* ذهب الى الصيدلية يشتكي من الآم حادة استوطنت بدماغه وجعلت من رأسه مقراً ومسكناً، فبات الصداع ملازماً له كظله لا يفارقه البتة، فما كان من الصيدلي الشاطر سوى الإمساك بالقلم والكتابة على (الروشتة):- (عليك بالإستمتاع بتابلوهات (كوفي) ثلاث مرات في الأسبوع، فليس ب(الباندول) وحده تتبدد الآم الصداع !!). * لا أدري ما وجه الشبه بين لمسات كوفي وأغنيات عثمان الشفيع، ولكن كلاهما يريح الأعصاب ..! * نظفوا اذانكم من (التلوث السمعي) الذي أصابها بالحرص على سماع (الحالم سبانا)، وتخلصوا من كل الرهق الذي يلازمكم برؤية إختراقات كوفي الساحرة وتحصنوا من الأمراض بالتدبر في إختراقاته الآسرة ..!! * لماذا لا يستضيف صديقنا د. عمر محمود خالد كوفي في برنامج (صحة وعافية) ..!؟ * يا دكتور عمر .. ما شايف (الروشتات) البوزع فيها (ابو الكوف) شمال ويمين والناس مستمتعين ..! * كوفي دا مفروض نجدد التعاقد معه في (اتحاد الأطباء) ما (الإتحاد العام) ..! * يا دكتور عشميق : انتو قاعدين وين والبلد فيها (دكتور زائر) ..! * أعملوا ليكم (مجمع) العلاج بالمجان و(العقرب متكفل بالأقوان) ..! * انا لو محل د. مأمون حميدة كان دخلت مع المريخ في مفاوضات ومسكّت كوفي إدارة مستشفى الزيتونة ..! * لا أستبعد أبداً أن يستعين صديقنا المريخي الغيور والنطاسي البارع د. علاء الدين يسن بشير مدير مستشفى حاج الصافي بكوفي لإجراء عمليات جراحية بالمستشفى ..! * اليومين دي يا مستر علاء كوفي بعمل في عمليات ما ساهلة و(برقِّص في المقص) في دائرة السنتر و(الجماعة فرحانين بقون البرازيلي الدايش الجا داخل ولقى الكورة قدامو شات جاب الدرون وما عارف الحاصل شنو لما قالوا ليهو يا ولدنا اجري احتفل انت جبت قون ) ..! * انا البرازيلي البجيب قون بالصدفة دا بعرفو ما بقعد أكتر من ستة شهور ..! * ما تقول لي دا قون في الحمام التطواني سيرجيو جابو في فيتا و(دقو ليهو خروج بدون عودة) ..! * أمبارح كوفي داخل في شخصية عثمان الشفيع رسمي ..! * والشفيع لو لم يغنِ سوى (جنود الوطن) لكفته ..! * ولم يبق للود كوفي أمس غير أن يمسك بالكفر ويغني (الذكريات)..!! * إذا كنت من أصحاب القلوب المرهفة،فإياك والدخول لإستاد المريخ هذه الأيام لأنك يمكن أن تلفظ أنفاسك الأخيرة من روعة (باص بيني) أو (شهقة تمريرة) ..! * لعب الزعيم أمام هلال الفاشر أمس بالدوري الممتاز فانخفض عدد المرضى بمستشفى الخرطوم، و(الخيالة لعبوا مع فريق بتحرك بالريموت، وبحدد المواقع بالأقمار الصناعية وبنتشر بالإشارة) ..! * إذا كنت تعاني من ارتفاع في الضغط فإن أوكرا بإمكانه أن يمنحك كافة العلاجات والمسكنات اللازمة دون اللجوء لمقابلة طبيب في المستوصفات الخاصة والمستشفيات الحكومية أو إهدار زمنك في فحوصات طبية ..! * مفروض أي زول يدخل كورة للمريخ يدفع مع تمن تذكرة المباراة (دمغة أوكرا) ..! * دمغة أوكرا دي ضرورية وهامة لأنها (رسوم كشف) و(جِك كامل) ومراجعة عامة .. * إذا أعتزل سلمون جابسون كرة القدم بصورة نهائية، فإن مستقبله مضمون في الأشعة المقطعية ..! * المريخ بقى يغلب الفريق ويسلمو في يدو (شهادة ضرب ورسم قلب) ..! * محمد عبد الماجد منطط عيونو وفاتح خشمو وخايف علي الهلال ..و(يا حمادة أثبت .. العقرب داير (ضربك) لكن محتار) ..! * بكري المدينة بقت عندو مشكلة لازم (يرهب) قبل ما (يغلب) ..! * العقرب بقى لو (ما قطع قلب الخصوم) ما بقطع نفس المدافعين لو برا البلد ولا في الخرطوم ..! * العقرب لو استمر بطريقتو دي احتمال كبير تاني يرسل (الفنيلة) تلعب كورة ويشاهد الماتش من المقصورة ..! * فنيلة العقرب لوحدها قادرة على أن تفعل في مساوي عشرات البلاوي ..! * فنيلة بكري دا أسالوا منها الشاعر المريخابي المرهف عبد الوهاب هلاوي . * الناس قايلة هلاوي بتاع (فراش القاش) ما عارفنو (زول فنايل) ..! * (فراش القاش) بتاع (فنيلتك) ..! * عارفين ولدنا الصفوة هلاوي كتب (حاجة امنة اتصبري)، لكن الزول دا العملا في (الفنايل) ما عملا (الوجع في جوف حاجة آمنة) ..! * ابو الهلال قال : هلا هلا ريدنا ليك يعلم بي الله ودمنا الجاري في عروقنا جاري في خيوط الفنِلة ..! * دم بكري الجاري في خيوط الفنلة ما بضرب الهلال براهو دا ممكن يغلب حلة ..! * لكن بصراحة كدا يا مزمل : البعملوا فيهو أولاد المريخ دا ما غلط ..(الجماعة ديل بجروا خمسين وورقهم معرج وممكن عادي بالطريقة دي يكتلو ليهم متفرج) ..! * غرزتة .. قلبي الرهيف لا يتحمل والزعيم (إتجلى واتكمل) ..! * الفرق كبير بين (قمر السبوع الضاوي) و(صفر الوصايفة الخاوي) ..! * و(الخاوي) يا (الخاوي) (صفرك) معاك هاوي * بمناسبة (الرصيد الأبيض) و(المطار الما في) و(الدولاب الفاضي) و(التاريخ الخاوي) نقول للرشيد : (يا شريان .. لو كبر "صفرك" خاوي) ..! * إتصفري نقش أخير * الدكاترة يا الستة متعتونا في الجزائر بالنقطة
