أيام يعصف بإستقرار الهلال الفني) .. (تاني ما في واحد يجي ناطي يقول لينا نحنا نادي كبير، لأنو ناديكم دا يا محمد عبد الماجد نحنا كورسات بنفترقوا ليكم) ..!! * بالمناسبة : محمد عبد الماجد (مخلوع) بقصة (تلاتة مليون دولار رعاية للهلال) وقال (الكاردينال بلعب علي تقيل)، وبكرة لما تظهر حقيقة التخدير مفروض محمد يكون واضح ويقول : (الكاردينال بلعب علي الجماهير) ..!! * لكن الجماعة ديل الحقيقة ما بقولوها ..(شغالين تخدير في الجمهور وأسألوا فرفور) ..!! * بمناسبة الحقيقة : انتو يا جماعة موضوع جيان وصل وين .. ؟؟ * فريق ما قادر يحافظ علي (أولادو) من المدربين، داير أعمل معانا (جنتلمان) لحماية اللاعبين ..!! * يا خليفة : ناسكم ديل (الجنتلة) ما بقدروا عليها ..!! * تلقيت مجموعة كبيرة من الإتصالات بخصوص مقال الأمس الذي حمل عنوان (النجم الهلالي وقصة التأمين)، و تحفظت عن أضافة أية معلومة بشأن لاعب الوصايفة الذي فتح معنا خطاً ساخناً ..(وإن شاء الله دائماً "تأمين" ولامين) ..!! * حباب (ولدنا البقضي غرضنا) ..!! * أخشى يا صديقي مزمل أن يلجأ الهلال للفيفا ويعلن تقديم شكوى في مبارك سلمان بسبب سفره لأمريكا لكورس برفقة مجموعة من المدربين ..(أصلو "الكبسوراب" ديل ما مضمونين) ..!! * يا مساوي .. (خليفة فتر من الإنتظار وناسكم ديل ملوك الشكاوي) ..!! * يحتفل أهل المريخ بالتضامن مع إتحاد المهن الموسيقية بالفنان المريخي الجميل إبراهيم حسين (شفاه الله وأمد في عمره ومتعه بالصحة والعافية فابوخليل عنوان للغناء العذب والفن الأصيل) ..!! * غداً نكتب عن إبراهيم حسين بمداد من الحب الدافق، وشكراً لكل من سعى لتكريمه مساء اليوم بنادي المريخ، ونأمل من الصفوة كعادتهم دائماً الحرص على الحضور حتى نقول لإبراهيم (كتر خيرك يا راجل يا زعيم) ..!! نقش أخير * نجمة نجمة الليل نعدو والسنين يا حليلنا عدوا وانت ما عارف عيونك لما تسرح وين بودو
