* عليٍ الطلاق (بالتلاتة) أعلام الوصايفة دا يوم بكتل ليهو قارئ ..! * إعلام مهدد للصحة وكتاباته أخطر من (الإيبولا) ..! * مفروض وزارة الصحةتطالب جرايد الهلال بكتابة : (التبرير) ضار بالصحة ..! * ناس الرشيد (قالوا عنتر كتلو أعمى) .. قلنا ليهم : (مرحب بالعمى والصمم طالما الوصيف بقى جُثة) ..! * (تلاتة) كتيرة و(جثة) ما منظور مثيلا ..! * يا راجي الناس ديل قالوا فريقهم مات، يبقى الضرب على الميت حرام ..! * يا الرشيد فارشين ولا أنتهى العزاء بإنتهاء مراسم الدفن ..!؟ * يا جماعة ما تستعجلوا على (إعلان الوفاة) لسه قمة الممتاز في الطريق ..! * (الناطقة) بتكون عملت (إعلان شرعي للورثة) ..! * لسه قمة الممتاز جاية، والمسيرة قاصدة، و(التلاتة) راشدة، و(الجثة هامدة) ..! * يعني الأعمى كتل عنتر، وبمنطق ناس الرشيد مباراة الممتاز بتكون في (المقبرة) ..! * (الجثة) هامدة و(الدفن) في قمة الممتاز ..! * بمناسبة إعلان ناس الرشيد للكتل وحكاية (الجثة) : اليومين دي صديقنا الشاعر المريخابي وإخصائي الطب الشرعي الدكتور علي كوباني يقضي أجازته مع أسرته بالسودان ..! * يا كوباني نورت بيتك في الخرطوم (تلاتة) ..! * يا جماعة كوباني دا حقيقي ساكن (تلاتة) لكن لو (تلاتة) بتزعلكم مع أنه (أهلاوي) بنعتبره ليكم ساكن (الخرطوم الوطني) ..! * يا الرشيد : ضيعتوا ضربة الجزاء وكتلتوا الفريق و(أحسن الله العزاء) ..! * (أعمى) بكتل ولا (مُبصِر) مرمي جثة ..! * فريق راقد (جثة)، و(التلاتات) جاية والضرب لسه ..! * قناعتي الخاصة أن الحكم وديد الفاتح من أميز الحكام بالساحة الآن وينتظره مستقبل باهر وسبق له من قبل أن أدار مباراة قمة بإمتياز وكتبنا رأينا ذلك في وقته، ولكنه في قمة نهائي كأس السودان لم يوفق، وكثير من الأخطاء سيطرت على قراراته وسكنت بين مفاصل تقديراته ..! * الفرق بينا وبين اعلام الوصايفة نحنا بننصف المجيد وبنقول النصيحة ..(ويوم الجمعة انتظروا سيحة) ..! * أنقذ حكم المباراة الوصايفة من هزيمة تاريخية عندما لم يُشهِر البطاقة الحمراء في وجه بكري المدينة الذي أعتدى على المصري أيمن سعيد في دائرة السنتر بدون كرة ومن غير مبرر قبل أن يتم إستئناف اللعب بعد إحراز (الجوي) للهدف الثالث ..! * أشهر الحكم بطاقة صفراء في وجه أيمن سعيد بحجة أنه أدعى تعرضه للضرب وأراد التمثيل، بينما عكست الكاميرات (إعتدء المدينة) الذي أستحق عليه الطرد بوضوح ليس له مثيل ..! * مشكلة إعلام الوصايفة أنه يلغي عقول جمهوره ويحدثه عن ظلم حاق بهم في الخفاء و(الكاميرات تفضح الأكاذيب والتضليل) بينما لا يعرف معظم حملة الأقلام الزرقاء مواجهة الحقائق بوضوح وجلاء ..! * واحد صيفابي زعلان قال لي (ناس الرشيد يقولوا الحكم .. نحنا علي الطلاق لو ما الحكم كان اخدنا خماسية وبقيت فضيحة مازيمبية) ..! * الوصايفة ما ناس نصيحة ..! * صرف الحكم ركلة جزاء للمريخ من لمسة يد واضحة، وأنصرف فتية الجوي لمواصلة الأداء لقناعتهم أن من يبذل يكسب فالإنتصار لا تصنعه ضربات الجزاء ..! * اخطأ وديد الفاتح عندما أحتسب ركلة جزاء للوصايفة، وكان عليه أن يحتسب لهم هدفاً فالهلال تيم غير مكتمل البناء ولا يعرف لاعبوه الفوز بركلات الترجيح او الإستفادة من ضربات الجزاء ..! * لا يتعاقد الوصايفة مع محترف الا إذا التزم لهم في عقد مكتوب بإهدار ضربات الجزاء وإضاعة ركلات الترجيح و(يوسف محمد) خير مثال ..! * صدق البرير عندما قال عقب طيران الهلال علي يد دوجليبا المالي معلقاً علي إضاعة سادومبا لركلة الترجيح : (هو محترف ضربة جزاء ما بجيبها دايرننا نجدد ليه) فعلاً يا كيماوي دي حاجة عجيبة ..! * بالمناسبة : فقد الوصايفة كأس السودان العام قبل الماضي بركلات الترجيح عندما صد الحضري ركلتي سادومبا ومهند الطاهر ولم يكن الزعيم في حاجة لتنفيذ الركلة الخامسة .. (طبعاً السنة الفاتت ما ضيعوا ركلات ترجيح ولا ضربات جزاء لأنهم زاغوا من الدمازين وعملوا فارين) ..! * أدهش خليفة حارس إفريقيا عصام الحضري في نهائي الكأس العام قبل الماضي عندما سدد له ركلة الجزاء في رأية الكورنر (عجيب يا ود يا خليفة) ..! * جامل الحكم الوصايفة ونحن لسنا غاضبين على ذلك لأن الهلال يستحق العطف ورأفة الحكام والمجاملة ..! * غض وديد الفاتح الطرف عن مخالفة واضحة إرتكبت مع تراوري ليتم عكس الكرة داخل منطقة جزاء المريخ لتحتسب ضربة جزاء للوصايفة ..(وما بُني على باطل فهو باطل) ..! * إهدار سيسيه لضربة الجزاء يؤكد أنه أنسب محترف للهلال (وربنا يصبر الكاردينال) ..! * هاجم كردنة التحكيم مما يؤكد أن رئيس الهلال شاهد المباراة في (الواتساب) ..! * يا خليفة جماعتكم قالوا بديروا الهلال ب(الواتساب) لكن ما قالوا لينا اللاعبين برضوا بلعبوا ب(الواتساب) ..! * يا خليفة .. نحنا لعب (الواتساب) ما مزعلنا، لكن حقيقي (شبكتكم ردئية) ..! * (هلال الواتساب) عندو مشكلة في (الشبكة) ..! * لعب واتساب ومشاكل في (التحميل) ..(قولتوا لي يا الرشيد الغلب دا يتحمل مسؤوليته الحكم .. يا جماعة إختشوا وبلاش تخدير للجاهير) ..! * انا مستغرب جمهور الهلال دا متحمل (إعلام التخدير) دا كيف ..؟ * الحكم اداكم ضربة الجزاء بعد كده الا يشيل الكورة يدخلها في الشبكة ..! * شايلين حس مازدا و(التلاتة) فضلة خيركم والحالة واحدة ..! * تاني ما نسمع إعلام الوصايفة ينتقد مازدا يا بتاعين (بشه صغيرة) ..! * انتوا (عشه صغيرة) دي البغنيها منو ..(اوعى تقول لي البلابل يا راجي) ..! * أجمل ما في البلابل أنهن (تلاتة) مغنيات ..! * ونحنا (التلاته) أخوات أحبه ..! * نهائي كأس السودان طلع (بلابل) لكن الواحد خايف عليكم أنو نهائي الممتاز يكون (عقد الجلاد) ..! * بالمناسبة : إستمتعنا جداً بفرقة عقد الجلاد لما غنت في إحتفالات (الجوي) بكأس سيكافا ..! * قلتوا (الجوي) شال كأس سيكافا بعد ما ضرب (الحمام) .. (فعلاً الزعيم متخصص في ضرب الحمام) ..! * قلت لي عنتر مالو يا الرشيد ..؟ * عنتر طلع (حمام ميت) ..! * شايل ليه خنجر وعامل فيها (عنتر) .. لكن هو ما عنتر بس (حمام مقنطر) ..! * أعمل (إينتر) أضرب (تلاتة) واكتل (عنتر) ..! * إتعنتري ..! نقوش متفرقة * سعدت أمس جداً بلقاء الأصدقاء الأحباء أشاوس مانديلا (جمال ابو عنجة، عاطف القوز، فتح الرحمن سانتو وعيسى صباح الخير) الذين زارونا مهنئين بالحج وقضوا معنا وقتاً ممتعاً ..(ويا لها من أجوء الزعيم منتشي هذه الأيام بالكأسات، وعبق (مانديلا) يعطر كل الفضاءات) ..! * أضفى وجود المهندس محمد موسى والزملاء عادل سيد أحمد ومعاوية الجاك وأمير سيد أحمد والأخ عوض فقيري نكهة خاصة، وكان جمال سالم نجم الجلسة الأول فرفاق بريمة أجمعوا على أن هذا الفتى فيه شئ من عبقرية الأسطورة ..! * جمال (سالم) وغيرو مدشدش ..! * يا خليفة ثبِتوا جمعة في الفريق ما (إتملص) من الكشف ..! * الله يحفظ لينا معز يا سلك .. دائماً في الموعد ..! * (تلاتة) كفاية ولا نزيدا المرة الجاية ..؟ * زيدني من دلك شوية وكتر الأقوان عليا ..! نقش أخير * عنتر (تلتو) ولا كتلتو ..!