واحد قالوا ليهو القذافي (سقط). قال ليهم والله من شفت شغلو في (التاريخ) ...قلت الزول دا ما بمر. القذافي سقط في (التاريخ). وزين العابدين سقط في (العربي). ومبارك سقط في (الرياضيات) عشان ما حسبها ...صاح. في زول يا مبارك بعمل العملتو دا بقعد. كان تتخارج زي (زين العابدين). كان تهرب. او تقعد تمسك في (السلطة) زي القذافي. الكنكشة كان افضل ليك من الحالة الانت فيها دي. .. في واحد ... واحد تاني. مشى الدكتور ..يشكى. قال للدكتور ...يا دكتور اسمع : انا في العشرة ايام الاخيرة من رمضان ما بسمع كويس. الدكتور قال ليهو : قلت شنو؟. يا دكتور قلت ليك انا في العشرة ايام الاخيرة من رمضان ما بسمع!!. الدكتور قال ليه : قلت شنو؟. ما سامع. قلت ليك يا دكتور : انا في العشرة ايام الاخيرة من رمضان ما بسمع كويس. شنو؟. في العشرة ايام الاخيرة ...ماااااااا بسمع كويس. الدكتور عاين ليه كدا ..وقال ليهو : انا برضو ما بسحر. صاحبكم عرف ليك الدكتور دا (مجلى). قام مشى لي دكتور تاني. يا دكتور انا عندي مشكلة. مشكلتك شنو؟. يا دكتور انا في العشرة ايام الاخيرة من رمضان ما بسمع كويس. الدكتور قال ليه دا ما مشكلة. او على الاقل دي ما مشكلتك. طيب يا دكتور المشكلة في شنو؟. المشكلة بسيطة. الناس في العشر ايام الاخيرة ...بتكلموا بي (صوت) منخفض..عشان كدا ما بتسمع يا ابوالشباب. الناس في البلد دي ما بتكلموا. ولو اتكلموا بتكلموا بي صوت منخفض!!. .. لاقاهو في حتة. سلم عليه. كيف؟...الاولاد ...الاهل ...الخبر ..الصحة ...رمضان. والله تمام الحمدلله ...كل حاجة تمام. معليش ما عرفتك يا ابوالشباب؟. طيب وقت ما عرفتني بتسأل مالك ..وكمان بتسأل من الاهل والخبر والصحة ...ورمضان. يعني لو عرفتني كنت عملت شنو؟. قال ليهو : كنت رفعت الكورة كورنر. بعد يومين الزول دا لاقي نفس الزول الما عرفو امس. اسمع انا شايفك وين؟. انت (فردة) من البلابل. زولكم كبس ..قال ليه : لا (فردة) من التومات. انا متأكد شايفك في حتة ...انت ما غريب علي. زي الشايفك في صورة عرس جدي. انت الزول الكنت شايل (الرتينة) في الحفلة. طبعا حفلات (جدودنا) زمان كانت بالرتينة. زمان (العريس) بجي بي عربية. والعروس بتجي بي (عربية) براها. أي حاجة رسمية...ما في احسن من الشيء (الدغري). العريس بقعد في (كوشة). والعروس في (كوشة). أي حاجة رسمي. الحفلة تنتهي العريس بمشي شهر العسل (تركيا). والعروس بتسافر (مالزيا). ناس زمان ديل كانوا صعبين. صعبين شديد. قالوا ليك (عريس) صعب ...بعد عشر سنوات اكتشف انو الزولة الكانت واقفة معاه في (صورة العرس) دي العروس. عارفين العريس عمل شنو؟. طلق زوجتو ...قال ليها نحن ما عندنا (عروس) بتصور مع (عريسها) في صورة. غايتو الواحد وقت يكون بفتش ليه سبب للطلاق ...بفتش ليه أي حيلة. بشوف ليه أي طريقة. عليكم الله هسع في داعي عشان يطلق (زوجتو) عشان اتصورت معاه قبل عشر سنوات. احذركم من الصور. ... في واحد اخر. لاقي ليه زول اخر. بدون أي مقدمات ...قال ليه اسمع انا شايفك وين؟. انت ما غريب علي. الزول الاخر قال ليه : تاني. شنو (الحنك) المساكو لينا دا من الصباح. انا شايفك وين ..انا شايفك وين؟. قول ما شفتنا. اسمع انت شغال شنو؟. قال ليه : انا شغال بكتب (قصة قصيرة). بس. ايوة بكتب (قصة قصيرة). هسع دي شغلتك ...كل الذي بتعملو بتكتب (قصة قصيرة). زولكم غضب ..قال ليه : لا عندي حاجة تانية. عندك شنو غير (القصة القصيرة). والله مرات وقت مزاجي يكون (رايق) بكتب قصة طويلة. وبعد كدا. وبعد كدا بكتب كلمة (انتهت). يعني عاوزيني اعمل شنو اكتر من كدا. ..... روسي وقع فيه (صاروخ)...في رابع يوم من رمضان. الروسي بصوم. قام بعد و21 يوم. قال رمضان فات منو كم يوم؟. رمضان سخن مع الروسي. .......... روسي تاني وقع فيهو برضو (صاروخ). قام بعد 27 يوم يتنفض. قالوا ليه : العيد بكرة. قال والله (صاوريخ) الزمن دا ..بقت صاوريخ بت (حلال). قلت ليكم الروسي رمضان سخن معاه. ... روسي ثالث. ثالث خالص. وقع في رأسو (صاروخ). تتخيلوا الحصل شنو؟. ح تقولوا لي تاني ..رمضان ...وما رمضان. اقول ليكم. الروسي قام بعد شهر ونص. عاين في نفسو في (المرأيا)..وقال الحمدلله ....(الحلاقة) ما جاتها (عوجة). حلاقة في عينك. .... روسي.. دقيقة ..دقيقة ...شنو انت مسكت لينا في (الروس) ديل. دي زوغة جديدة من مباراة (القطن). مباراة (القطن) دي في واحد قال لي كترها ليها (الروس). غايتو روس الزمن دا ذاتو ما روس. ..... في واحد اول مرة يجي الخرطوم. دا ما روسي طبعا. دا زول عادي. النوع البتلقاه عندو (قميص) واحد. القميص يوم فيه. ويوم في السلك. يوم لابسو. واليوم التاني في سلك الغسيل. شغالين تبادل في (القميص) هو وسلك الغسيل. يوم هو. ويوم السلك. زول مضايق السلك في (قميصو). او يمكن يكون السلك هو المضايق الزول في قميصو. انا ما عارف. المهم الزول دا جاء الخرطوم. قعد اسبوع ورجع. اول ما رجع البلد ..في واحد قال ليه احلى حاجة شنو في الخرطوم. قال ليه (الباسطة). واحلى من الباسطة شنو؟. قال ليه (البسبوسة). يا زول انت كنت نازل عند حسن بسبوسة. حسن محجوب قالوا اول مرة يشوف (اتوبونج). ضرب تلاتة تسعات. انت من قبيل عاوز تصل لي دي. طيب لو حسن محجوب ضرب تلاتة تسعات...بابكر سلك يعمل شنو؟. بابكر سلك إلا يجري. دي شنو دي. بلد احلى حاجة فيها (الباسطة). ملحوظة : الباسطة خليها ...هسه (القذافي) حصل عليه شنو؟. هوامش اتوقووون جاه شد عضلي. ومساوي جاه شد عضلي. دا عدم السحور. انتوا (القطن) دا ماشين تلعبوا معاه في مشروع الجزيرة. يا جماعة ما تجهجوا لينا (العيد) ساكت. قولوا ليكم كلام غير دا. ميشو بقي ما بتكلم كتير. الظاهر (الصيام) اثر عليه. حالتو ما صايم. طيب يا ميشو لو (صمت) تعمل شنو؟. عندنا في الحلة ..واحد صعب. النوع البتلقى قاعد تحت العمود الساعة اتناشر في الليل. الزول دا دخل فيه (مؤتر). قسمو على اتنين. بقي ليك زي اطراف المريخ. بلة جابر في حتة. وموسي الزومة في حتة. هسه اطراف المريخ ذنبهم شنو؟. المهم الزول دا وقت اتقسم ...قام يتنفض ...وقال للزول السايق المؤتر الله مرقك ..تعرف انا ح سامحك عشان سايق ليك (مؤتر)...لكن علميتك دي لو عملتها بي (قلاب) والله ما بتمرق من هنا سالم. سالم وإلا عمر الشريف؟. هسه دي حركة. عاجل : اخبار (تورتة) الحضري شنو؟
