كان ذلك (الجندب) يعشق (نملة السكر) بصورة غير طبيعية، بالرغم من نصائح اصدقائه بأن (يكسب زمنو)، ويبحث له عن محبوبة اخرى، لأنه وبحسب آرائهم (مفلهمة)، ولايعجبها العجب، ولا (هيثم مصطفي ذاتو)..! ولكن لأن (الحب غلاب) تمسك (الجندب) بحبه لنملة السكر ورفض كل مقترحات اصدقائه بالابتعاد عنها، بل وظل يتسكع يومياً في حله النمل عساه يراها ولو صدفة، أو ربما يلمحها وهي (تكشح مويه عِدة) على عتبة باب جحرها..ولاسبوع كامل ظل (الجندب) على تلك الحالة، حتى جاء اليوم الذي ضبطه فيه اخوان النملة، واوسعوه ضرباً و(عضاً) مبرحاً، وحذروه من مغبة العودة لمضارب جحورهم مرة اخرى، ليعود (الجندب) إلى منزله وهو يجرجر قدميه في اعياء تام، ويقوم بطرق باب منزله بوهن شديد، لتفتح له الباب والدته والتى ما أن رأته على تلك الحالة حتى صرخت بأعلى صوتها: (وووووب علي...وووووووووب)...لتتجمهر كل الجنادب داخل المنزل، وهم يسألون عما حدث، وبعد ان اخبرهم (الجندب) بالقصة، قرروا أن يقوموا ب(غارة) سريعة على مضارب جحور النمل، ويعيدون كرامة ابنهم التى سلبها اولئك (القوم)، لكن اكبرهم سناً إعترض على الفكرة وقال لهم بعد ان وضع يده على (قرني استشعاره): (شوفوا يااخوانا..نحنا ماعايزين نشيل وش القباحة مع الناس ديل..وبعدين ولدنا غلطان..يعني مافي داعي يحوم في نص الحلة بتاعت الناس ديل ويشاغل بناتهم..وانا في رأيي نحنا نمشي عديييييل ونتقدم لي بتهم دي..ولو رفضونا بعد كدا العايزنو اعملوهو). وجد مقترح كبير (الجنادب) القبول من كل المجتمعين، لذلك فقد قرروا ابتعاث وفد (رفيع المستوى) إلى مضارب جحور النمل، لطلب يد ابنتهم رسمياً للجندب العاشق الولهان، وبالفعل تم تكوين الوفد الذى تحرك صوب مضارب النمل، وقام بطلب مقابلة (ملكة النمل) والتى كانت في ذلك الوقت، تخضع لعملية (ساونا) بأحد كوافير التجميل داخل احد الجحور، وماهي الا دقائق حتى وصلت الملكة وجلست مع الوفد و... * طبعاً انتي عارفة ياسموك إننا ماقاصدين شر. * اوكي..وبعدين.؟ * والله نحنا جينا الليلة نطيب النفوس ونبقى (اهل). * اهل..!! كيف يعني.؟ * يعني بالمختصر المفيد عايزين نطلب يد بتكم النملة لى ولدنا الجندب. * تطلب شنو.؟ هههههههههههههههههههههه. * ما اظن في حاجة بتضحك ياسموك. * كيف مافي حاجة بتضحك..إنتو عارفين نحنا طلباتنا شنو.؟ * ماعارفين لكن اي حاجة نحن جاهزين ليها. * اوكي..نبدأ بالشيلة..وطبعاً نحنا عايزنها (100/100). * لكن المية مية دي ماكتيرة.؟ * والله تتصرفوا..تمشوا سوق ليبيا..تمشوا سوق سته..البريحكم غايتو. * موافقين..اها وتاني. * تاني عايزين مهر (500) الف دولار. * كم..؟؟؟؟ * السمعتوهو ياجماعة. * لكن ياسموك انتي ماعارفة (الدولار حرروهو).؟ * والله حرروهو..(ربطوهو)..أنا دا كلامي..وتاني حاجة ماتنسوا (ركشه) اخو العروس..و(موبايل) أم العروس..و(جلاليب) ابو العروس..و.... * يازولة هوي..نحنا جايين نعرس (العيلة) كلها ولا شنو..؟ * خلاص يبقى تورونا عرض اكتافكم..وماعندنا نملة للعرس. * ياخي في ستين..هو دا ذاتو نسب (يعّر). شربكة أخيرة: بعد ايام قلائل خرجت كل الجنادب في ثورة ضخمة للإطاحة بنظام الحكم في مملكة النمل، بينما رفع الجندب الصغير لافتة كتب عليها بالخط العريض: (العرس بالفاتحة ياناس ماحلال..؟؟). /