في خبر عاجل من الفضائيات ووكالات الأنباء ان المنظمة الاقليمية للأزواج الضعفاء Weak Husbands Organization والتى تختصر ب W.H.O قد دعت الى اجتماع طارئ بعد الاحداث التى جرت في تونس ومصر وما اعقبها من تظاهرات في ليبيا واليمن وسوريا. تبادل اعضاء هذه المنظمة والذين يعدون بالآلاف الشفرة عبر الانترنت عن طريق موقع «وش الكتاب» او «كتاب الوش» الذي يسمى بالانجليزية Face Book وموقع «تويتر» وطبعاً علشان نحن في السودان ما عندنا ميدان تحرير علشان كده اتفقوا يلتقوا في ميدان «جامسكا» بالثورة وذلك لبعده عن تجمعات النسوان ذوات «الاضنين» الخفيفة والايادي الثقيلة. الشعارات التى رفعت من الازواج كانت: 1/ لا لتغسيل العدة بعد اليوم. 2/ لا لتوريق الخضرة او فرمها. 3/ لا لتشطيف الشفع. 4/ لا للمراسيل انصاص الليالي او فى الهجير. أهم شعار رفعته المنظمة بتغيير المدام «المنظمة تريد تغيير المدام» من جانب آخر كُوِنت لجنة مفاوضات بين اعضاء من المنظمة والنساء. علمت مصادرنا ان الجانب النسوي قد ابدى التنازلات الآتية: 1/ السماح للزوج بالتعدد في حدود 2 زوجة في المرحلة الاولى بشرط ان تكون احداهما عزباء. 2/ السماح للزوج بالخروج من البيت دون اذن او سؤال في المرقة والدخلة. 3/ السماح له بالسفر متى شاء والى حيث شاء. 4/ بيع نص دهب المدام للمساهمة في المعيشة. 5/ التخلى عن الطلبات الكتيرة والاكتفاء بثوب واحد خلال العام. جاء من مراسل قناة توتي من ميدان جامسكا ان الوضع مازال متأزما والرجال حالفين ما يرجعوا الا اذا نُفذت طلباتهم، مندوب القناة شاهد اكثر من «مأذون» قرب الاستاد وهم يلوحون «بالقسائم» وأوراق الطلاق. مولانا المأذون المفوض قال القصة كلها هرشة ساكت لحدى اسي مافي زول طلب ورقة طلاق. هدايا الحلقة: 1/ واحد سألوه ما هو الفرق بين المتزوج والعازب؟ قال العازب حيتزوج والمتزوج حيتعذب!. 2/ المرة المريضة جات للدكتور في الحلة قالت ليه دايراك تحولنى البندر علشان هناك قالوا الدكتور بكشف بالسماعة، الدكتور رباطابي قال ليها امال المعلقة في رقبتي دي «نبلة». 3/ عجوز خيروها بين العرس والحج «دنقرت» وقالت هي مكة حتطير!. 4/ سوداني سأل لبناني قال ليه بتقضى يومك كيف؟ قال ليه بالنهار سايق همر وبالليل جمب القمر. وانت، قال ليه بالنهار سايق «تيرلا» وبالليل جمب «الغوريلا». 5/ واحد من اهل الخيال قالوا ليه «البنقو» يؤدى الى الموت البطئ قال ليهم انا ما مستعجل. 6/ قال احد الحكماء ما رأيت اتعس من اربع: رجل يلبس القديم ولديه الجديد، ورجل يريد الانتحار وعمره مديد، ورجل يدعى للعشاء ويطلب المزيد، قيل ثم من قال: ورجل في هذا الكون لا يشجع ريال مدريد. 7/ اصحاب خيال لاقاهم عسكري سألهم ليه كلكم عيونكم حمراء؟ قالوا ليه بنبقى لي بعض!. 8/ صاحب خيال جابو ليه بت قالوا ليه حتسميها منو؟ قال ليهم حأسميها «هبة» على عمتها «علوية». 9/ سوداني كذاب لاقى روسي كذاب قال ليه نحن السخانة لما تجي شارع الزلط بقعد في الضل!. الروسي قال ليه نحن من شدة البرد لما يتكلم معاك زول لازم تشيل الكلام تسخنوا وبعد ثلاثة ايام حتى تفهم قال ليك شنو!. 10/ الرباطابي في الطيارة قال للمضيفة أديني بطانية، عايزة تتظارف معاه قالت ليه (بردته) قال ليها لا عايز أكوي!. 11/ الجعلى مسافر في الطيارة لمن المضيفة قامت تقدم الخدمات حلف طلاق الا بناته يساعدوها!. 12/ واحد سأل واحد من أهل الخيال قال ليه بتعرف تعوم؟ قال ليه لا، قال ليه يخسِ عليك يعنى الكلب أحسن منك؟ قال ليه بزعل وأنت بتعرف تعوم؟ قال ليه طبعاً، قال ليه يعنى مافي فرق بينك وبين الكلب!. 13/ الولد سأل أبوه يعنى إيه راجل؟ قال ليه ياحبيبى راجل يعنى حمش- ضكران، يعنى تقول الكلمة مرة واحدة فتنفذ، رد الولد يا سلام يا أبوي متين اكبر وأبقى راجل زي أمي؟!. 14/ واحد من أصحاب الخيال مشى يخطب ليه واحدة قالت ليه آسفة جواي شخص تاني، قال ليها بطلي الفلسفة وقولي انك حامل وخلاص!. 15/ قيل لبعض الحمقى كيف صمتم رمضان؟ قالوا: اجتمعنا ثلاثين رجلاً فصمناه في يوم واحد!. 16/ واحدة هبلة عاملة فيها شاعرة كتبت لحبيبها: يا ريتني ناموسة في غرفتك محبوسة أبوس خدك تضربني وأموت في حبك معفوصة 17/ جاء جون الأمريكي ومعه زوجته لقضاء الإجازة في السودان وقضوا عدة أيام ثم رجعوا، فسأل اوباما الرجل كيف وجدتم السودان وأهله؟ فقال جون أيامي الأولى قضيتها مع ناس بياكلوا القراصة والميلوحة واعزونا بهن، قال ليه أنت تقصد الدناقلة. فقال جون وجدت أناس كرماء لدرجة أنهم اسكنوني معهم وذبحوا لي الذبائح ولم أفارقهم إلا وأنا مبسوط، فقال اوباما ديل الجعليين. قال جون وجدت واحد عزمنى في اكبر المطاعم وطلب أطيب الأكل ولمن جا دفع الحساب زاغ مني، فضحك اوباما وقال على الطلاق الشوايقة ديل اصلوا ما ببطلوا حركاتهم دي!. 18/ لبناني عطس واحد قال ليه يرحمك الله رد اللبناني «حبيب ألبي». 19/ صعيدي في الشرطة قبض ليه خروف قال بياكل حشيش!. 20/ صيدلاني أتزوج صيدلانية ولدوا تركيبة!. خاتمة: ما زال الوضع متأزما في ميدان جامسكا وما زالت المفاوضات تجرى بين مناديب الجانبين. وربنا يجيب العواقب سليمة.
