مرض شايبنا وإتبروك عاد لا حول لا قوه بطنو اتمسحت مويه وعيونو اتغورقن جوه فاقد القدره والحيله وضرب روراو ابو مروه وتبكي التهجا فوقنا تنوح تشيل الليل تقول بوه الله اكضب الشينه وبريه ابوكي يا ضوه رقد واتكنّشن كرعي وعضم ضهرو يابس كو قاطع الجره تب ما بضوق بس ترياقو موية تو يابس حلقو ما بعدي حرقان جوفو راقد بو بالع حسو ما يناغم تاوي خلاس وماخدو السو حليلو الشايب العرضان جمل الشيل كفا الضيفان ابوك يا الضو تشيل الليل دخول ومروق وتقابتنا ما بتموت تساسق روحو للمرقه متبته ناسو ما بتفوت تمنح فوقنا بت فرنيب معاها تسلف البنوت حليلو الما اتذكر بيشين حليلو الدخري لينا مقوت نشيلو صبرنا نتحزم وان ما متنا وين بنفوت قادر ربي في حكمو بعد ماكزول اقلبك ضب بشوف شايبنا اتحايا رجعت فيهو روحو تدب جبد نفسو وطلق كرعي وعاع ادش واتقلب حلبنا شدوقنا فرحانين رحمتك يا كريم يا رب لطفت قدرة الخلاق تجلت لينا في خلاسو بعد ما ضاق كرير الموت وكتير اتلفت ناسو ترب صنقر على حيلو توزي الهام رفع راسو وقال ادوهو فجة خلاس كمان ناولوهو تمباكو كتح سفه وبزغ جره وقال لاولادو ادنو علي أكان دايرين عفوي ورضاي ابقو قريب واسمعو لي انا الماكني مو هين وسلب لحمي نوسر بي انا الفوق جمري بتقل منو الليلة آح وأحي انا الممكون مساهر الليل وبراي ضايق مرارة الغي منا مرضان مرض حكما ولا هو كمان مرض فقرا لا بتنفع حبوب لا كي ولنا داير دهب لا مال ولنا حصين لا جمال بدور ليم المفرهد وني وكان عارضتو مارضيتو خلاس من هسع من هسع أبكو علي
