فسبكة هذا البريد الإلكتروني محمي من المتطفلين و برامج التطفل، تحتاج إلى تفعيل جافا سكريبت لتتمكن من مشاهدته (سوسو الأمورة)، (سالي العسولة)، (رانية الأسطورة)، (بت المنشية)، (بت الرياض)، (بت المعمورة)، (زهرة قاردن سيتي)،...الخ و(عييييييييك) هذه نماذج لاسماء الفتيات التي تعج بها صفحات الفيس بوك، حاولت طيلة الأسبوع الماضي في رحلة بحث مطولة ان أجد احداهن تربط اسمها باحد المناطق الأخرى وعلى أقل تقدير في العاصمة المثلثة، فلم أجد مثلاً( فاطمة بت امبدة)، ( ست البنات بت الكلاكلة)، (ام الحسن الجخيس)، قد يقول قائل (بالغت) المناطق دي الناس ما بتكون بتستخدم الفيس بوك، وهذا غير صحيح لان مواقع التواصل الاجتماعي وخاصة (الفيس بوك) يستخدم بكثافة في كل بقاع السودان عبر (الموبايلات)، وانا كشخص أقليمي وانتمي الى شندي الحبيبة التقي بافراد أسرتي عبر الفيس، وبقي عندنا عادي ذي منقة شندي بنتلاقي ونشوف أخبار البلد، وقد يقول قائل آخر (ياخ انت الشلاقة ليك شنو البوديك تفتش في اسماء البنات شنو) ودا طبعاً بكون هدفو يعمل لينا مشكلة أسرية، لكن هذه الأسماء التي أوردتها صدقوني، بتجيك في (حيطتك في الفيس)، طبعاً بما انو نحن قوم نحب سودنة الثقافات الوافدة فهذه سودنة لكلمة (حائطك). نماذج هذه الأسماء الرنانة طبعاً كلها بتحدد عمرها مابين (19-21) ، عمر الزهور عمر الغرام عمر المني، وبعضهن بل كثيرات منهن يضعن صورة ممثلة تركية ، ولثقافتي المتواضعة في هذا المجال علمت انها بطل مسلسل يسمي (بائعة الورد) وتدعى لميس ويبدو انها سحبت الأضواء من (نور ومهند)، ويبدو ان الاغنية التي يغنيها أحد الفنانين الشباب ويقول مطلعها:- لو قايله ريدتنا زي مهند ونور تبقي عيانة دايرة ليك دكتور، حسي بي تعبي واجتهادي معاك راعي لي اني ماشفت واحده سواك، سبحان من خلقك ربنا السواك رغم تعبي معاك والله جد بهواك، اعقلي شويه وبطلي الاوهام ناس مهند ونور قصه في الاحلام، عيشي في الواقع عايني لي قدام ناس مهند ونور مسلسلات وافلام، ورغم انو هواك لي فيهو دهور انت عاديه لا ملاك لا حور، يعني يامنقه انتي عايشه الدور اسي بالذمه انتي تشبهي نور، لالالا شوفي ليك دكتور، انتي قايلة الريد صورة اوتمثيل ولا قايلة الحب البعرفوا قليل، اصلوا حب الناس قدرو سامي نبيل لونصون الريد ابقي طعمو جميل، لو قايله ريدتنا زي مهند ونور تبقي عيانه دايرة ليك دكتور. ويبدو ان هذه الأغنية جعلت الفتيات ، يعدن البصر كرتين (لانو القصة جابت ليها عيا ودكتور)، وقد يأتي وضع صورة نور بنتائج عكسية، فبدلاً من ان تجذب الفتاة نصفها الآخر فانها ح(تتطفشوا عديل كده) وخاصة لو سمع الأغنية العجيبة دي، انا طبعاً بالصدفة سمعتها قبل أيام قليلة لاحد الصبية الذين يغسلون العربات وهو مستمتع بايقاعها ويؤدي في عمله بهمة ونشاط، قلت ليهم الفنان دا منو قال لي :( يا أصلي دا ماحد معلم اسمو قرقوري)، فطلبت منهم اعادتها من البداية وأخرجت ورقة وقلم ودونت كلماتها). علي العموم بعد هرب البنات من وضع صورة (نور) بعد أغنية قرقوري ، أخشى ان ينبري شاعر آخر ويؤلف أغنية من شاكلتها لزميلتها الممثلة (لميس)، وعلى البنات اللائي يضعن هذه الصور ان يتأكدن تماماً ان من تجذبه الصورة فعندما يلتقي بها وجهاً لوجه قد تكون النتيجة وخيمة عند المقارنة بين الأصل والصورة، بعد نبقي في (انت قايلة نفسك لميس تبقي عيانة وعايزة لي فحيص). ونصيحة أخيرة الي (المفسبكات) لو ماعايزة تضعي صورة الحقيقة أحسن حاجة تخليها فاضية ولا (ختي) ليك وردة أو زهرة، ان اسماء المناطق الراقية وتصغير السن (الذي يعتبر خط أحمر عند النساء) لن تجلب لك نصفك الآخر، اجذبيه بعقلك وفكرك واتزانك وليس بأبطال المسلسلات التركية.