في الفاصل الثالث الفنان غنى اغنية ابوعبيدة حسن (الجنني).
يا ربي قاصد (انبوبة الغاز).
قاصد (البنزين).
قاصد (الرغيفة).
اقول ليكم حاجة ..نحن اضايقنا هنا ..وحسينا بالرهبة ..قعدنا نتلفت زي الروس.
عليكم الله ..لو ما ساي ..هسع (الروس) بتلفتوا...(ما تقطع لينا كلام من رأسك).
الحكاية دي بقت ظاهرة.
الفاصل الرابع ...عارفين الفنان غنى شنو؟.
غنى (كان جنيت أنا ما ملام)..اغنية ود البكري.
هي حصلت!!.
ما ملام كيف يعني؟.
قلنا الله ...الزول دا قاصدها ولاّ شنو؟.
معقولة الفنان دا اعقل اغنية غناها (القربو يحنن والبعدو يجنن الهين ولين شغل بالي).
الحفلة دي مالها كدا؟..نحن ذاتو ما ناقصين.
تشككوا الواحد في رقبتو.
الفنان دخل في الفاصل الخامس.
غنى شنو؟.
غنى (قالوا قالوا علي شقى ومجنون...إن شاءالله اجن وازيد في الجن).
قلنا لا ..الفنان دا قاصدنا عديل ..انت عاوز تجن يا اخوي اكتر من كدا تمشي وين؟.
في واحد معانا حريف في الحفلة ..قال يا جماعة الحفلة الكلها (جن) دي ..احسن ننسحب منها واحد وراء التاني ...ما نطلع كلنا سوا ..عشان ما تبقى ظاهرة...ننسحب واحد وراء التاني.
في واحد فينا قال باركو للعريس واطلعو ...(يشوف وشنا بس).
شوية كدا شفنا ليك (العريس) دخل الصالة في (كارو)..والعروس بتكد ليها في (دومة).
قلنا إن بقى كدا ..الحكاية بايظة من (عريسها).
بعدين العروس دي جات من الكوافير ولاّ جات من (الدافوري).
عاملة كدا زي (التريس) في اخر اللعب.
باك بس.
مشينا على الفنان وقلنا ليه لو ديل عرسانك يا اخوي غنى ساكت...شابكنا من الصباح (إن شاءالله اجن وازيد في الجن)...انت تزيد في الجن اكتر من كدا تمشي وين؟...بعد كدا إلا تطلع عمود الكهربة القدامنا دا.
جن هو ولاّ فول البتزيد فيه دا؟.
هسع حفلتك دي طلعت ليها تصديق من وين؟.
من النظام العام ولاّ من التجاني الماحي؟.
خلي التصديق...انت خريج (مستشفى المجانين) ولاّ معهد الموسيقى والمسرح؟.
عامل كدا زي (الصينية) البنتهي منها الرغيف في اول (5) دقائق.
قبل ما نطلع ...من الحفلة ..لقينا لينا واحد ما شغال بالحفلة ..قاعد في كرسي بعيد ...ومركب سمعات في اضنينو.
قلنا بس...دا الزول الوحيد (العاقل) في الحفلة دي.
مشينا عليه ..قلنا ليه انت مالك قاعد هنا براك؟. زي فرشة الاسنان في المزيرة.
قال لينا ..قلت اطلع من الحفلة الكلها جن في جن دي..بالله الحفلة زي (عنبر المجنونات).
قلنا ليه والله نعمة ما عملت.
لكن انت هسع بتسمع في شنو؟.
قال لينا بسمع في اصالة نصري.
واصالة بتغني في شنو؟.
اصالة بتغني في (يا مجنون موش انا ليلى).
بطنا طمت عديل.
اتصدمنا.
الامل الوحيد لينا في الحفلة دي ...طرشق.
طلع (ماسورة).
قلنا نطلع ...ونتخارج من الحفلة دي.
الظاهر الحفلة دي حفلة بعد رفع الدعم من المحروقات.
ابو العروس ...جانا ..قال لينا ما بتطلعوا لو ما اتعشيتوا.
قلنا ليهم دي اول مرة تحصل.. في صحن كوكتيل بعملوا فيه (بامية مفروكة).
باميتكم المفروكة دي ما عاوزة ليها (كوكتيل).
ما مستاهلة التعب دا.
دي الحكاية كدا تبقى مخططة ...ومدبرة...ومقصودة كمان.
نحن حفلة زي دي لا بنقعد فيها ولا حاجة ...خارجونا يا جماعة.
بامية مفروكة!!.
نحن في حفلة ولاّ في بيت عزابة؟.
نحن في (داخلية) نحن.
دا شنو البتعملوا فيه دا؟.
ليه الاعراس ادهورت بالشكل دا.
البامية المفروكة بقوا يجبوها في الاعراس..وفي كوكتيل كمان.
البامية دي في السماية زمان ما بتظهر.
يعني لو قعدنا شوية ...ممكن صحن الكوكتيل يجيبوا ليك فيه (سليقة).
سليقة ساكت.
دا كلو ما بحلك.
ادخل لينا في الموضوع.
المريخاب!!.
المريخاب مالهم كمان؟.
المريخاب ما كفاهم (البترول).
وما كفتهم الحكومة.
وما كفاهم الاتحاد العام ...معتصم جعفر ..رئيس الاتحاد العام لكرة القدم ...متعصب للمريخ اكتر من خالد ليمونة.
وكمان مع دا عاملين ليه (3) مساعدين.
لي شنو؟.
عشان يحللوا الحكاية للمريخ.
الاتحاد العام من معتصم لي اسامة عطا المنان كلهم مريخاب ..(من كمال دحية وانت ماشي لي غادي).
المريخاب ما كفاهم الحكام بالحسبوا ليهم في الاهداف التى تأتي من تسلل واضح.
ما كفاهم فيصل سيحة بتاع لون النجيلة.
وما كفاهم طمبل ..وكلتشي والباشا واكرم وريتشارد وعلاءالدين طيارة ومجاهد.
ديل كلهم ما كفوهم.
ما كفاهم هيثم مصطفى.
المريخاب عاوزين (صلاح ادريس) كمان.
عاوزين ليهم رئيس ينافس جمال الوالي.
جمال الوالي دا نزل في الانتخابات (10) مرات ..ما لقى زول نزل معاهو.
قالوا شنو؟.
قالوا يجيبوا صلاح ادريس إن شاءالله في مجلس الشورى.
انت يا الامين العام لمجلس المريخ (اللورد السابق) الما عارف اسمو ..صلاح ادريس لو جاء مجلس الشورى بتاع المريخ ...اول حاجة بعملها ..بحولك يا طارق إلى نادي النسور.
عشان تنزل معاهم من الممتاز.
عامل نضارتك الما بتشوف بيها غير (بله جابر) دا.
هسع بله جابر دا عاوز ليه (نضارة).
كورة ناس بله جابر ديل الزول مغمض بشوفها.
عامل ليك نضارة في الفاضي.
عشان تشوف شنو؟.
طارق (اللورد السابق) اليا دوب بفك خط (الامين العام) بتكلم عن صلاح ادريس.
والله صلاح ادريس دا يجيكم في المريخ ..يفرتكم (نجمة ...نجمة).
اول حاجة بعملها ......تاني زول بي طولة لسانك دا ما بنشوفو.
انت يا زول الامين العام للمريخ ولاّ (طباخ)؟.
مالو كلامك كتير كدا.
كلامك دا كلام طباخين.
اوعك تتطاول على الهلال ...شوف (سلتك) وين؟.
صلاح ادريس لو مشى المريخ ...لو بقى رئيس نادي المريخ ...تاني كلتشي والحضري ديل (قرش) ما بشوفو.
شورى شنو البقعد ليكم فيها صلاح ادريس.
تاني حاجة ...نادي المريخ دا برحلو (صالحة).
طبعاً دي صلاح ادريس في الهلال ما قدر عليها.
ثالث حاجة ناس بله جابر وموسى الزومة ومحمد موسى وضفر ديل بوديهم اهلي شندي.
المريخ دا تاني ما بتشوفو..إلا تدربوا في استاده ساكت مع الاهلي شندي.
سلك ومزمل ابوالقاسم ومعاوية الجاك ذاتهم بمشوا شندي يطلعوا ليهم صحيفة رياضية من هناك اسمها (الارسنال).
صلاح ادريس ...حاجات زي دي ما بتنفع معاه.
اما ناس كمال دحية ..وصديق على صالح ..ديل بشوف ليهم (دفارات) عشان يمسكوا عضوية ام درمان.
اتخيلوا كمال دحية مسؤول من استاد شندي.
والله نجيلة استاد شندي في اسبوع تبقى ليك زي (ام فتفت).
بعدين صلاح ادريس لو بقى رئيس نادي المريخ ..حضروا ليه (نجيلتكم) ساكت عشان يرشها قبل أي مباراة مهمة للمريخ.