1/ بتبالغ يا عبدو، لسه بتقول لي خلينا نتعارف أكتر، كفاية لآمن أكون معاك ما بيطربني رنين المعادن، وما بتبهرني لزوجة العملات، من الدرهم إلى اليورو، بس كتر من الشيكات السياحية قبال ما تجيء البيت، وتقابل الحاج. 2/ وأنا زي ما إنتي عارفة، ما عندي علاقة بأمس، ولا أول أمس، وشغلي الشاغل رد الجماليات للممارسة الأسرية، وعشان أكون معاك يا أمينة أسرة جمالية، لازم أعرف أمس كُنتِ وين.. وأول أمس وزعتوا الورثة كيف..؟ 3/ اتجاه واحد، من البيت لصالون التجميل، وياها دي الشغلة، اشيل وأنبش في رؤوس الزبائن، بحثاً عن بهاء الشكل، الذي ترضى عنه الجيوب، يرضيك ده يا عبدو..؟ 4/ وأنا الغاطس لي أضاني وسط المشروبات المعصورة عصر حلال لآمن جابت الزيت، لكن بالمناسبة..الزيت ده جوه الشيلة، ولا بره منو يا أمينة..؟ 5/ الطموح والفضول والرغبة يا عبدو أخوات لكان، والجمع بينهما مستقيم يمس دائرة الممنوع في نقطة واحدة. 6/ خلاص لمعي الحواس، وسلفتي الزقاق البودي لذاكرة أبوك، وخليهو يدفسنا معاهو في دائرة الضوء المتحكر فيها دي، إن شاء الله بي أوضة وبرندة بس. 7/ بشرط تذاكر كويس يا عبدو، وتحفظ ارشادات المشي جنب الحائط، وتنتبه لإشارة الكمساري، وما تفوت المحطة، وبيتنا أظنو واضح. 8/ ما تخافي علي يا بت، ولحدي الخميس الجاي داك، يكون نائب دائرتنا فاز، وقطع شك ح أحل عقدة اللسان، وأسند العنق المتدلية من شدة غباء الطأطأة. 9/ خليك حاضر ومنتبه يا عبدو، وما تقول عايز تزرع شجرة في الحوش قدام أبوي، واتفاقنا، أوضة مطرفة، وبرندة في النص. 10/ معقولة يا أمينة، نخش دائرة الضوء في السخانة دي، من غير ما نقيل في ضل الضحى.
