وضع عباس يديه خلف ظهره وهو يقف أمام والده بينما كانت قدمه اليمني تهتز في توتر واضح، مما جعل والده يصيح بوجهه قائلاً: (يا ولد..بتهوزز في كراعك كدا زي سلك الجنريتر مالك.؟)..ليغير عباس من وقفته تلك ويضم ساعديه الى صدره بينما عيناه معلقتين بسقف المنزل، دقائق مرت على ذلك المشهد، حتى ازاح والد عباس نظارته من عينيه وتطلع الى ابنه في هدوء قبل أن يقول له: (اها..وداير تعرس منو يالفالح)...فرك عباس رأسه بيده بعصبية قبل أن يقول في توتر: (داير اعرس فاطمة بت حاج أحمد)...هنا اطلق والد عباس شهقة عالية قبل أن يقول في دهشة: (واشمعنا بت ناس حاج أحمد...يعني الحلة دي كلها مالقيت ليك بنية تصاقرا غير بت الراجل الجنو مشاكل دا.؟)...هز عباس رأسه ببلاهة غير عادية قبل أن يقول في توسل: (ياابوي ياخي عليك الله شيل فكرة حاج أحمد دي من رأسك..انا داير اعرس بتو..يعني....)...هنا قاطعه والده وهو يمسك بذلك الابريق المقدود من (دبر) قائلاً: (شوف ياجنا...اهلنا قالوا زمان العز أهل..وأنت زول سجمان ورمدان..ماهيتك مابتقعدك براك لحدي يوم خمسة..كمان داير تجيب ليك ولية.؟)...ارتمى عباس في تلك اللحظة بالعنقريب المجاور لعنقريب والده قبل أن يقول: (ياابوي والله انت ما فاهم حاجة الناس ديل قالوا لي نحنا بنشترى راجل)...هنا ارتسمت على وجه والده ابتسامة باهتة قبل أن يقول في سخرية: (هم بشتروا راجل...وأنت حتشتري شنو لي مرتك عشان تأكلا..؟). ثلاثة ايام وعباس يقنع والده بأن (فاطمة) بت (هدية ورضية)..وليست لها اي طلبات، كما أن اهلها ناس (على قدر حالهم) يعني لا شربوا (البيبس) ولا أكلوا (الشيبس)..وبالفعل..استطاع اقناع والده بتلك الزيجة، لتعم الافراح ديار الاسرتين، وبعد عقد القران مباشرة، انحنى عباس على رفيقه وصديقه الوحيد (حسن جلطات) وقال له هامساً: (يا حسن..ما اوصيك على الكشف..عليك الله البنسى ذاااتو تذكروا...انت عارف اخوك قافل عليهو بي كرت)...ويهز حسن جلطات رأسه الكبير ب(عوارة) قبل أن يجيبه برده المعهود: (ولا يهمك يا ود الخالة..ارقد قفا). ولأن عباس (على قدر حالو) اختار أن تكون (عزومته) متأخرة جداً، (يعني قريب المغرب كدا)..وذلك لكي يستطيع أن يوفق في توزيع ال(50) صينية التي (لتقها) بعد معاناة طويلة، وبعد مشاكل لا اول لها ولا آخر مع ذلك الطباخ الذي جلبه له اصدقاؤه، والذي كاد أن يؤدي بحياة عباس بعد أن اقترح عليه أن يقوم بتصميم العزومة (كوكتيل)، ذلك المقترح الذي رفضه عباس بشدة واختار أن (يعمم) المسألة ويشتت انتباه المعازيم بتلك الصواني التي تسيطر عليها (الرجلة) و(البامية) وتتوارى خلفهما خجلاً (حِتة ضلعة). انتهت العزومة...واصبح المعازيم يغادرون واحداً تلو الآخر بينما كان (حسن جلطات) في الموعد، وهو ينادي بأعلى صوته حاملاً كراسة الكشف : (شنو ياحاج عثمان مارق سااااكت كدا..ما تجي علينا جاي)...أو في نداء آخر: (ياعم بخيت..تعال بي جاي..إن شاء الله ابصم لينا سااااكت في الكراس دا)...وهي طبعاً اشارة لحاج بخيت الذي لم يتلق تعليماً في حياته..وهكذا مضى اليوم بسلام... وقام اولاد الحي بإنزال الصيوان (الملتق) الذى استلفه عباس من محل للمناسبات بجوارهم بعد أن تعهد لصاحب المحل بتسديد اتعابه فور انتهاء العزومة، ورهن لديه بطاقته الشخصية وعشرات (الحلائف). شربكة اخيرة: ما يتسحق أن نذكره لك عزيزي القارئ أن عباس بعد نهاية العزومة سقط مغشياً عليه، بعد أن زاغ حسن جلطات ب(كشف العزومة)، وحقق بالفعل ما قاله له قبل ذلك وهي عبارة: (ما تخاف ياود الخالة..ارقد قفا)...وبالفعل رقد عباس (قفا)..!!