* الصفوة ينتظرون منا اليوم مواصلة الكتابة عن متعة العروض المريخية وجمال الأهازيج الحمراء وروعة هزيمة حامل لقب دوري أبطال إفريقيا، و(لكن فضائح الوصايفة لا تريد لنا مواصلة الإستمتاع بالحديث عن ملحمة الفوز علي الوصايفة) ..! * الواحد يا محمد عبد الماجد لما يكتب عن الهلال بشعر بانو ثقيل، (لانو حقيقي فريقكم بقت فضائحو كتيرة ودمو تقيل)..! * هزائم الوصايفة المتتالية باتت تحرم جمهور الزعيم من الإستمتاع بانتصاراته..! * ما أنتصر المريخ يوماً إلا وتعادل الهلال، وما قدم المريخ ملحمة إلا وأستقبلت شباك الوصايفة مسماراً..! * منذ زمن (قفا نبكى من ذكرى حبيب ومنزل) لم يهزم الوصايفة الزعيم، لكن المؤسف حقاً أنه ما حقق المريخ فوزاً عريضاً على فريق كبير إلا وحاول (الصفرنجية) خطف الأضواء عنه بفضيحة جديدة... (وبعد ما غلبكم في الحمام المغربي تجيبوا ليكم قون هسه دا توقيت درون) ..! * نتكلم عن درون (الكعب العالي) ولا قون اوكرا وإبداع (العقرب) صاحب فولت الأداء العالي ؟ * (كعب) عز الدين حامد ما ذكركم قون نزار، ولا القصة دي كلها نسيتوها مع المسمار ؟ * يا جماعة تيمكم دا بقى فريسة محلية وصيدة إفريقية..! * الوصايفة يحتاجون لمن يهتف لهم بحناجر الحقيقة العالية: (صيد البلد ...صيد البلد)..!! * (الصيد) بدأ الإنهيار أمام الحمام وفي كادوقلي رفع التمام و (لسه مازيمبي جاي والغريق قدام)..!! * (صيد) الإسم...محبوبي وكتين يبتسم... (النقاط) يا ناس تنقسم ..!! * يا مزمل: (قسوم) رجع لتعادل كل يوم! * قبل أن يتحدث إعلام الوصايفة عن التحكيم عليهم التزود بأكبر كمية من الخجل..!! * لو دا فريقكم مفروض التحكيم يعينكم..!! * هسه البعمل فيهو اتير توماس دا دايرو ليهو حكم..! * بمستواكم دا يا اتير يوم بتكتلو ليكم وصيفابي..!! * يا مساوي إذا دا مستواكم مع هلال الجبال، معناها مع مازيمبي مافي أمل تعملوا حاجة..!! * يا كردنة سيبك من الجوهرة الزرقاء وحصل الأميرة السمراء! * الكلام عن تأهيل الإستاد خلوهو... و (ورونا كورتكم الدايرين تلعبوها في الإستاد)..! * الوصايفة جابوا الوتد قبل الخروف... (كردنة شغال صيانة في الإستاد والفريق محتاج لعملية تأهيل مستعجلة) ..!! * أجمل خبر تمثل في نفي الهلال نيته الإستغناء عن نبيل الكوكي فالرجل الذي لم تظهر لمسته بعد مع الفرقة الهلالية يجب أن ندعم وجوده فلا زال في الزمن متسع قبل (ركوبه التونسية)..! * (التونسية) التي تفرغت للهلال بكل خطوطها ليست بعيدة عن الكوكي وقبل فترة قصيرة حملت مواطنه نصر الدين النابي..! * بمناسبة النابي: لماذا تراجع مستوى بشه الفكري ؟ * أيهما أكثر تراجعاً: مستوى بشه الفكري أم مستوى كاريكا الفني ؟ * لم يحرز بشه هدفاً في الفترة الماضية لفقدانه (حساسية التنبوءات) ..! * من قبل طالبنا بضم بشه لإتحاد الأدباء والكتاب السودانيين بأسرع فرصة لأننا كنا كل ما نشاهد مباراة لمدرب الوصايفة نصر الدين النابي نتأكد تماماً أن بشه مفكر..!! * تنبأ بشه بفشل النابي منذ المحاضرة الأولى وأطلق عبارته الشهيرة (دا مدرب كيسو فاضي)..!! * الكوكي أقل قامة من النابي بالرغم من أن الأخير كان كيسه أفرغ من فؤاد أم موسى..!! * (أفرغ) وداوي..!! * لماذا صمت بشه على الكوكي ولم يضع قدراته في الكيس المناسب.؟ * الفرق بين النابي والكوكي كبير و (على ذلك "كيس") ؟ * تعادل الوصايفة مع هلال الجبال سيجعلهم ينتبهون لملحمة مازيمبي ويرممون صفوفهم، مع أن هزيمتهم من (الحمام التطواني) لم تحرك فيهم شعرة...و (طالما أن الوصايفة "راقدين فوق راي" فيجب أن يقود الصفوة نفرة لإنقاذ ما تبقى من الهلال) ؟ * ناسكم يا محمد عبد الماجد ما (راقدين فوق راي) ديل طلعوا (قاعدين ساي) ..! * وقاعدين ليه ما تقوموا (تجحجحوا)..! ؟ * (تجحجحوا) دي مفردة (تطوانية) مشتقة من مسمار (جحجوح) ..! * يا مزمل: قون أسود الجبال جا بالكعب ولا الهلال الكان كعب..! * وهذه الأرض تغطت ب (الكعب) ؟ * وثابت (مغطينا)..! * والثابت أن ألسنة الهلال تستعر كالجحيم مع أنهم لا يملكون أي تيم و (مازيمبي جايكم والله يغتي عليكم)! نقش أخير هاهى الأرض تغطت بالتعب (الأصفار) إتخذت شكل الفراغ وأنا مقياس رسم للتواصل والرحيل
