كل عام والجميع بألف خير و(خابزين) الكعك والبسكويت والبتي فور لكن الأيام الأولى دي ما تكتروا فيها من أكل الخبيز لأنو بعمل(...).. والبطن ما بتكون متعودة على الأكل الكتيرمن الصباح لأنها صايمة ليها شهر وطبعاً شاي الصباح بالنهار الناس (نستو عدييييل). * السنة دي السوق (مولع نار) لكن زي ما عملت الحكومة انت برضو أعمل.. اتقشف.. بس إياك تتقشف شديد لمن كمان تقوم (تتقشف) بالجد من الدنيا كلها...وحاول قلل بس...يعني لو ما متزوج وعزابي (زي حالتي دي).. اكتفي بهدوم السنة الفاتت وعيد بيها.. ولا أقول ليك شي ..اشتري بنطلون ولا قميص.. أما لو كنت متزوج وعندك كم طفل فانت أصلاً متقشف يعني ما محتاج لأنو ما ظنيت بتفضل ليك قروش من طلبات المره وطلبات (الشفع)... العيد دا قول للمدام "عيدي بالتوب الجديد الجبتو ليك قبل شهر لعرس أختك" أما الأولاد نقوم (نجازف ليهم).. لو حتى نتدين لأن العيد وزي ما بتقول حبوبتي (عيد الشفع).. أما لو قلت ليها ما عايزين خبيز السنة دي ولا ماعايزين ملايات (فشيل شيلتك) وأقول ليك شي لو قلت ليها كده أمشي عيد عند ناس أمك سااااكت . * الرحلات طبعاً في الأعياد دي مهمة شديد للشباب (برنامج وكدا)... لأنو زي ما عارفين بعد صلاة العيد والفطور والمعايدة العيد بكون انتهى للكتير من الشباب وعايزين يغيروا جو فالرحلات دي مهمة شديد، ما بالضرورة تشيلوا معاكم خروف لأنو أقل خروف حصل (800) جنيه و(الشيرينق) بكتر عليكم وما بتقدروا عليه ونصيحتي ليكم (اكتفوا بسلطة أسود) وخليكم (نباتيين لحدي ماترجعوا) . * أما لو كنت (خال) أو (عم) زي أخوك الكاشف وعندك أطفال إخوانك وأخواتك أو حتى أولاد خالتك أو خالك صغار ومتعود تديهم العيدية.. المرة دي كتر من الفكة (أبو خمسمية).. (صر ليك صرة كبيرة) وأمشي عيد عليهم مطمئن.. وكل ما يجيك شافع (لصق) ليه خمسمية حديد، وقول ليه دي عيديتك اشتري بيها حاجة حلوة. * أما فطور اليوم الأول في العيد فزمان التجهيزات ليه زي فطور العريس (جادي ما قاعد أبالغ)... فهو فطور مدنكل يحتوي على اللحوم والسجك والفراخ والكبدة والسلطات والحلويات بأنواعها والشعيرية والسكسكانية والفطيرة، بل البعض يحرص على تجهيز السمك..أما الغداء لو جوك ضيوف فما في حل غير (الفتة)..دا طبعاً كان (لقيت ليها لحمة) وكان ما لقيت فعليك ب(عدس إيمان لندن)... وماتقول لي أحلى منو مافي.. وكان جاتك (مليشيا) حلة بتكفيهم.! * وطبعاً أيام العيد الناس قاعدة... مافي برنامج غير الأكل والنوم ومشاهدة التليفزيون... وفي الحالة دي استهلاك الكهرباء بيزيد لأزم تكون حريص وتتابع كل ما يطلع زول يخلي التليفزيون فاتح لازم تقفلوا لأنو بصرف وكذلك المروحة والمكيف خليك بس (ديدبان) تتابع وترصد وتتصرف وتتدخل في اللحظات الأخيرة. أما لو عندك مكيف (إسبلت) ولا (فريون) في الصالون وجوك ضيوف يعيدوا وضربهم السقط وناموا في الحالة دي انت تستأهل القال ليك جيب مكيف إسبلت منو ؟؟ * طبعاً ناس البيت ما حايخلوك في حالك.. وعايزنك توصلهم يعيدوا على خالتهم في الحتة الفلانية وعمتهم في الحتة الفلانية وكل مكان يبعد من الآخر (كذا سنة ضوئية).. والبنزين زي ما عارفين غالي أقول ليك شي وصلهم أقرب واحد ساكن قريب منك و(كب الزوغة) لكن كمان لو عملت حكمة البصيرة أم حمد جيب ليهم (اسكراتشات) خليهم يعيدوا معاهم (نضمي ساااي) يكون أحسن ليك. * أخيراً.. ناس حماية المستهلك قالوا الغالي متروك بس يا جماعة الخير العيد ده مرة في السنة... نخلي الحاجات السمحة عشان غالية وما نفرح بالعيد ونلبس ونأكل الخبيز الكلام ده مابجي... هوووووووي العندو قروش أصلوا ما يبخل ويبحبحها على نفسو وأهلو و...(الرهيفة التنقد).!