درج الناس في جميع أنحاء العالم على تخفيف الاسماء او اختصارها او تحويلها الى القاب او اسماء دلع، وقد يصبح اسم الدلع كناية والكنية او اسم الدلع اذا قبل به شخص لا تشكل مشكلة وتكون محببة للشخص بعكس الاسماء القبيحة او اسماء الحيوانات والتى يرفضها المسمى بها وهي تعتبر مخالفة لتعاليم الاسلام. فيجب ان نطلق على الشخص الاسم الذي سمي به او الكنية المقبولة لديه مثلما أطلق الرسول الكريم صلى الله عليه وسلم كنية ابو هريرة على الصحابي الجليل عبد الرحمن بن صخر الدويس حافظ حديث الرسول الكريم. نماذج للألقاب وأسماء الدلع: * محمد وأحمد وحمد «حمادة» وعبد الله وكل اسم مركب مثل عبد الرحمن وخلافه الكنية تكون «عُبد» مختار «مخ» حنان «حنو» سمية «سوسو» نفيسة «نفسفس» ابكر «ابكراي» سليمان «ابو داوود» عثمان «ابو عفان». * في عالم الكورة الالقاب للزول اللعاب واشهر الالقاب واسماء الدلع للاعبين، هيثم مصطفى «البرنس» قاقرين «قاقا والرمح الملتهب» العجب «عجبكو او السلطان» أحمد آدم «عافية» بشرى وهبة «المعلم» كمال عبد الوهاب «الدكتور» عز الدين الدحيش «الدحيش» السعودي «ميدو» فوزي المرضي «الأسد» الجمهور يطلق الألقاب او اسماء الدلع على الهدافين وصانعى الألعاب والباكات وناس الدفاع لا يدلعوا الا نادراً فمثلاً اطلق جمهور الهلال على طارق أحمد آدم «وزير الدفاع» وعبد الله موسى «المر» احسن كان ليه اسمه والتقر «ملك التغطية». * السودانيون يحبون تدليع الاشخاص وخصوصاً البنات الصغار وقديماً كان يطلق على الدلع «العجن» جاهل صغير وامو معجناه ورائعة الشفيع: ده دلال معجن محن الامات يا رزان، والبنت المدلعة يطلقون عليها «البت الدلوعة». * المصريون عندهم نفس هذه الأشياء قديماً كان فيلم «دلع البنات» وأغنيتهم الشهيرة: ادلع يا عريس وعروسك نايلو في نايلو» واغنية تشجيع فريق الزمالك للكابتن رشيد المهدية: ادلع يا رشيد على وش المية». طرائف الألقاب وأسماء الدلع: 1. الشافع في ركن الاطفال قالوا ليه اسمك منو؟ قال ليهم حمادة وبدلعونى وبيقولوا لي عبد الباقي!. 2. واحد هلالابي موهوم قال اسمه الطريفي وبدلعوه وبقولوا ليه الغزال!. 3. واحد في الجامعة من غرب السودان دخل قبول خاص في التعارف، الاستاذ قال ليه اسمك منو؟ قال ليه اسمى حنظلية وبدلعوني بقولوا لي «عقرب الجمال»!. 4. الراجل عنده زوجتين واحدة حلوة ورشيقة والتانية شينة وسمينة ونافشة، وقال مرتو الحلوة ملقبها «بالدلوعة» وقالوا ليه الثانية لقبها منو؟ قال «البالوعة» وقال هو محتفظ بيها لى حليفة الطلاق. 5. الراجل صاحب الشركة المتصابي عين ليه سكرتيرة صغيرة وحلوة شابكاه يا حاج يا حاج الحكاية دي ما عجبته قال ليها اسمعي يا ب شابكاني يا حاج أوعى تاني تقولى لى يا حاج لأني انا ما حجيت انا عمرت بس ممكن تقولي لي «عموري»!. هدايا الحلقة: 1» واحد جا جاري محصل الصلاة في الجامع لقى الناس صلوا ومارقين سأل رباطابي قال ليه صليتو؟ قال ليه لا قالوا لينا امشوا جيبوا السبح وتعالوا!. 2» اربعة من اصحاب الخيال اشتروا اربعة آيسكريم ووضعوا الفلوس للكاشير وقاموا جاريين الكاشير هو زاتو مصقوع قام ساكيهم بعد نص ساعة فتروا وقفوا قالوا ليه نحن ختينا ليك الفلوس في الكاونتر قال ليهم عارف انا كنت ساكيكم عايز اديكم الملاعق!. 3» مسطول سمع فنان بقلد في اب داوود عليه الرحمة قال: والله ابو داوود ده من مات صوته بقى كعب!. 4» واحد قال لحلفاوي رمضان السنة دى جاي صعب في عز الصيف قال ليهم ما من صالحوا!. 5» الحلفاوي قال رمضان حقه يبقى زي كأس العالم كل اربع سنوات مرة وفي بلد مختلف!. 6» في موقف شندي رباطابي نادى بت بتبيع في البيض قال ليها البيضة بي كم؟ قالت ليه بجنيه قال ليها لى شنو؟ اصلو جدادكم ده بيلد في الدايات!. 7» جماعة مرسي في القاهرة كونوا فريق كرة قدم وكان اهم قراراتهم: - عدم الانفراد بالمرمى الا بوجود محرم. - عقوبة الطرد كفارة كفالة يتيم. - يمنع حساب الهدف خارج الارض بهدفين لوجود شبهة الربا. - الخروج على الحكم الأجنبي جائز اذا لم يحكم بما أنزل الله. - العرقلة من الخلف «حرام» ويلزمها كفارة «صيام ثلاثة أيام». - الزام جميع اللاعبين بأداء سجدة شكر بعد كل هجمة حتى ولو لم يتم احراز هدف. 8. بتاع ركشة كاتب في ظهر الركشة اتنين ماليهم امان «الفرامل والنسوان»!. 9. واحد مفلس جابوا ليه بت سماها «غالية» تمشياً مع ارتفاع الأسعار!. 10. حنكوش اتشاكل مع صاحبه قال ليه: ان شاء الله الشمبو يدخل ليك في عيونك!. 11. صاحب خيال دخل معاينة لوظيفة سألوه: ما معنى الترتيب الانتقائي لأبجديات الهوس الايدولوجى في الوجدان الروحي؟ قال ليهم: معناها ما دايرين تشغلوني!. 12. حلفاوي في بكاء قالوا ينزلوا القرآن المجزأ وقعت ليه سورة البقرة قال لى جاره شوف حظي واقع في اصعب حاجة زي منتخب البرازيل!. 13. شايقية قالت لى راجلها: صديق انت ما صديق انت كضيب انت ما بتعرف الصدق دايماً تكذب، قال ليها: وانتي ماكي نفيسة اها نفستي!. 14. حنكوشة اهلها مغتربين ما جات السودان الا للجامعة ، صاحباتها قالوا ليه بتعرفى العتوت؟ قالت ليهم والله ما بعرفه هو قال بيعرفني؟!. خاتمة: خير الأسماء ما حُمِّد وعُبِّد، واذا مرتك ما دلعتك دلع نفسك وبي قروشك تحلى ضروسك!.