* لا نود الكتابة عن مباراة الزعيم أمام كابو سكورب الأنغولي المقامة مساء اليوم بلواندا، وسنقوم بتأجيل كل السطور إلى مقال الغد ونحن نحتفل بالعبور .. ! * لا يمكن أبداً التقليل من خطورة لقاء اليوم، ولكن الزعيم تعود على اجتياز المطبات الخطيرة، وعادة ما يظهر معدنه في الملاحم والمباريات الكبيرة .. ! * مؤسف حقاً الا نرى بسبب عدم التلفزة (شقلبة) بكري المدينة وهو يخطف (هدف الطمأنينة) في لقاء اليوم لتأمين نتيجة الخرطوم ..! * إن كان أحمد حسام ميدو قد طلب العام الماضي من افريقيا أن تشكره لإقصائه كابو سكورب فإن افريقيا أخذت حديثه محمل الجد هذا العام ورمت كابو بفريق صعب المراس لا يعرف للهزيمة معنى ولا توجد في قاموسه مفردة خسارة او استسلام ..! * يا ناس كابو انتهت رحلتكم الأفريقية، ولحدي هنا خلاص كفاكم و(الليلة بتشوفوا السم القدر عشاكم) ..! * بمناسبة السم : خلونا نسمم الأجواء شوية بالرجوع لقصة كيبي ..! * قبل أيام لم يتمالك محترف الهلال البوركيني بوبكر كيبي نفسه عندما التحم به مدافع الفريق الرديف معتصم عبد القادر بقوة، وسرعان ما تبادلا اللكمات أمام رئيس النادي ليقوم الجهاز الفني باستبدال كيبي الذي أظهرته صور صحيفة (قوون) وهو (يقبقب) الود معتصم بطريقة استفزازية فيها كثير من عدم الاحترام. و(يا جماعة مافي داعي للضرب والمشاكل البتجيب ليكم الكلام) .. ! * كلام شنو .. اتضاربو براحتكم .. (انتو الكلام يفوتكم وين، وأمس منسحبين وبكرة راجعين) ..!! * يا عماد الطيب كورة الرصاصات دي ما دايرا بيان ، لانو بيانكم الوهمي القلتوا مشترك ما أقنع (علي كبك) .. ! * للفنان علي كبك صاحب (بشرط ليك هدومي) أغنية جديدة بعنوان (بنسى إنسحابي وبجدد ألحاني وبشرط ليك بياني) ..! * بالمناسبة : كيبي (قبقب) معتصم داير اشرط ليهو فنيلتو ..و(عملية كبي دي كبك ما عملها) ..! * كوستي ربك .. بيان مشترك ..و(كلام وهمي ما بقنع علي كبك) ..! * علي كبك لو ما شخصية وهمية بصدق انو 40 مليار بتبني فندق وملاعب وإستاد جوهرة للهلال .. ! * دي الحاجات الوهمية والأرقام الكروكية الخلت ناس كبك يلبسوا الطاقية .. ! * لكن يا كبك البركة في التخفيض فالمبلغ كان تسعة مليار ..و("صيني" لا تكلم الكاردينال) ..! * طالما أن شركات مستلزمات الأطفال قامت بتخفيض نصف المبلغ فلماذا لم تحلف من المبلغ برمته ..و(يا مزمل الصينيين اتلوموا ..وافو يا مستر فو) ..! * يا مزمل حكاية تخفيض الجوهرة زي قصة الفنان القال عدادو عشرة مليون قالوا ليهو : (معليش يا أستاذ عندنا خمسمية ألف بس)، قال ليهم : (جداً .. حفلتكم متين .. التسعة مليون ونص ما بيناتنا) ..! * مستر فو ساهل الكلام كيبي الما عندو تقدير لرئيس النادي، ومدور بونية في الملعب والموضوع مر عادي .. ! * يا كيبي عمليتك دي لو شافا كبك بطلِّع ليك أغنية وبشرِّط فيك نص سريع .. ! * كبك دا لو قبض كيبي بشهي العافية ..! * يا عماد الطيب (بدل تنجض الناس بعباراتكم الواحدة البتقولوها في البيانات دي) يا ريت تورينا موقع تصرف كيبي من (قيم وموروثات الهلال) .. ! * يا كيبي انتوا لسه (الجوهرة) ما قامت بديتوا في حركات (الشفع) خلاص .. ؟ * انتوا يا (بوبكر قبقبة) ما عندكم زول كبير يشتكوكم ليه .. و(مافي داعي لحركات الأطفال قدام زعيم أمة الهلال) .. ! * يا كردنة حركة كيبي دي أمسحها لعلي كبك في شريطو الجديد ..! * علي كبك مُطلِع شريط اسمو (ملك القبقبة والتشريط) .. ! * ضرب اللاعبين لبعضهم البعض أمام الكاردينال لا أظنه يتسق مع (قيم وموروثات الهلال) .. ! * لا اعتقد أن (قيم وموروثات الهلال) تدعو للصبر على (بلنجات اللاعبين) التي يتم تبادلها بكل جرأة أمام عيني الكاردينال .. ! * يا جماعة أعقلوا شوية عشان كردنة ما يزعل منكم ويسافر برا .. و(أشرف دا لو زعل بيلغي مشروع الجوهرة بالمرة) ..! * (البلنجات) الدورّت في مباراة الهلال والرديف قبل كم يوم دي قدام مدير دائرة كورة ما بتحصل .. (يا جماعة حقو تخلوا عندكم أخلاق رياضية وتلعبوا كويس، وإذا ما عندكم أخلاق علي الأقل احترموا الريس) .. ! * الريس خط (أزرق) لا يقبل المشاكل والمهزلة ..و(يا كيبي لقيت كردنة ما فاضي اليومين دي ومشغول بالجوهرة) .. ! * انتوا رمز الجوهرة شنو عشان نكون جاهزين من هسه، مع انو التقيل جاييكم ورا لسه .. ؟ * أتوقع أن تبدأ حملة الإعلان للجوهرة على قناة (سبيس تون) .. ! * كردنة قادر على حسم الفوضى .. (ويا ريس الاشتباك والضرب دا ما كويس) .. !! * و(ريس ريس) يطلع كويس .. ! * يا كيبي الدكتور قال اصابتك طفيفة، لكن (بلنجاتك كانت شينة وقبقبتك ما ظريفة) .. ! * قال معتصم عبد القادر ان تدخله القوي مع كيبي كان لمصلحة البوركيني ..(كلامك حكم يا ود يا عصمة لكن البوركيني ما عارف مصلحتو وين) ..! * انتو كيبي دا بوركيني من النمسا ..(دي ما كورة أفريقية ومعتصم داير أدخلك في أجواء المباريات التنافسية) ..! * الود دا يا محترف أفريقي تقليد .. (يا بوركيني فالصو من النوع الطلع جديد) ..! * يا حليل زمن المحترف البوركيني لما يجي شاقي المدافعين الغشاش يرجف والباك تضربو كهربة (هسه جابت ليها جرسة وضرب وبلنجات وقبقبة) ..! * تعرف يا بوبكر قبقبة الكاردينال ما بحب الحركات دي بالمرة ، (عشان كده احترم الأولاد الصغار وركز في الكورة وسيبك من المصارعة الحرة) ..! * فقدتو (سيد العقربة) وطلعتو ب(ملك القبقبة) .. ! * سيد العقربة الليلة عندو فاصل شقلبة ..(ولا عزاء لنجوم القبقبة) ..! * إتقبقبي .. ! نقوش متفرقة * إن كان فريق كابو سكورب شرساً في ملعبه، وصاحب شخصية بين جمهوره، وله أسلوب يسعى لفرضه، فإن الزعيم حتى وهو خارج البلاد يلعب بثقة وثبات كأنه ينازل الخصم على أرضه .. ! * العقرب مطالب بخطف هدفه منذ وقت مبكر .. ويقظة المدافعين هي التي ستضعنا في صدر قائمة المتأهلين ..! * إذا أحتسب لنا الحكم اليوم ركلة جزاء فيجب أن نترك حارس مرمى كابو سكورب ينفذ ضربة المرمى كسباً للزمن .. ! * يا جماعة بقينا نخاف الحكم يحسب لينا ضربة جزاء عشان ما تضيع ويضيع معاها الزمن ..! * العبور من انغولا والسبت (أحمر) ..! * يا مزمل : أضربوا كابو الفريق عشان ما تجهجهو كابو الصديق ..! * إتاحة الفرصة لأوكرا أمر مهم للغاية في ظل غياب عدد كبير من العناصر الأساسية .. إمتلاك وسط الملعب هو كلمة السر في المحافظة على النتائج .. و(المرتدات هي التي ستكسب الرهان و"الميدان يا حميدان") .. ! * ليس مهماً أن يُضِّيع المريخ أربع ضربات جزاء، ولكن المهم حقاً أن نكسب زمن تنفيذ تلك الركلات ..و(لا يعقل يا عزيزي مصعب الا يستطيع أحدكم في أربع ضربات إدخال الكرة بين الثلاث خشبات )..! * قالوا أن كيبي اعتذر لمدافع الرديف، مع أن الشبل الصاعد بقوة عمره لا يتجاوز عمر أصغر أبناء البوركيني .. ولك الله يا معتصم ..و(العفو والعافية وصابحني دائماً مبتسم) ..! نقش أخير * لا تكتمل فرحة العقرب إلا بشقلبتها .. ويا كيبي كل شاه معلقة من (قبقبتها) ..!
