في عهد جمال الوالي ..(قبل الاستقالة).. كان جوز الحمام فيه (3) فردات عند المريخاب. ولا في زول بقدر يقول غير كدا. الحمام ذاتو كان (محشي)...وهو طاير. محشي بالرز في سماه. زمان كان ايامكم (باسطة)...كان المريخ وقتها متعاقد مع المحترف (اديكو) بمرتب (10) الف دولار في الشهر. تقول محاضر في (اكسفورد). اديكو دا ...كورتو في (كنبة) مريخ الفاشر مابتقعدو ...كان بيأخذ مرتب من المريخ (10) الف دولار. انا ما عارف العشرة دي في شنو؟. والله العشرة دي في (الفانلة) مفروض ما يلبسها. دا (اديكو) ..اقل المحترفين مستوى في المريخ ..واضعفهم راتبا...كان في الشهر بيأخذ 10 الف دولار. ناس الحضري ...ال (10) الف دولار بيأخدوها في غرفة اللاعبين قبل أي مباراة. الحضري لو ما قبض (10) الف دولار ..ما بنزل الملعب. الكلام دا طبعا زمن جوز الحمام فيه (3) فردات في المريخ. حليل الحمام هسع. نحن مع الامين البرير دا ..عايشين في (تقشف) في الهلال حتى قبل الناس ما يعرفوا (التقشف). جوز الحمام في الهلال (فردة) واحدة. من قمنا ..لقينا الوضع كدا. ما علينا ..حمام الهلال ما عاوزين نتكلم عنو. خلونا هسع مع (اديكو)...مرتبو كان 10 الف دولار ...(وقاعد في الكنبة). لكن اديكو برضو افضل من وارغو القاعد في بيتو ..وبيظهر في المريخ يوم (27) من كل شهر ...عشان يشيل المرتب ..ويرجع يقعد في البيت. المريخ كان زمن جمال الوالي (جوز الحمام فيه 3 فردات) ...كان فاتحها (تكية). اديكو بيأخذ 10 الف دولار. ليه؟. تقول (سقراط). هسع المريخ اتعاقد مع المدرب التونسي محمد عثمان الكوكي ب (8) الف دولار فقط. مدير فني ..مرتبو 8 الف دولار. مرتب الكوكي دا ..جمال الوالي بي استقالتو ..ممكن يحولو (رصيد) من تلفونو للكوكي. دي ولا حاجة بالنسبة لجمال الوالي ...الجوز الحمام عندو 3 فردات. يا دا جوز الحمام العذبتنا بيه عذاب. لاحظ ان مرتب ريكاردو حسب ما نعلم كان 30 الف دولار...هذا المبلغ كان بدفعه جمال الوالي من غير ما يتلفت. وبدفعو كمان من يوم 27 في الشهر. مرتب ريكاردو كان عند جمال الوالي زي (الاسكراتش) البتنزلو انت ب (10) جنيه في تلفونك. ما فارقة معاه. حليل زمن الحمام ..والتورتة ..والطيارة الخاصة في المريخ. حليل زمن الموية الباردة ..وموية الصحة ..البتكون حول الميدان من اتجاهاتو الاربعة. حليل زمن القون بيجيبو (كلتشي)..بصفقو لي جمال الوالي. يعني ريكاردو بساوي الكوكي قريب للاربع مرات. ريكاردو بساوي (4) كوكي. مدرب اللياقة في المريخ كان بيأخذ 8 الف دولار ...هسع في زمن (التقشف) دا ..بقى المدير الفني بيأخذ 8 الف دولار. والله (النفط) دا فرق معاكم شديد يا مريخاب. قفلة بلف النفط ..ظهرت في حافز اعادة قيد بلة جابر. بلة جابر ..ما عندو مشكلة ...ممكن يتحمل (التقشف) الحصل على (البوفيه) دا. قالوا ليك (البوفيه المفتوح) فجأة كدا ..قلب (عدس). لا كبدة ..ولا فراخ مشوى. عدس بس. والعدس ...ذاتو لو ما جيت بدري ..بتلقى ناس (اديكو) ديل ..ما خلوا فيه حاجة. وعدس المريخ كمان ما بتاكل. عدس ...وفي المريخ كمان. بلة زي ما قلت ليكم ما عندو مشكلة ...الكلام عصام الحضري. عصام الحضري ..ما بقدر على (التقشف) دا. ولا بجاملكم في (البرد) دا. عصام الحضري التقشف في مصر ..ما استحملو. في الاهلي (فريق القرن) ما قدر عليه. معقولة يستحملو ليكم هنا في البلد دي. الجابرو شنو؟. عصام الحضري طالب بتنظيم (مسيرة) او قل مظاهرة من قبل جماهير المريخ تسهتدف منزل جمال الوالي من اجل اجباره على سحب الاستقالة. الحضري عرف ليك الموضوع بدون جمال الوالي ما بمشي لي قدام. مرتبو بكون في تلتلة. عشان كدا ..قال اعملوا مظاهرة عديل كدا تطالب بعودة جمال الوالي. الحضري ما بقدر على (عدس) عصام الحاج دا. عدس (قدحة) ما فيه. عصام الحاج ..لو بالغ كدا ..بقلب ليكم في العدس ..(زيت) كبدة. زيت ساكت ..ما تعشموا في (الكبدة) ذاتها. الكبدة دي تاني في المريخ ما بتشوفوها إلا من العيد للعيد. انتوا ما عارفين البلد عائشة في (تقشف). عصام الحاج ...لو عاوز يستمر مع مجلسه في ظل هذا التقشف ...وقفل بلف النفط ..الا يقنع مجلس ادارة المريخ ...(ما تبقى منه) للذهاب للدهب. ما عندكم حل ..غير تمشوا (قبقبة). يمكن الله يفتحها عليكم. امشوا فتشوا الدهب ..ونقبو عنو ...اصلو الموسم واقف. يمكن تلقوا ليكم (دهيبات) كدا ...تسجل ليكم لاعب من سيكافا. ألحقوا (السوق) يا عصام الحاج. باقى القريشات الكانت موجودة في المريخ ...اعادوا بيها تسجيل موسي الزومة وسعيد السعودي. عليكم الله هسع في (التقشف) دا ...موسى الزومة ...عاوزين بيه شنو؟. لزومو شنو موسى الزومة. كان قروش موسى الزومة وراجي وبلة جابر وسعيد السعودي ومصعب عمر ..تلموه وتسجلوا بيها (محترف) زي الناس. المشكلة ..القروش الكانو منتظرينها في اطلاق سراح كلتشي للاحتراف في الصين ...طارت. الامل الكان بتفاصح بيه عصام الحاج ...انتهى. غايتو مريخاب الخرطوم في ظل هذا التقشف ...إلا يتحولوا ويشجعوا (مريخ الفاشر). حولوا لي مريخ الفاشر ..قالوا جاء (مريخ)...قادر ..وامكانياتو كويسة ..ما شغال بالتقشف الحاصل في البلد. ناس مريخ الفاشر ..عندهم برضو (والي) كبير. والي اسمو (كبر). احسن ليكم مريخ الفاشر. مالكم ومال (الجهجهة). ولو كان مشكلتكم فيصل العجب ..يا سلك ...ممكن تحولوا فيصل العجب ..لي مريخ الفاشر...عشان الموضوع ما يبقى ليكم غريب. وممكن نخليكم تقولوا لمن مريخ الفاشر يتغلب ...(نهواه في كل الظروف). وما عندكم أي مشكلة يوم الهلال يغلب مريخ الفاشر 8 / صفر ..تقولوا : (أي دمعة حزن لا لا). اصلكم متعودين على الكلام دا. مريخ الفاشر ...خطف لاعب من المريخ. مريخ الفاشر ..شال محمد الجيلي عبدالخير من المريخ (الاب). دا كلام يا جماعة. خلاص المريخ الاب ..ما عندو حاجة. بعدين ..الدوري الممتاز حقنا دا ..ما بستحمل غير مريخ واحد. واظن كدا ..مريخ الفاشر ..عندو قدره اكبر من قدرة المريخ الاب. وإلا اقول ليكم. عندي ليكم حل تاني. اعملوا ليكم (دكاكين) في استاد المريخ ..زي دكاكين الامين البرير في استاد الهلال. هسع لو عندكم (دكاكين) يا ناس المريخ ..موش كان مرقتكم من (الورطة) دي. ساكت كنتوا يا مزمل ابوالقاسم ..بتسخروا من (دكاكينا). الدكان الابيض ..لليوم الاسود. لو (الدكاكين) صعبة عليكم يا ناس المريخ في ظل هذا (التقشف)..اعملوا ليكم (طبليات) ساكت. الطبليات ...ممكن تفك ليكم ...حيرتكم دي. على الاقل كدا ..الطبليات دي ممكن تطلع ليكم ...مرتب الكوكي. الكوكي دا ..مرتبو من ايجار طبليتين ممكن يطلع. باقي (الطبالي) خلوها لي فاتورة الكهرباء. اها يا جماعة قصرت معاكم. عليكم الله ..هسع دي ما حلول ..بدل تقعدوا (تتكسروا) كدا في استقالة جمال الوالي. الزول دا تاني ...ما برجع. اقنعوا منو ساكت ..وشوفوا (طباليكم) وين؟. التسجيلات قربت تنتهى ... وانتوا لي هسع ...تجمعوا في حافز تسجيل بلة جابر. بلة جابر ..قالوا حافز تسجيلو ...تموه بي (تلاجة) كانت في النادي. الجماعة ديل بعد استقالة جمال الوالي بقوا يبيعوا في (التلاجات). التلاجات يعملوا بيها شنو؟...طول ما بقى ما في حاجة لكسير التلج. الواطة ذاتها باردة..يعني ما في أي داعي للتلاجة. بس يا عصام الحاج ..وصية ليك مني ....ما تفكوا (التلفزيون). التلفزيون بتحتاجو ليه في الموسم الجديد. التلفزيون اهم ليكم من موسي الزومة. ما تدفقوا مويتكم ساكت على الرهاب. لو عاوزين تشوفوا الحال وصل وين في المريخ ...بكرة الجمعة امشوا دلالة السوق الشعبي. ح تلقوا عصام الحاج ..عارض ليه (طبق). وح تلقوا ابراهومة عارض ليه (ديجتال). واديكو عارض ليه (خاتم). ووارغو في جامعة افريقيا ..بلقط في قروش التذكرة. غايتو لو مشيتوا الدلالة بكرة ..ح تلقوا ناس المريخ كلهم هناك. بس اوعكم من الكسر. ملحوظة : والله نحن لو عارفين (التقشف) بعمل فيكم كدا ..كنا طالبنا بيه من سنة 89. هوامش التقرير الفني حق غارزيتو ...طلع اول مشطوب فيه معتز رابح. دي ساهلة عليك يا غارزيتو. اها بعد معتز رابح. سامي عبدالله عاد للهلال بعد مواسم جيدة لعبها سامي من الامل العطبراوي. بعض المصادر ..اكدت ان هناك محاولة تخريبية كان يفترض ان تكون اليوم ..متمثلة في شطب هيثم مصطفى حفظه الله ورعاه. لكن شفوت الهلال ..كشفوا ليك (ساعة الصفر). سادومبا ..فلت من الهلال ...ودي خسارة كبيرة على الهلال. كنا نتمنى استمرار سادومبا في الهلال. على الاقل سادومبا ..مجرب ..وفترته في الهلال كانت اكثر من رائعة. طبعا ما ممكن تقنعونا ان التقرير الفني حق غارزيتو ..قال ما تعيدوا قيد سادومبا. لو غارزيتو قال كدا ..يبقى فعلا ما بشوف. لا بشوف ولا بسمع ..لو دا تقريرو. الموسم الجديد ..ربما يكون كارثي على الهلال ...وهو بالتأكيد كارثي على المريخ بعد استقالة جمال الوالي. الله يستر. ذهب معتز رابح ..ويوسف محمد وفلانتاين ...على ادارة نادي الهلال الالتفات للطراف. ادارة نادي الهلال مركزة الان في الدفاع. ونخشي ان يكون التركيز على الدفاع على حساب الاطراف. وبعد ذهاب سادومبا ..يبقى حاجة الهلال للاعب سوبر في الهجوم امر لا بد منه. فكينا سادومبا ..المضمون ..وقعدنا نكويس. يا الكاريدنال ..شوف لينا موضوع (سادومبا) دا. نحن البرير في الحتة دي قنعنا منو؟. ماذا عن عمر بخيت؟. عمر بخيت مازال في الانتظار. وقد انتظر (المعلم) كثيرا. انتوا لقيتوا جمال الوالي دا استقال ..وقعدتوا تتاقلوا. اهلي شندي ..يمكن يدخل طرف. وهذا للتنبيه فقط. عاجل : المريخ بدون جمال الوالي بقى لا عندو دفاع ...لا هجوم. وإن طال السفر - صحيفة قوون
