العتب مرفوع هيثم كابو يا عنترة .. الدفن في (المقبرة) ..! * مات عنترة في نهائي كأس السودان، والدفن في (المقبرة) يوم الخميس القادم ..! *ناس الرشيد قالوا : (عنتر كتلو أعمى) .. طيب (المعبرة) تناديكم و(الدفن) راجيكم ..! * لا بد أن يكون صديقنا عابدين درمة ضيف شرف مباراة (الدفن) ..! * يا عابدين السيطرة مريخية والبلد آمنة .. والخميس تعال لينا بدري عندنا (دافنة) ..! * يا عابدين تعال أكرم (عنتر) يوم الخميس بسرعة وورينا شغل (أحمد شرفي وحمد النيل )، وخلينا نمشي بعد داك نحصل لينا (عشرة كوتشينة) في شارع النيل ..! * طبعاً صديقنا عابدين درمة يا خليفة راجل نكتة، قبل فترة لاقاني قال لي : (تعرف يا كابو البلد دي غير الحسادة ما فيها حاجة)..قلت ليه : (كيف الكلام دا يا ابو درمة ؟) ، قال لي : ( ياخي الناس ديل في دفن الميتين حاسدني، يقولوا ليك عابدين دفنو سريع .. الجنازة ما بتاخد معاه وقت .. عابدين بدفن المشاهير .. عابدين بدفن الناس الغنيانين، .. معقولة دا كلام دا .. انا بدفنهم ولا برث مع أهلهم) ..! * ولا يهمك يا عابدين دا حال الناس وحتسمع لسه ولسه، بس تعال لينا الخميس بدري أدفن الجثة ..! * الإستاد الذي تقام عليه المباراة لا يحدد نتيجتها .. الفرسان هم من يكسبون النزال ..و(الملعب ما بلعب) ..! * نناشد الأشقاء بنادي الهلال أن يمنحوا (كابتنهم) فرصة المشاركة في مباراة القمة من باب الوفاء حتى ولو لم تعد لديه قدرة على العطاء ..وتذكروا جيداً أن (صاحب الشارة) كان دائماً (رهن الإشارة) ..! * معقولة عمر بخيت عشان يلعب مدخلين ليه (الأولتراس) واسطة ..! * يا خليفة أتكلم مع عاكف وقول ليه (حركاتكم دي يا كوتش ما زابطة والكابتن ما محتاج يلعب بلافتة) ..! * لو كنت مكان عمر بخيت لرفضت المشاركة التي تأتي بضغوط الروابط والجماهير، فالكابتن إن كان (معلماً) بحق ينبغي أن يثأر لكرامته ويثبت أنه كبير ..! * لا خيار أمام الوصايفة في مباراة القمة سوى أن يفقدوا جهود سيدي بيه او يضحوا بتكتيك الفاتح النقر، فالكوتش الجديد وسيدي بيه ما بتلموا في النادي، والنقر كان واضح وقال (سيدي بيه محترف أكتر من عادي) ..! * (أكتر من عادي) لو فريقكم اتغلب يوم الخميس .. وما تخدروا الجمهور وتقولوا (النقر طابور) ..! * طيب (التلاتة) ما كانت بدون النقر ..(ويا جماعة واجهوا الجماهير وسيبكم من قصة الطوابير) ..! * النقر جا .. (سيدي ما برجا) ..! * سيدي بيه (راحت عليِّ) ..! * يا الرشيد (سيدي بيه أكتر من عادي) لكن أربعة مدربين في فريق واحد (دا تطور ما عادي) ..! * (تلاتة الكأس) جعلت عدد مدربي الهلال أكبر من عدد اللاعبين ..! * تشوف (كونسلتو خبراء تدريب الهلال) في التمرين تقول وفد مدربين ماشي أمريكا ..! * وفد المدربين بذكرنا مازدا .. ومازدا بذكرنا التلاتة ..و(التلاتة حلاته) ..! * يا جماعة .. جيبوا مبارك سليمان راجع وخلوا عدد المدربين يصل خمسة عشان نقدر نشوف لمسة ..! * لدى الهلال (طاقم مدربين) يكفي معظم فرق الممتاز ورغم ذلك هناك إتهامات بأن التشكيلة تضعها (الناطقة) فاطمة ..(وعفارم عليك يا بت الصادق) ..! * نطالب فاطمة بضرورة تغيير أسلوبها في اللعب، مع إجراء تعديل طفيف في العناصر التي لعبت قمة كأس السودان، حتى تستطيع أن توفر للقائد فرصة مشاركة، فالجماهير اشتاقت لرؤية عمر بخيت في الميدان ..! * لن نندهش إذا ظهرت الناطقة في المؤتمر الصحافي للمدربين عقب المباراة ..! * لا تحزنوا : نثق في قلب (الناطقة) الكبير، وسيلامس الكابتن الكرة ويعانق الجماهير ..! * إذا كان النقر يرى أن سيدي بيه محترف أكتر من عادي، فلا تضغطوا على الناطقة فجلوس مهند على دكة البدلاء أمر عادي ..! * يا خليفة : ناسكم ديل أعلنوا (إغلاق التمارين) وخلوا (شوارع الدفاع فاتحة) ..! * (عادي) يا النقر .. (تقفلوا) التمارين و(تفتحوا) الشبكة ..! * (طاقم المدربين) أجتمع وعمل تنظيم جديد لمباراة القمة لسد الثغرات ومعالجة كل الأخطاء والهفوات و(الدقسات) ..! * تنظيم (داقس) ..! * تعالوا يوم الخميس شوفوا عظمة الزعيم وحلاوة التنظيم ..! * مباريات القمة لم تعد ممتعة، فالمريخ بات يحسمها بأقل مجهود ..! * إن كان الوصايفة قد (شكلوا فولترون) وقاموا بعمل (تنظيم جديد) وإستعانوا ب(طاقم مدربين)، فأننا نناشد برهان تية بالسفر لاثيوبيا في أسرع فرصة، فالموضوع لا يستحق كل هذه (الجقلبة) والعناء وقمة الممتاز حمراء ..! * الوصايفة ليسوا في حاجة لمطالبة الكاردينال بالعودة للسودان وحضور مباراة القمة، بقدر ما أنهم في حاجة لحضور محترف يجيد لعب ضربات الجزاء ..! * يا كردنة تقعد في الإمارات تمشي انجلترا تجي مصر ، كلو أفضل ليك من حضور القمة لأنو فريقك دا ما بنستر ..! * بمجرد تتويج المريخ بالممتاز ستبدأ حملة الهجوم على الفاتح النقر وتحميله مسؤولية نتيجة اللقاء، رغم قناعة الوصايفة بأن قمة الخميس حمراء ..! * بعد عودة رمضان عجب سنطالب ضفر بإيقاف أهدافه في شباك الوصايفة ..! * رمضان سيكون صاحب كلمة السر في لقاء الخميس، اما حسم اللقاء فهو مسؤولية تراوري الكاملة ..! نقش أخير * المريخ صاحب الممتاز ولو أعلن التحكيم الإنحياز ..! هيثم كابو
