* أعادنا صالون الكونفدرالية إلى أيام مضت أيام القفشات والعكننة.. صالون الكونفدرالية فكرة جيدة وجدت رواجاً وأحدثت حراكاً محبباً بطبيعة الحال وهذه المناكفات تثري النشاط وفي الأخير نحترم الهلال كندٍ ولكن نحب المريخ ونريده دائماً أفضل من الهلال واستمتعت بحديث إسماعيل حسن ثم عصام هجو وأيضاً حديث شجرابي وبالتأكيد سيكون لحديث عديلي أحمد * تأكدت من حديث شجرابي أن الهلال مرعوب من مباراة القمة وشجرابي يقول أشياء غريبة وعجيبة.. يعتقد أن هلال (زرقان) أفضل من الزعيم ومريخ البطولات وشجرابي الذي لا يعرف المطار إلا لاستقبال والدته عندما تأتي من السعودية ولم يذهب إليه لاستقبال بعثة للهلال عائدة بكأس خارجي يعلم أن المريخ حصل على كل البطولات لأنه الأفضل وأنها ليست بطولات زائفة وخلونا في يوم السبت.. خلينا من البطولات دي لأن البطولات المحمولة جواً دي ماركة مسجلة باسم المريخ. * المجنونة لو ما قالت لا المريخ سينتصر على الهلال.. بسم الله ما شاء الله عندنا فريق مرصع بالنجوم والجواهر والدرر.. الحضري حارس مرمى الفراعنة وأفضل حارس في أفريقيا.. باسكال برج المراقبة.. نجم الدين (المدافع العكليتة) ليما فتى السامبا.. سعيد.. قلق.. رمضان.. سكواها.. أديكو وكلتشي.. العجب العجيب (قون قونين يجيب) والبقية. * والهلال (بندق في بحر) رصاص فشنك.. قال سانيه هداف الثواني.. جاب أقوان في منو؟ كلو حمام ميت ويوم السبت المحك الحقيقي.. سنحتفل وجهزت البسبوسة من أسي. * دايرين تفتيش دقيق في المباراة دي.. ما دايرين أي حجر داخل الملعب والناس الببيعوا الموية ديل خلوهم يبيعوها في أكياس.. ما دايرين قوارير مياه عشان الجماعة ما يجدعوا أي حاجة في الملعب * إعلام الهلال في انتظار مباراة السبت.. يريد فوز ولو بالصدفة عشان يحتفلوا بيه ويمسكونا السنة كلها زي قصة قون بشة.. لكن يوم السبت بلو راسكم ما في صدفة تاني.. جيب من جوة يا معز بس. * صديقي عصام هجو قال كلتشي والعجب يسجلوا ثلاثة أهداف وأنا بقول الهدف الأول لكلتشي والتاني لسكواها والتالت للعجب ولابد من قون رابع نرضّي بيهو أديكو لأنو الراجل قاعد في دكة البدلاء ليهو زمن طويل وهدف في شباك الهلال برضيهو بالتأكيد وأربعة يا جماعة ما كتيرة إذا وضعنا في الاعتبار الفارق بين الهلال والمريخ والأربعة دي قبل كده الهلال أخدا من فرق ميتة.. ولما ياخدا من الزعيم ما شاذة. * قال إيه.. الفرنسي يجهّز هيثم مصطفى.. يجهّز البرنس يجهّز الأمير يجهّز الجندي ما بهمنا ونحنا كمان بنجهّز الشغيل. * صديقي فوزي المرضي بعيد عن الهلال ونحنا دائماً بنتفاءل لما يكون شيخ فوزي بعيداً. * الأمين البرير يتابع التدريبات.. هاشم ملاح يتابع التدريبات.. إبراهيم خالد حسن عباس يتابع.. يا جماعة دي مباراة عادية الدنيا كلها تتابع؟!! * هسع شفتوا في المريخ جمال الوالي وعصام الحاج وأزهري وداعة الله ومتوكل وهمد تابعوا ليهم تمرين؟!.. لكن في الحقيقة مجلس المريخ مطمئن وواثق من الفوز لكن في الزبون (الهالة سأبة) * المعز ما بقدر على القصة دي.. صعبة عليهو.. الراجل اتقدمت بيهو السن وأصبح وزنو كتير وقذائف الأباتشي وسكواها ما بقدر عليها. * أقول ليك حاجة يا غارزيتو جيبهم الاتنين.. المعز وجمعة وبعد ده شباك الهلال ما بتسلم. * ما عارف الفصاحة دي في شنو.. شوية الستة نقاط ديل. * الغريق قدام والفارق سيتقلص ولو كان على مباراة أهلي شندي والفوز على النمور جا بي قون أوف سايد.. يعني النتيجة الطبيعية التعادل إذا ما كان أهلي شندي فائز لكن نسوي شنو للحكام دائماً كل ما ينزنق الهلال يستعين بصديق ويلقى الحكام وقت الضيق. * المريخ يوم السبت نار منقد.. الحضري والدفاع والوسط والهجوم أي لاعب في المريخ في انتظار مباراة السبت. * أتوقع تألقاً لافتاً لولدنا سكواها.. وأنتظر منه هدفاً في شباك المعز بطريقة خاصة.. يراوغ (عمك مساوي) يطلع ليهو المعز يكسر منو يمين ويلعب الكرة براحة في الشباك (تك تك تك) والجماعة عينهم للكرة ماشة لحدي ما تدخل الشبكة.. متعة المتعة عندما تشاهد الكرة في شباك المعز. * المعز متعود على البهدلة مننا.. مرة لفيناهو في الشبكة ومرة يقوم ويقع ومرة يحبي وكان سمعت يا المعز نصيحة إسماعيل حسن كان أخير ليك. * يوم الأحد سنطالع رمضان يحتجب على أن يعاود معانقة القراء غداً ويس علي يس لا حس ولا خبر وشجرابي فص ملح وداب والرشيد علي صور هاك يا تبريرات.. الحكم والملعب واللاعبين والطابور. * ننتظر يوم السبت على أحر من الجمر لنستمتع بأداء الملك والبرازيلي ليما ومشاهدة الكرة في شباك المعز. * أي مريخابي يتخوف من مباراة القمة نقول له الجماعة نفاخين ساي التكتح ما عندهم. *
