* لم نكن نرجم بالغيب عندما حذرنا الوصايفة أمس من الحضور لإستاد الخرطوم، وكتبنا مقالاً مطولاً بعنوان (أبلعوا حبوبكم وألزموا بيوتكم ) ..! * يا جماعة بصراحة الزعيم لو لم يكن في كامل جاهزيته (فريق الوصايفة ما بنستر) ..! * زعيمنا ما بنقدر سيل الوادي المنحدر .. و(يا الرشيد هلالكم ما بنستر ) ..! * جيناكم بابراهومة (قلعنا كأسنا) ولعيبتكم غلبتهم القومة ..! * يا جماعة المعز دا لو ما إعتزل الهلال في خطر ..! * يا سلام علي نجم المباراة (الود جمال سالم) .. حارس مميز ورشيق ويقظ، وموهبة جدير بالإحترام (وأجمل ما فيه أنه إذا سددوا له من خط ستة لا يعرف صد الكرات ويجيد الإستلام) ..! * جمال سالم حارس مرمى من مواليد برج (نظافة الشِباك) ..! * جمال سالم لو مسك إدارة مشروع نظافة الخرطوم ما بتلقوا ورقة طايرة ..! * هنئياً ليوغندا التي أنجبت (خليفة بريمة) ..! * أجمل مافي مباراة الأمس النصف الثاني من الشوط الأول الذي قرر فيه المريخ منح مساحة للوصايفة ليستعرضوا قدراتهم، ووقف اللاعبون يتفرجون عليهم و(حداشر لاعب) يلعبون ضد جمال سالم ويفشلون في هز شعر من رأسه ناهيك عن هز شباكه ..! * البشوف المعز (يتنفر في المدافعين) يقول الزول دا لو فكوا فيهو (ليمونة) ما تخش، مع أن هدف راجي أثبت أن المعز لو فكوا فيهو (خالد ليمونة) يخش ..! * أتخيل صديقنا خالد ليمونة بضخامة بنيته يتهادى في الشباك والمعز يتنفر في اللاعبين ..! * يا جماعة أصلاً كأس السودان دا موضوعو محسوم عوِّضوا يوم السبت الجاي ..! * ومعروف السبت (أحمر) ..! * سمعنا بفريق يلعب بعشرة لاعبين لكن فريق يسحب عشرة لاعبين ويلعب بلاعب واحد دي قانوناً ما بتجي، لكن بطريقتكم دي لو خلينا ليكم بس جمال سالم الزعيم بطلع غانم ..! * والجوي كان قال بسوي بسوي ..! * قلتو لي المريخ في سيكافا غلب الحمام ..(هسه انتوا ما أحسن منكم عزام) ..! * البسمعكم تتكلموا في عزام (ما يشوف الجوي ضارب قدام ومجنح الحمام) ..! * بطريقتكم دي حقو تنسحبوا من نهائي الممتاز ..! * (ممتاز) علينا شالوا نوم عينينا ..! * يا جماعة ما لعبتوا (مهند ولدنا) ليه ..؟ * غايتو دفاع الزعيم أدى بكري المدينة (المساحة الكاملة) البتخلي إدارة المريخ تحسم أمر إنتقاله .. (وطالمنا يا جماعة الولد ولدنا معناها الهدف هدفنا) ..! * (الهدف) واحد يا بكري .. (والمدينة ولدنا وجايينا) ..! * بمناسبة الهدف : نهنئ صديقنا العزيز القطب المريخي الشاب د. أمير سيد أحمد خليفة بمناسبة شرائه صحيفة الهدف المريخية (وضربك يا "ابو نون" تقيل وكراعك خضراء يا أمير) ..! * التلاتة ما كتيرة عليكم لكن عارفين أعصابكم ما بتتحمل ..! * انتو أعصابكم إتحملت مازيمبي في إستادكم وإكتسبتوا مناعة عجيبة واي هزيمة تاني بالنسبة ليكم ما غريبة ..! * قلتوا لي (التلاتة مالها) .. بعد دا كلو كمان بتسأل .. (التلاتة حلاااااااااته) ..! * وجن (أقوان) تلاتة والإصابة الفي النص حلاتة .. وانا دستوري نازل في فريق الكاردينال من غير شماتة ..! * كلما أتاحوا لضفر فرصة بعد طول غياب كان الفتى الشرس في الموعد ..! * أيمن سعيد دا يوم بكتل ليهو وصيفابي ..! * غايتو يا (جمال) أمسك قوي في (جمال) ..! * قدم لي يوم أمس الأول الصديق الحبيب محمد عبد الماجد الدعوة لتناول العشاء بعد منتصف الليل عقب خروجه من إستديو النيل الأزرق، وبالتجارب المتكررة ما جمعتني طاولة عشاء بصاحب (ولو طال "الصفر") قبل لقاء القمة الإ وتعشى الزعيم بالوصايفة ..! * الغريبة محمد عبد الماجد قال لي عازمك عشاء في منتجع السمك بالرياض، قلت ليه خلي الدعوة جنبنا هنا في الخرطوم (تلاتة) ..! * غايتو قلب المؤمن دليله ..! * (تلاتة) سنة .. قون ورا قون بضرب شديد بشتنتك انا ..! * المريخ لاعب بدون الباشا وبله جابر ورمضان عجب ..لاعبين معاكم بابراهومة ود الشباب يعني بالصف (التالت) ..! * لو دا مستواكم سكوا بطولات الشكاوي ولا سكوا ليكم حكم .. (مستواكم دا ما بلعبكم في سيكافا) ..! * والجوي كان قال بسوي بسوي ..! * (تلاتة) دي حالتو الكوتش بتاعنا كان في إديس .. يعني لو مدربنا ما سافر إثيوبيا إلا تثبتوا هجماتنا بسد النهضة ..! * الكرة الجاية راجع رمضان عجب .. (كلموا معز من هسه عشان ما يتنرفز في اللاعبين ويزبط الرصة) ..! * بكرة الرشيد يقول ليكم غلبونا بالتحكيم ..(ودا التخدير المخلي عمر الصفر مديد وطويل) ..! * تحامل وديد الفاتح على المريخ كثيراً وحتى الكرة التي جاء منها هدف الوصايفة اليتيم تجاوز فيها الحكم عرقلة تراوري قبل عكس الكورة (ويا رضا جيبو لينا القون من بدأية الهجمة، عشان سيحة يحلل وينظِّر ويتحرك في مساحات مريحة) ..! * خلونا من موازنات سيحة .. (ويا علي كورينا وشباب "الصدى" أضربوا لينا لدرمة دا راجل واضح وزول نصيحة) ..! * أجمل مافي المخالفة التي إرتكبت مع ضفر أن الحكم لم يحتسبها ركلة جزاء (عشان نوريكم حلاوة التمرير والتوزيع وأصلو أقوان القمة دايرا شوية تنويع) ..! * قابلت بالإستاد أمس (العريس المرتقب) صديقنا محمد محمود إسكونس والفنان الكوميدي عوض شكسبير، ووصلت لقناعة أن طاقم مسرحية (النظام يريد) لو شارك في البطولات الخارجية بدلاً عن الوصايفة لأحسن (التمثيل) ..! * بمناسبة خطوبة إسكونس فالتهاني موصولة لخطيبته الزميلة الرائعة هنادي الصديق .. و(بالرفاه والسعادة والإنتصارات والبنين) ..! * هسه لو هربتوا من نهائي كأس السودان يا (ملوك الجري الفللي) زي السنة الفاتت ما كان أرحم ليكم .. (وفللي) تُحدث عن هلال كالجنود الجارية ..! * لو مشيتوا بفريقكم دا الأبيض كان خجلتونا مع ناس عروس الرمال ..! * كان مولانا أحمد هارون وقف مشاريع تنمية شمال كردفان ودعم فريقكم الهلكان ..! * يا كردنة اوعى يكون في تواطؤ .. (دايرين تصريحات نارية تكشف بيها المؤامرات الخفية) ..! * الداير يمشي مانشستر وصلوه الباب ..(وكلم الرشيد ما يهاجم الأولاد ديل ولا يخسر فيهم حرف وانت يا ابو الكرادين ما تزيد السقف) .! * الكاردينال دا يا بكري يخسر كأس السودان والممتاز (وما بزيد الأربعمية مليون قرش دا إداري محنك ما بستجيب للضغوط والإبتزاز) ..! * خليفة .. ما ممكن تكون طوالي برا التشكيلة بدون سبب او قاعد كنب ..! * خليفة .. رأيك شنو بصراحة في البحصل دا ..؟ * على فكرة : أحسن تخلونا نحصل (العمود) للجريدة عشان يلحق المطبعة ورأي خليفة بنعرفوا بكرة ..! * وعليِّ الطرب ب(التلاتة) ..! * بعد ثلاثية الأمس : بدأ الوصايفة أولى خطواتهم الجادة للتعاقد مع مازدا ..! * قلت لي يا الرشيد نتيجة المنتخب (مازدا - واحد) .. طيب انتو كيف ؟ * الحالة واحدة .. وكلكم مازدا ..! * إتمزدي ..! نقش أخير * اللهم لا (تلاتة) ..!
