حكاية زول أكل لحم )الوزيرة)..!!! حوار : يوسف دوكة كانت صرخة ميلاده بالقرب من البحر بالكلاكلة القبة، وعاش جلّ عمره بالقرب من) البحر)، لذلك كان من الطبيعي أن تكون مهنته مرتبطة بالبحار، فهو يعمل بنسج شباك الصيد منذ أن كان يافعا، التقينا به ينسج بدقة عالية كما تنسج العناكب بيتها ، ورمينا له شباك الأسئلة فاصطدنا منه هذه الإجابات..فماذا قال؟ *متى كانت بداياتك مع عالم البحار؟ وضع يده على رأسه ثم قال :(والله يا ولدي دا زمن بعيد.. ما بقدر أتذكر ونحنا ذاتنا ما كان عندنا شهادة ميلاد، عشان الواحد يعرف عمرو كم.. خليك من أعرف ليك بداياتي مع البحر متين.. لكن من قمنا لقينا دي شغلتنا ولينا أكتر من (70) سنة ونحن هنا. *حدثنا عن أنواج الخيوط المستخدمة في عملية نسج الشباك؟ أنا بستعمل خيوط العصب وتنقسم هذه الخيوط إلى أحجام منها 120 وهذا المقاس أكتر الأنواع البنستعملا و96,36,18,12,9,6,4,2, وبشتري الخيوط من ام درمان. *ما هي المواد التي تدخل في عملية النسج من غير الخيوط؟ القسطير والطرورو حبل 6ملي السميك؟ *هل عملية النسج تستغرق معك مدة طويلة؟ تلاتة اربعة ايام بنتهي من عملية النسج.. وبنتهي لي من ربع والربع هو 250 عين أما ال500عين مرات بتعدي معاي أكثر من أربعة أيام وهذه الفترة طويلة ليس معناه أني بطيء في الشغل لكن المجاملات الكتيرة. *طيب سعر الشبكة كم؟ زمان كان رطل الخيط ب10جنيهات والآن مع ارتفاع الأسعار أصبح الرطل 20 جنيها وأنا بشتغل الشبكة بحسب سعر الرطل.. يعني لو جبت لي رطل 20 بعمل ليك الشبكة بعشرين على حسب كمية الخيط. *هل توجد مواسم لبيع الشباك؟ زي ما في موسم لصيد الأسماك من الطبيعي أن يكون في موسم للشباك وموسمنا من شهر7 إلى 9وفي هذه الشهور الشغل بيكون مزدهر وفي فصل الشتاء بنشتغل بعصب نمرة 4 والخريف نمرة 36 عشان الخريف فيه السمك (العجالى( يعنى السمك الكبار. *متخصص شباك صيد فقط أم لشباك كرة القدم نصيب ؟ يا زول دا كلامك..!!! أنا شباك رابطة الكلاكلات بتاعت الكورة دي كلها عملتها وعملت شباك لولاية الجزيرة وأقول ليك كلام أنا شباكي فاتت أبعد من ذلك وحصلت لحدي مدينة نيالا. * هل يوجد اختلاف في شباك الكورة والصيد؟ في اختلاف في العقدة ، شبكة الكورة فيها 100عين وشبكة السمك فيها 250 عين ويوجد اختلاف في الحجم والاختلاف التاني دي برمائية وبتاعت الكورة صحراوية. *ما هي مهنتك الأولى.. نسج الشباك أم صيد الأسماك؟ أولا أنا (حواتي) بالفطرة ..واتعلمت النسج بعد ما اتعلمت الصيد يعني الصيد دا نحنا عندنا في الأسرة مهم وشي لابد منه. ما هو الفرق بين الشغل زمان والشغل الآن ؟ زمان الشغل كان جميل وكتير.. لكن هسع اختلف كتير وأصبح قليل.. وزمان الصيادين بالحساب.. لكن هسي اي زول ما عندو موضوع عايز يجي البحر يصطاد عامل فيها) رامي الصياد الصغير).. ويا حليل زمن الصيد زمان كنا من موج البحر بنعرف كمية السمك. *حدثنا عن مغامرات الصيد؟ انا زمان مشيت بالمركب من الكلاكلة لحدي ملكال.. واستغرقت هذه الرحلة شهرين وبعدها مشيت لحدي حدود الحبشة والزمن داك كان كان اول تمرد في الجنوب وانا البحر الازرق (لفيتو لف). *هل هذه المدة الطويلة كانت رحلة ام تجارة؟ تجارة يا ولدي رحلة شنو البنمشيها في شهرين..؟؟ انت قايلنا كنا فايقين لدرجة نمشي رحلة..؟!! نحنا كنا بنصطاد السمك ونقوم نبيعو والزمن داك القروش ما كتيرة وبنعمل (مقايضة) يعني بدل نديهم سمك بيدونا بن ودمورية.. ومرات شاي حب لكن بنبيع السمك الاخضر يعني السمك الجديد سمك يفرفر بنبيعوا للناس البكونوا جنب البحر وانا من تحركي من الكلاكلة في تلك الفترة ما جيت راجع إلا بعد عشرين سنة. *حدثنا عن موقف طريف حصل ليك في البحر؟ ابتسم ثم قال) :مرة بالليل كنا بنصطاد وحسينا ليك بالشبكة تقيلة، قلنا خلاص الليلة دي ضربة سمينة وقعدنا نجر ونجر قريب 10دقايق.. وبعد ما رفعنا الشبكة وولعنا البطارية لقيناهو (جنا قرنتية).. وقبل ما نطلعوا من الشبكه أمو جاتنا.. وبقينا متججهين.. كان فكيناهو من الشبكة بينتهي مننا.. ولو خليناهو امو ما بتخلينا ..واقتربت منا (القرنتية) وضربت المركب بسنها لمن إتكسر السن في المركب ...وقام واحد اسمو عبد الله قسم السيد قطع الشبكة بطريقة زول معلم وجدعا في البحر وأتحلينا من هذه الورطة بمزاج. ما حصل لقيت تمساح؟ إستعدل في جلسته ثم قال : التماسيح الشفتها في حياتى إمكن تكون أكتر من الناس الشفتهم..!! نحنا قبضنا تماسيح كتيرة في البحر. وعلى فكرة لحم التمساح اجمل منو مافي.. ونحنا الصيادين ما بناكل التمساح كلو.. بناكل لحم (الوزيرة) بس.. والوزيرة هي رجلين التمساح و(ضنبو) والحتة دي بتكون ما فيها ريحة كريهة... ومرات في تماسيح بنلقى في بطنا فضة.. ومرات دهب ومرات تلقى ليك زول عديل كدا.. ودا بيكون لسه ما إتهضم.