قبل فترة وجيزة كانت المركب هي سيدة الموقف عن طريقها يجد اي شخص نفسه من الخرطوم او اي مكان في توتي، بجانب المعدية والبنطون ثم تم افتتاح الكبري فأصبحت كل وسائل النقل عن طريقه تلج توتي. تخيل عزيزي القارئ ونسة بين حافلة نقل ركاب ومركب جار عليها الزمان الحافلة: هسا انتي زعلانه وحزنانه كدا مالك؟ المركب: اشان اعتبارات كثيرة ناس بسيطة ال بتحس بيها. هسا المساكين الكانوا شغالين في المراكب والبنطون ديل رزقهم ما انقطع الحافلة: ما يشتغلوا في اي مجال تاني المركب: اشتغلو كيف؟ وين؟ هم حملة الشهادات الجامعية عطالة. الحافلة: ربنا ما بنسى عبد من عبادو الحي رزقو حي.. انتي افرحي اشان دا حضاره ما شفتي اي عربية تدخل بقت بالكبري. المركب: دا برضو شي مزعلني.. اي منطقة تكون هادئة وجميلة البشر يدخلوها تبقى زحمة وتفقد جمالها.. هسا خلاص توتي تاني تبقى زي امبدة وسوق ليبيا الحافلة: الكباري وغيرها بتسهل حركة البشر.. العالم بقى قرية واحدة. انتي ما مع الثقافة ولا شنو؟ المركب: الثقافة والحضارة دي هم اسباب مشاكل مجتمعنا دا.. هسا ناس الزراعة الحالة البلد دي زراعية معظمهم ساب اراضيهو وجاء العاصمة ما شفتوها بقت زحمة كيف؟ وخليط من البشر ما عادي.. الناس كلها جات العاصمة الحالة الاقاليم بخيرها اها الاراضي الزراعية دي البهتم بيها منو؟ الحافلة: انتي بس «قولي يا نفسي» اشان تعيشي سعيدة من راقب الناس مات هماً خصوصا الزمن دا. المركب: بس مسؤولين من الخير هسا..... الحافلة: الخير ياتو الخير ذاتو ما بقي عند ناس بسيطة الزمن دا حتى اذا لاحظتي في اسماء كدا تماشيا مع الحضارة ومتطلبات الزمن دا الناس سابوها عديل زي الخير والنور وحنين والطيب اها منعا للنفاق والكذب احسن الناس السابت تسمية الابناء اسماء زي دي كفاية عليهم اسماء الممثلين والممثلات. المركب: انا في رأيي... الحافلة: الرأي دا احتفظي بيه جواك اكتميهو. المركب: ليه يعني المسكين رايو ما مسموع ولا شنو. الحافلة: الفرق بيننا انو انا عاملة يدي طايله وعندي ضهر اشان كدا اموري ماشه تمام وسعيدة وانتي معترفة انك مسكينة اشان كدا تعيسة.
