* وانقسم الوصايفة قبل قمة الخميس إلي قسمين : (مدربين عددهم أكبر من عدد المشجعين، ولاعبين جميعهم متذمرين وحردانين ) ..!! * اليومين دي اي زول بعاني من فراغ وما عندو موضوع بقي مدرب للهلال ..!! * تدريب الوصايفة بقى شغلة للما عندو شغلة و(برنامج للما عندو برنامج) ..!! * الواحد تلقاهو اليومين دي قاشر وطالع من بيتهم يقول ليك : (اسمع يا حبيب نمشي نشرب قهوة في شارع النيل، والا نمشي ندرب الهلال ؟؟).. إذا كنت مستعجل بتقول ليه : (يا أخونا قهوة شارع النيل بتتأخر ودايرا قعدة، أحسن لينا نمشي على الواقف كده ندرب الهلال ونجي) ..!! * صف مدربين الهلال أطول من صف العيش زمن الأحزاب ..!! * زمان عيش مافي لكن في حرية رأي، هسه الإنقاذ وفرت ليكم العيش وحرية (التدريب)، يعني لو عندك رأي قولو في التشكيلة ..!! * تدريب الهلال ساهم في حل مشكلة البطالة ..!! * أن تكون (عاطل صاحب قرار) أفضل مليون مرة من أن تصبح (فرد في طاقم تدريب الهلال) ..!! * انت يا مزمل بصراحة : القمة دي للمسجلين في الكشوفات حالياً من اللاعبين ولا لقدامى المدربين ..؟ * كل من لعب في الهلال دخل طاقم التدريب هذه الأيام ..!! * وجود صديقنا الحبيب منقستو بالدوحة لا يعني حرمانه من (نفرة تدريب الهلال)، و(يا منقه حصل الشباب واشتغل تدريب بالواتساب) ..!! * الذين يدافعون عن إدارة الهلال بالواتساب ينبغي أن يساندوا فكرة التدريب بالواتساب ..!! * يا منقستو أعمل (قروب) للاعبين وأشرح الخطة، و(اللاعب الما بكون "متصل الآن" يعاقب عقاب الغايب من التمرين) ..!! * عدد مدربي الهلال في تزايد مستمر، و(النفرة) لسه متواصلة ..!! * أصبح تدريب الهلال أسهل من تشجيعه ..!! * إذا كنت لا تملك قيمة تذكرة الدخول لمباراة القمة، فتدريب الهلال أنسب طريقة للدخول المجاني ..!! * يا مزمل : الكورة دي لو ما جابت دخل كويس بكون بسبب (نفرة التديب) ..!! * مدربين الوصايفة عاملين (نفرة) والفريق (عايز دفرة) ..!! * فريق يشرف عليه قرابة العشرة مدربين لا يحتاج لحضور المشجعين ..!! * مافي (كنبة) بتتحمل العدد دا من المدربين ..(ويوم الخميس يا كسرتوا خاطر الجمهور، يا كسرتوا ليكم كنبة إحتياطي) ..!! * طيب .. الهلال دا لو دخل معسكر مقفول (المدربين ديل دايرين ليهم فندق براهم) ..!! * خلاص يا جماعة ما تختلفوا : الفريق يعسكر في فندق والمدربين يعسكروا في فندق ..!! * لو الكاردينال مع البص جاب ليه حافلة (روزا) و(كريز) ما بتكون في أي مشكلة في ترحيل المدربين ..!! * كردنة جا من المطار للتمرين لقى ما شاء الله الإستاد مليان مدربين ..!! * الغريبة كردنة جاي فرحان بالمدرب البلجيكي، جا لقى البلد كلها (متبلجكة) ..!! * لو كل مدرب من (المليون نسمة) المشرفين على تدريب الهلال هذه الأيام تبرع بمليون جنيه، فإن بمقدور الهلال التعاقد مع مورينيو و(باقي القروش جيبوا بيها حسن شحاتة للرديف) ..!! * عقد مجلس الهلال مساء أمس الأول إجتماعاً إستثنائياً (خارج الواتساب) ..!! * يا خليفة : مجلسكم دا طش شبكة ولا شنو ؟ * يا خليفة .. سيبك من المجلس انت تاني ما عندك كلام معاي ..!! * ما عارف كمان ليه ...(معقولة يا خليفة مية مدرب ما تقدر تقنع ليك فيهم واحد وتخش التشكيلة .. وبعد دا كلو كمان بتسأل) ..!! * يا خليفة لو دي طريقتك (أقلب مدرب عشان تلقى فرصة) ..!! * ما تضحك يا محمد عبد الماجد : خليفة أنسب من يقود الهلال (الزول دا القعاد القعدوا مع المدربين في الكنبة يخليهو يدرب باير ميونيخ) ..!! * بمناسبة الكنبة يا خليفة : يوم الخميس إلا تجيب معاك كرسي من البيت ..!! * عشرة مدربين يا خليفة دايرين يقعدوا في الكنبة : يعني حجز مكان في التشكيلة الأساسية أسهل من حجز مكان في الكنبة ..!! * يا خليفة ما تفرط في حقوقك مافي زول أحق بالقعاد في الكنبة منك ..!! * خليفة راجل (كنباوي مخضرم) ..ولو مغالطنا وما مصدقنا أسأل (الكنبة) الرامية فوق بيتنا..!! * يا خليفة أعمل حسابك .. (فريقك دا كلو قاعد كنب) ..!! * بكرة يا خليفة الدفن عندكم كلم المحترفين كلهم ..(ما دايرين كلام كتير وساعدونا بالمحافير) ..!! * وجود المحترفين ضروري ..!! * جوا يساعدو في دفن (فريقو) دس (المواسير) ..!! * كردنة قال للعيبة مطلقي السراح : (مافي لاعب بلوي أيد الهلال ولو كان ميسي) ..!! * من كلام كردنة فهمنا أنو العملها بكري المدينة ميسي ما عملا ..!! * المدينة دخل في مفاوضات حقيقية و(يد الهلال ملوية) ..!! * كردنة قال اللاعب بنديهو قدر مستواهو (معناها الهلال دا ما ناوي يدفع لناس مساوي) ..!! * يا مساوي : كلام كردنة واضح شديد .. الجماعة جهزوا بديلك أحسن تقنع من القروش وتعيد تسجيلك ..!! * إتقنعي ..!! نقش أخير * صدقني ما بقدر (أعيد) قصة (حمام) بالشوت بدأت رحلة عذاب دابا أنتهت ليه تاني ترجع من جديد ..!!