· اول ظهور لفلانتاين ان شاءالله سوف يكون يوم 29 فبرائر في مدينة شندي. · جهزوا الهدايا يا ناس شندي. · (عيد الحب) في شندي يوم 29 فبرائر. · عيد الحب في العالم كلو يوم 14 فبرائر. · إلا في شندي يوم 29 فبرائر. · هيع. · هاك من دار جعل!!. · يوم 29 فبرائر (عرضتنا) للصباح. · (الجعليين) ديل صعبين...عيد الحب عندهم يوم 29. · بالطريقة دي عيد الام في شندي ممكن يكون في اكتوبر. · انتوا ما تقولوا الحمدلله ...ناس شندي احتفلوا ليكم في الاساس بعيد الحب. · كلام زي دا في شندي مافي. · في شندي البجيب سيرة (الشوق) ساكت بقطع رأسو. · الله قادر زول يتكلم ليه عن حب او مودة او حاجة بالشكل دا. · كلام زي دا ما في. · عندنا المواضيع دي (عيب) عديل كدا ...نحن ما عندنا كلام زي دا. · بمناسبة صينية (الازهري) دي. · قالوا ليك جعلي اتقدم ليه لي جعلية. · أي حاجة بي نظام. · امشوا معاي خطوة خطوة. · اول حاجة هسع صينية الازهري علاقتها شنو بالموضوع. · الجعلي يوم اتقدم للجعلية ..اول حاجة ابو البنت قال للعريس ...(انت بنتي دي شفتها وين؟..والله بنتي دي انا من السماية ما شفتها تاني إلا يوم تخرجها من الجامعة). · العريس عاوز يجاوب ...لقى ليك اخوان العروس السبعة سالين سيوفهم (تقول في مسلسل عربي). · العريس طوالى اتراجع..اضاير ليك لي تحت. · قال لي ابو العريس : والله انا بنتك يا عمي ما شفتها ...لكن سمعت بيها سمع...سمع ساكت يا عمي. · العريس قبال ما يتم كلامو..اخوان العريس نطوا ليهو في رقبتو ...وقالوا ليها سمعت عنها شنو؟...اتكلم!!. · يا جماعة والله سمعت عنها كل خير. · انا لو سمعت عنها حاجة كعبة ...كنت اتقدمت ليها ...انتوا بتتكلموا كيف؟. · اخوان العروس السبعة (ابتقصوا) رجعوا لي ورا ...سيوفهم تلمع زي صلعة حسن حسني. · صلعة حسن حسني هسع ذنبها شنو؟. · حسن حسني في أي فيلم قاعد تقول طفاية سجاير. · المهم العريس قدر اتجاوز ليك حتة انت شفتها وين؟. · الجماعة مشوا لي نقطة تانية. · طبعا مفاوضات العرس دي زي مفاوضات (نيفاشا). · زي موضوع (النفط)...المولع الان. · موضوع النفط دا ذكرني ليك بي موضوع. · انتوا يمكن تشوفوا ما عندو علاقة. · لكن عندو علاقة قوية. · في (عزابة) قالوا ليك ساكنين في غرفة ضيقة شديد. · غرفة لو عاوز تطلع ليك (عود) كبريت من الكبريتة ألا تفتح الشباك ...عشان (كوعك) ما يضرب في (المروحة). · لو عاوز (تعطس) إلا تقفل مكيف الجيران. · دي داخلة في دي. · المروحة ذاتها لو شغلتها في تلاتة إلا تطلع (الدولاب) برة الغرفة ...عشان (هوا) المروحة بكون شديد. · قلت ليكم غرفة ضيقة شديد. · لو عاوز تكوي ليك فيها (قميص)...اكمام القميص تطلع تكويهن في السهلة برة..وترجع تتم القميص في الغرفة. · الغرفة الضيقة شديد دا كانوا ساكنين فيها 7 انفار. · 7 (عزابة). · بدخلوا الغرفة بالتناوب ..تلاتة ...تلاتة. · السبعة ديل قالوا ليك لما يدخلوا الغرفة بدخلوا بالصف ...تقول داخلين ليهم (سينما). · بدخلوا واحد ...واحد ...بطلع واحد ..ويدخل التاني. · سبعة ما بتشيلهم. · اها (العزابة) ديل وقت يكون عندهم اجتماع أسري ...بمشوا يعملوه في (الحدايق). · الغرفة ما بتشيلهم. · العزابة ديل لو عاوزين يلعبوا ليهم عشرة كوشتينة كانوا بمشوا الحدايق يلعبوا هناك ويرجعوا. · لو عاوزين يتهازروا ساكت بمشوا (الحدايق). · قلت ليكم (الغرفة) ما بتشيلهم. · الغرفة دي من ضيقها ...اللحاف بفرشو فيها (مطبوق). · الملاية لو ما (كرفسوها) ...ما بتشيلها الغرفة. · قلت ليكم الغرفة ضيقة شديد. · العزابة ديل مرة جاهم (ضيف). · العزابة السبعة طلعوا استقبلوه برة ...عشان يفضوا ليه الغرفة. · العزابة قعدوا برة ...وخلوا الضيف في الغرفة ...وقعدوا يتونسوا مع بعض بالفيس بوك. · اقول ليكم حاجة تانية. · تثبت (ضيق) الغرفة دي. · مرة العزابة ديل جاءهم (ضيف) شايل ليهو (كرتونة). · الجماعة طوالي ثبتوه. · قالوا ليه يا تدخل انت ..يا تدخل الكرتونة. · الكرتونة وانت الغرفة ما بتشيلكم. · ديل مرة جاهم ضيف تاني ...قالوا ليه طلع (الجوارب)...عشان ما تعمل لينا ضيق في الغرفة. · الضيف قال ليهم غرفتكم دي غرفة وإلا جزمة؟. · غرفة ضيقة شديد. · موش مرات انت وقت تضايق بتطلع (الخاتم). · اها لو انت عاوز تدخل الغرفة دي إلا تطلع (الختم)...لو كنت لابس ليك خواتم. · (الدبله) ذاتها بطلعها. · باختصار شديد ...قلت ليكم العزابة ديل ساكنين ليهم في غرفة أي حاجة عاوزين يعملوها ...بمشوا يعملوها برة. · لو عاوزين يغسلوا ...بمشوا يغسلوا برة. · لو عاوزين يكوا بمشوا يكوا برة. · لو عاوزين ينوموا بمشوا ينوموا برة. · اها الحكاية دي عندي زي مفاوضات النفط. · أي خلاف يحدث بين السودان وجنوب السودان ...الجماعة كلهم بتلملموا وبمشوا (اديس ابابا). · أي حدث يحصل. · بمشوا اديس ابابا. · يخلوا بلدهم ويجروا على اديس. · معقولة لا السودان ولا جنوب السودان ما احتملوا خلافاتنا. · نحن بقينا (ضيقين) للحد دا. · عشان اليوم والتاني نجري على اديس ابابا. · اديس ابابا دي زمان بنمشي ليها (فسحة). · هسع بقينا نمشي ليها (مفاوضات). · غسيلنا بنمشي نشروا برة. · نتشاكل هنا ..ونجري على اديس ابابا. · نرجع لموضوع العريس الجعلي والعروس الجعلية. · العريس قلت ليكم اتجاوز حتة انت شفتها وين ؟...وقلت ليها شنو؟...والعاجبك فيها ايه؟. · ندخل ليكم لي يوم الحفلة. · يوم العرس. · قالوا ليك ...نظام حفلة أي جعليين. · فاصل للولاد وفاصل للبنات. · ويا ريت لو بقت على كدا. · فاصل الولاد في المتمة..وفاصل البنات في شندي. · اصلو ما في اختلاط ...ولا بجاملوا في الحاجات دي. · العريس والعروس فاصلين بينهم في الكوشة بي (بارطشن). · يا ريت لو فصلوا بيناتهم بي (ستارة). · ديل فصلوا بينهم بي (بارطشن) عديل. · في شهر العسل...قالوا ليك العريس سافر عطبرة...والعروس سافرت الابيض...والعريس قال للعروسة بيناتنا (تلفون). · ناس صعبين. · الحاجات دي ولا بجاملوا فيها. · ولا بفكروا. · اها بالنظام دا ...فلانتاين ماشي شندي. · عيد الحب في شندي. · وعشان ما يحصل غلاط ...وجدل كتير الهلال المرة دي ماشي ليهم ب (فلانتاين) عديل كدا. · عشان ما في زول يقول كدا وإلا كدا. · الهلال ما عاوز يديهم أي فرصة. · نظام ما تقعدوا تغالطوا ساكت. · فلانتاين معانا. · بمناسبة (صحن المرارة) دا. · الهلال طبعا كان معسكر في (مصر). · والاهلي شندي كان معسكر في (تونس). · ومصر كان فيها (ثورة). · وتونس كان فيها (ثورة). · الجماعة ديل الاتنين مسخنين. · المباراة ح تكون مباراة (ثائرة). · اعملوا حسابكم ...الفريقين قادمين من ارضي الثورة. · المباراة ح تكون مولعة. · غايتو نحن ما عندنا أي حظ. · في اول اسبوع نلعب مع الاهلي شندي. · والاهلي شندي ذاتو تقول عرفها. · كان معسكر فى تونس. · بعد دا كلو تقولوا لي (قرعة). · اشمعنا القرعة توقعنا مع الاهلي. · وفي شندي. · واشمعنا الاهلي يعسكر في تونس. · تقول موصنوا. · الشيء المدهش. · الهلال في الاسبوع الاول يفقد سيف مساوي للايقاف. · تقولوا لي برضو قرعة. · وديمبا اتصاب. · وبرضوا تقولوا لي قرعة. · وهيثم مصطفي حفظه الله ورعاه ..في الامارات. · وبرضو تقولوا (قرعة). · عبداللطيف بويا ذاتو قالوا اتعوق. · دي مشاكل شنو الوقعنا فيها دي. · والمعز محجوب مريض. · وتاني تمشوا وتقولوا لي (القرعة). · وعمر بخيت لسه عليه شوية. · وتقولوا لي قرعة. · دا كلو من (اتفاقيتكم) دي يا جماعة. · الاتفاقية دي انا خايف تكون هى الخلتنا نلعب امام الاهلي شندي في الاسبوع الاول وفي شندي ...ونحن نفقد للكثير من العناصر المؤثرة في الهلال. · الله يخلى لينا (فلانتاين) ما يقوم هو كمان يتعوق لينا. · اعمل لينا حسابك يا فلانتاين. · لكن مع كل هذه الاشياء. · ان شاءالله الهلال سوف يحسم الاهلي شندي في شندي ..وسيحقق الهلال باذن الله وتوفيقه انتصارا كبيرا على الاهلي. · اسمعوا كلامي دا. · نزار حامد رجع ...ومهند الطاهر في قمة الجاهزية. · نحن عارفين الاهلي شندي فيه الكثير من النجوم اصحاب الخبرة ..وقد يكون عند بعضهم دافع شخصي للتألق امام الهلال. · نعرف ذلك ...لكن الهلال ان شاءالله سوف يحقق انتصارا كبيرا. · الاهلي شندي عنده مدرب شاطر ...وهو قد اشتغل شغل صاح في اعداد الفريق الي جانب ان هذا المدرب التونسي حافظ الهلال. · لكن برضو نحن عندنا مدرب فرنسي ايطالي ...حاجة ما بتصور. · حاجة ما بتخلص. · الهلال اصبح عندو خط هجوم .....المدرعات الامريكية ما بتقدر تقيف قدامو. · خط هجوم قادر للتسجيل في كل 5 دقايق. · وح تشوفوا ان شاءالله كلامي دا في شندي. · وعيد الحب يوم 29 فبراير. · ملحوظة : يا فلانتاين اعمل حسابك من جمعة. هوامش · الاخبار القادمة من الامارات تؤكد ان هيثم مصطفى حفظه الله ورعاه سوف يعود قريبا. · بالكثير اسبوع وهيثم يكون معانا. · البعض حاول ان يوصل صورة خاطئة عن هيثم مصطفى لمدرب الهلال الفرنسي. · لكن هيثم قادر على ان يبدل هذه الصورة التي وضعوه له عند مدرب الهلال غارزيتو. · واضح ان الهلال الان يفتقد للقايد. · بقينا زي ناس المريخ. · ما عندنا أي قائد. · لذا وجود هيثم مصطفى من الضرورة بمكان. · في كل الفترات التي يشرف فيها على الهلال مدرب جديد يحاول البعض ان يشوه صورة هيثم عند المدرب. · والذين يفعلون ذلك وينقلون الصورة الخاطئة للمدرب عن هيثم مصطفى يضرون الهلال. · اوصى ابوشامة بقلة التصريحات. · وابوشامة الان لا يصرح كثيرا ...وهذا شيء نشهد له به. · لكن ابوشامة معروف بانه صاحب تصريحات كثيرة ...وقد كان يصرح شمال ويمين...لذلك نحن نصحه بقلة التصريحات. · في شندي اتمنى ان يلعب غارزيتو بثلاثة مهاجمين. · كاريكا وبكري المدينة وسادومبا. · الوسط سوف تعود له هيبته بوجود علاءالدين يوسف ونزار حامد ...وان كنا سوف نفقد عمر بخيت وهيثم مصطفي. · لكن ما مشكلة. · علاءالدين يوسف الايامات دي يقدم اجمل ايامه مع الهلال. · وقاد عاد فييرا منذ بطولة الكان. · عاجل : العجب موديل 2012 يلعب في كل اربعة شهور مباراة.
