السودانيون ناس مجاملين للحد البعيد يعني ناس حارة هم سند وعضد بعضهم - أي فرد في المجتمع ألم به فرح أو كره تلاقيهم واقفين معاه على نطاق الأسرة الصغيرة أو على مستوى المجتمع الكبير - أم درمان ما زالت تحتفظ بهذا السلوك الجميل ذي الطابع الفردي. المجاملين والمجاملات مجالاتهم تتفاوت واحدين يجيبوا شوالات سكر وخرفان وصناديق بيبسي وعلب او اكياس حلاوة او صواني الشاي واللقيمات لبيوت البكا والنسوان بيعملوا فطور للنساء (النفس) ومعاه حلل (حلبة) أو مديدة تمر. صحي النسوان يمشن يقيلين ويضربوا (ويلهطوا) هذه العوائد كلها عادة جميلة تدخل السعادة على الشخص المُجامل. كشف المجاملة ما عنده سقف من الملايين للملاليم (خمسة عشر جنيها أحياناً). في مقولة مشهورة بتقول (كل نملة بي قرصتها) يعني كل زول حسب ظروفه ومقدرته والنمل ذاتو أنواع في النمل أبو ريش وفي نمل السكر وفي النملة الشحموطة والنملة الزرقاء وفي النمل العادي وانا بعرف ناس كتار بينضغطوا عشان يسددوا دينهم للذين جاملومهم سابقاً وهم يستندون في ذلك على قاعدة (البدين يدين). الراجل لاقى صاحبه الفنان قال ليه امي ماتت راجعت إسمك في كشف شوالات السكر ما لقيته راجعتو في كشف ابو مليون برضو ما لقيتو عرفت انك ما سمعت رد عليه بي زعل قال ليه امك ماتت عمرها مية سنة أصلها ماتت في الوضوع!. هدايا الحلقة: 1/ الراجل اشترى خروفا ب1400 جنيه الزم مرته بعمل حنة وحريرة وضريرة للخروف والا تمشي بيت ابوها وتم ذلك، بعد الصلاة جاب ضباح رباطابي قال ليه الخروف وين قال ليه في الزريبة، الرباطابي مشى لقى الخروف محنن ومعمول ليه الحريرة والضريرة، طهره ومرق!. 2/ الرباطابي سأل بتاع الخرفان الخروف ده بي كم؟ قال ليه 1400 قال ليه ما قلت ليك سرعته قلت ليك سعره!. 3/ البت قاعدة مع خطيبها في الكازينو الكهرباء قطعت قالت ليه دي فرصتك اغتنمها، شال شنطتها وقام جاري!. 4/ الكاشف كان بغنى شمسك طلعت اشرق نورها بقت شمسين، ادروب قال انا برضو قلت السخانة دي ما ممكن تكون سخانة شمس واحدة!. 5/ صعيدي عايز يعمل عملية انتحارية عمل بروفة قبلها بجمعة!. 6/ صعيدي مشى الدكتور بشتكي من الم في بطنه سأله الدكتور اكلت ايه؟ قال ليه علبة ساردين، الدكتور قال ليه الساردين كان بايظ؟ قال ليه ما عارف لأني ما فتحت العلبة!. 7/ صاحب خيال ضرب لي شركة شل قال ليهم عندكم زيت مكنة وزيت فرملة وزيت جربوكس، قال ليهم ما عندكم زيت طعام؟!. 8/ بتاع شربة سأل اخوه لو شربت عرقى بتسكر؟ قال ليه اكيد، قال ليه طيب لو شربت مزيل عرق بتفك؟ «هاك ام فتفت دي»!. 9/ عريس جديد قال لعروسه سأفرش لك قلبي لتنامي عليه، العروس هبلة قالت ليه ولو ازعجتني دقات قلبك؟ قال ليها نومي في الواطة انعل ابو اليدلعك!. 10/ مريخابي لقى مصباح علاء الدين . العفريت قال ليه عندك طلب حأنفذوا ليك، قال ليه عاوز أشوف امي قال ليه ما ممكن لأن امك ماتت ليها 20 سنة قال ليه طيب داير المريخ يشيل كأس الممتاز قال ليه خلاص حنجيب أمك. 11/ الراجل مشى قسم الشرطة وقال للضابط عايز أقابل الحرامي القبضتوه في بيتنا مساء امس الضابط قال ليهو عاوز شنو؟ قال ليه داير أسأله كيف خشى بيتنا من دون مرتي ما تحس بيه أنا لي عشرين سنة ما قادر. 12/ إتنين مصريين من أهل الخيال واحد قال للتاني تصدق باراك أوباما جاي مصر بكرة قال ليه على بالطلاق الزمالك يغلبوا ليك 4 / صفر. 13/ جدادة إستضافوها في التلفزيون في برنامج إسمه (البيض بيضك). 14/ واحد قال لزوجته بتحبيني قدر شنو قالت ليه قدر ما انت بتحبني، قال ليها والله انت قلبك أسود شديد. 15/ الزوجة قالت لزوجها مبروك حنبقى ثلاثة في البيت راجلها فرح وقال ليها إنتي حامل؟ قالت ليه لا لكن أمي جاية تعيش معانا. 16/ رئيس دولة صغيرة زار الصين، رئيس الصين قال ليه نحن تعدادنا مليار ونصف نسمة رئيس الدولة الصغيرة قال ليه نحن تعدادنا 50 الف نسمة رئيس الصين قال ليه كان تجيبهم معاك. خاتمة: ونختم بقول الشاعر الذي اطلعنا عليه في المدارس الأولية وما زالت أبياته ترن في خواطرنا رغم مرور عشرات السنين: حكاية الكلب مع الحمامة تشهد للجنسين بالكرامة يقال كان الكلب ذات يوم بين الرياض غارقاً في النوم فجاء من ورائه الثعبان منتفخاً كأنه الشيطان وهم أن يغدر بالأمين فرقت الورقاء للمسكين فنزلت تواً تعين الكلب فنقرته نقرةً فهب فحمد الله على السلامة وحفظ الجميل للحمامة إذ مر ما مر من الزمان حتى اتى الصائد للبستان فاتخذ النبح له علامة ففهمت حديثه الحمامة وأقلعت في الحال للخلاص وسلمت من طائر الرصاص هذا هو المعروف يا أهل الفطن الناس بالناس ومن يُعِن يُعن ونحن نقول الناس بالناس والمجاملة هي الأساس
