تاعبين نفسنا في الفاضي. نضرب في الفول..والكسرة...وما جايبين خبر. الكهربة ان قطعت ...نهيج ونعترض ..(فلاحتنا كلها نكبها في الكهربة). الموضوع اكبر من كدا. الشاي ان برد ..نزعل ..وما نرضى. نقوم ونقعد ..ونحن ما (ناقشين) حاجة. قايلنها (صدفة). فاكرنها (ظروف). دا نحن طلعنا اي كلام. احنا اتخدعنا. احنا اتغشينا يا جدعان. شغالين (10) سنوات في منوال واحد ..وكلام مكرر (لمن الناس زهجوا مننا). جمال الوالي رئيس طوالي. شيلوا المدرب ..غيّروا المدرب ..جيبوا مدرب اجنبي ..شيلوا الوطني ..خلوا مساعد المدرب. وما عارفين نحن. ما ناقشين اي حاجة. الطيبة كاتلانا. تصوّروا (جمال الوالي) طلع هو (المدير الفني) للمريخ. المدرب يعني. عشان كدا ناس جمال ابوعنجة (طارت) ليهم. المريخاب شغلونا ليك ب (جمال الوالي رئيس طوالي)..وصاحبكم (كوتش). هيع. صعب والله. كان عندي شعور حايم في الحتة دي. كان عندي احساس غريب كدا. الخطة البلعب بيها (كروجر) دي لا خطة المان ولا حاجة..دي خطة اهلنا ديل ..نحن بنعرفهم. خطة (سودانية) واضحة ..انت يا باسكال اتقدم ..وارجع طوالي بعد الهجمة يا بلة. بيني وبينكم الموضوع دا ما عاوز ليه (الماني). ناس شيلميس ديل ذاتهم ما بفهموا ليك خطة الالماني..اخير ليهم خطة جمال الوالي. انطلق ..تعال راجع سريع. يعني في خطة سودانية اكتر من كدا. كمان نحن ما بنعرف خطط الالمان. فريّز ساكت ما بنفرزها. نقيّر...نقيّر ساكت ما بننقرها. لكن كنا ما قادرين نقول اي حاجة. كاتمنها في قلبنا. ما عاوزين ندخل في الشأن الفني...(عاملين فيها صحفيين مهنيين). هي وينها المهنية؟. كروجر دا (المانيا) دي ..ما جاب منها غير (البرمودة). برمودة بس. برمودة من سوق ليبيا ممكن تجيبها. خلاص عاوزين نتلح (كروجر). تاني الزول دا ما بنرحمو طلع قاعد ساكت وبصرف ليه راتب (40) الف دولار. في شنو؟. في (البرمودة) اللابسها دي. تشكيلة ما بختها. البرمودة كانت خدعة. وكمان كروجر لابس ليه (نضارة). النضارة على شنو؟...وانت التشكيلة يا كروجر ما بتختها. السر في (الجلابية). اول مرة اشوف لي (كوتش) بي جلابية وعمة. وقاعد في المقصورة كمان. جمال الوالي دا مفروض يقعد في المربع (المنطقة المحددة للمدربين). بدسوه ليه. الموضوع بقى واضح. كوتش (رئيس طوالي). اقصد جمال الوالي مدرب طوالي ..(حكاية رئيس دي تاني ما عاوزين نسمعها). عشان كدا. عشان كدا شنو؟. مالك انت ؟..في شنو؟...الحاصل ايه؟...البغضبك شنو؟..المريخ دا ان شاءالله يقوده فنيا عباس ود جيرانا ديل. ان شاءالله يمسكو سيد الدكان. في السودان طبعا الزول البصرف هو الزول البقرر. انت بتدفع ...انت بتخت التشكيلة ذاتها. مالك يا عصام الحاج؟. جمال الوالي هو البدفع ..طبيعي يكون هو البحدد البلعب من الما بلعب. انتوا قايلين الزول لو عندو قروش كتيرة ما ممكن يكون (مدرب). القروش بتخلي الزول يعمل اي شيء ..يكون رئيس ويكون مدرب ويكون شاعر ويكون (ملحن) ذاتو. هسع صلاح ادريس دا في زول (بسعلو)...صلاح ادريس دا كل (15) يوم طالع لينا بي (مهنة) جديدة. صلاح ادريس قالوا ليك عملية القلب المفتوح ممكن يعملها. خريطة عمارة بعملها. مرافعة قضية بيضعها. لحن اغنية بعملو. قالوا ليك صلاح ادريس جهجه اتحاد العمال ..صلاح ادريس بي مهنو الكتيرة دي براهو بعمل (نقابة). ما شاءالله ...نحن مالنا ..عشان ما تقولوا طقوه عين. قلنا ما شاءالله. المريخاب عينهم حارة زي عين البتوجاز. قالوا ما شاءالله. هسع في (مريخابي) هنا. جمال الوالي (مدرب)..ما بدرب ..لكن بخت (التشكيلة). من المقصورة قبلو ..التشكيلة بتطلع. عشان كدا (هيثم مصطفى) مرة يلعب ..مرة يختفي ..ومرة يرجع تاني. حسب (العلاقات). وعصام الحاج ما بقبل الكلام دا. عليك الله يا عصام الحاج انت امس كاتب ليك (2000) كلمة ..سطر واحد عن (فيصل العجب) ما كتبتو. ولا كلمة. وصاحبكم عصام الحاج كتب موضوعه تحت عنوان (الواقع المر في مريخ التاريخ والبطولات). التاريخ دا ..البطولات دي ..(العجب) ما عندو فيها (نصيب). عملت لينا الموضوع كلو هيثم مصطفى تقول كان بيلعب معاكم (17) سنة. طيب نحن نقول شنو؟. وانت يا عصام الحاج ..هيثم مصطفى لعب معاكم (7) شهور ..خلاك تكتب فيه الكلام دا. شفتوا عشان الحاجات دي يا عصام الحاج..هيثم مصطفى تاني ما بيلعب. تشوفوا ..رهاب ..رهاب. تسمعوا بيه رجع. رجع اهلو. الزول دا طلعناه (خدمة الزامية). منطقة شدة..لعب معاكم موسمين...اطورتوا اطورتوا..ما اطورتوا بي طريقتكم. بس تعالوا اتفرجوا في العرضة شمال. بلة جابر ..فجأة كدا تلقى في التشكيلة. وفجأة تانية تلقى برة التشكيلة. ما فاهمين اي حاجة. قلنا الحركات دي ما بعملها (كروجر). الحركات دي حركات سودانيين. عارفين طلع البعملها منو؟. طلع بعملها (جمال الوالي). اول نحن وديناها لي صديق حسن صالح ...(بتاع وفود المقدمة). الزول دا بقدم من سنة 1992م في الوفود. الكلام دا ما جبتو من رأسي ..ما تقعدوا تزعلوا ساكت يا مريخاب. الكلام دا (كتبوا) عصام الحاج الامين العام السابق للمريخ ..كما عرف نفسه امس في الغراء (الهدف). عصام الحاج كتب الكلام دا بي نفسو ....(عشان بعدين ما تقعدوا تقولوا لي دا كلام جرايد ساكت). ح اتوقف ليكم في بعض ما جاء في مقال الاستاذ عصام الحاج امس ..شوفوا الزول دا كتب كلام خطير كيف؟. والله انا في البداية قلت دا (عصام مسكين). لكن تاني رجعت ..قلت الشغل دا ما شغل عصام (مسكين). دا يكون عملها عصام (الشفت)..عصام (مسكين) ما بقدر على الكلام دا. اول ما جاء في مقال عصام الحاج او عصام الشفت نأخذ هذا المقطع : (ذهبنا لأننا مريخاب لا نقبل أن يحدث تدميرا للمريخ ثم نبقى في مقاعد الادارة . قررنا بكل شهامة ان نتخلى عن القيادة وان نذهب للاخ جمال الوالي بمنزله ونسلمه القيادة ليأتي على رأس مجلس اللوردات ويومها قال لي بالحرف الواحد وفي وجود الاخ خالد شرف الدين : »لقد قمتم بعمل كبير خلال فترتكم ولكن عيبكم الوحيد انكم لم تتمكنوا من حراسة فريقكم«...). كلام عصام الحاج دا ..المعني يا جمال الوالي انت الان امشي ...عصام الحاج بسأل عن الشهامة. وبعتبر الشهامة في كونك تمشي من المريخ. المريخ بيدمر يا جمال ..مفروض تمشي ..(دا كلام عصام الحاج ما كلامي) او معناه كدا. عصام الحاج قال جمال الوالي قال ليهم عيبكم الوحيد انكم لم تتمكنوا من حراسة فريقكم. انتوا جمال الوالي دا عندو عقدة (حراسة). حراسة الفريق اكتر من عصام الحضري يعملوا ليها شنو؟. على العموم عصام الحاج قصد ان يقول انهم تعرضوا الي حرب عنيفة ..(وجمال الوالي عارفها). في مقطع اخر من المقال يقول عصام الحاج : (وانا ابدأ بهذه المقدمة ليس تقليبا للمواجع وليس تذكيرا للناس بتلك الايام التى ظهرت حب البعض ل (جمال) اكثر من (المريخ) ذلك البعض من الأكلة والارزقية الذين قطعت أرزاقهم عندما استقال جمال وبقى الفقراء وحدهم يديرون المريخ). كدا يا عصام...(جمال) كدا حاف... انت (جمال) دا يا عصام ما كان رئيسكم..شنو شابكنا حب البعض ل (جمال) ....وعندما استقال (جمال). برضو مفروض تحفظ المقامات وانت تعرف نفسك في اسفل المقال ب (الامين العام الاسبق). الحقيقة بنقولها ليك او عليك يا عصام الحاج ...واضح ان عصام الحاج شايل (تقيل) من جمال الوالي. حسرة عصام الحاج وحرقته من رحيله من المجلس يأتي في هذا المقطع : ( ذهبنا نحن سادتي الكرام وجاء مجلس اللوردات وهو مجلس اختاره جمال الوالي بنفسه وذهب مجلس اللوردات وجاء المجلس المنتخب ولعبنا افريقيا وخرجنا من الدور التمهيدي (64) في مواجهة مع احد اضعف الفرق التى واجهت المريخ في تاريخه افريقيا). عاوزين الحقيقة وإلّا عاوزين الجنبها ...(دي شماتة عديل كدا). طيب انتوا يا مريخاب وقت نكتب عنكم بتزعلوا مالكم. هسع الكلام البقول فيه عصام الحاج دا خالد عزالدين بقولو. انتوا ساكت بتزعلوا. قال طلعنا امام اضعف الاندية في افريقيا. نأخد مقطع جديد من مقال عصام الحاج امس في صحيفة (الهدف). كتب عصام الحاج : (وللحقيقة والتاريخ فان مباراة ميونخ انجاز يحسب لهذا المجلس كما قال لي احد العارفين : » والله لو ما الفرصة دي لعبيتكم ديل ما بقابلوا لاعبي بايرن ميونخ إلا يوم القيامة«. حقيقة كانت فرصة طيبة رفعت اسهم المريخ والسودان ولكن كان لها سلبيات اولها خروجنا المبكر افريقيا ومن الدور التمهيدي كعادتنا جنحنا جميعا ل (الفخشرة) واطلقنا لقب (العالمي) وسمينا لاعبينا واطلقنا عليهم الالقاب). شوفوا الزول دا فرحان بالتمهيدي كيف؟...كل مرة يذكر ليك حكاية الخروج من الدور (التمهيدي). نحن نقصر. اما الكارثة فهي نظرة احد العارفين ممن استشهد بهم عصام الحاج بقوله : » والله لو ما الفرصة دي لعبيتكم ديل ما بقابلوا لاعبي بايرن ميونخ إلا يوم القيامة«. دا كلام يا جماعة ..دي نظرة فيها الكثير من الاستخفاف بالمريخ ..(يعني شنو بايرن ميونخ). في السبعينات الهلال واجه سانتوس البرازيلي في الخرطوم. وفي التمانينات لعب ليفربول في الخرطوم. حكاية (القيامة) دي ما في ليها اي داعي ..عصام الحاج وصف قايل العبارة بي احد (العارفين). يعني عصام الحاج معجب بقوله ..ومتفق معه ..(شفتوا التحليل دا خطير كيف). نحن ما بنتكلم ساكت ..ما تقعدوا تتلفتوا لي. ندخل الي حتة اخيرة في مقال عصام الحاج ..وهو الجزء الذي تعرض فيه عصام الحاج الي مشكلة هيثم مصطفى الاخيرة. عصام الحاج غضبه هذا يبدو كان كله بسبب ابعاد هيثم مصطفى من تشكيلة المريخ. يقول عصام الحاج : ( ثم كانت المفاجأة المذهلة لكل شعب المريخ ..إبعاد الكابتن هيثم مصطفى ! والسؤال : هل ارتكب هيثم مصطفى جرما يصل حد ابعاده ومعاقبة شعب المريخ وشعب السودان بهذا الخروج الافريقي (المذل) ؟ والاجابة : لا فهيثم منذ تسجيله في المريخ وبشهادة الجميع ظل يسجل حضورا وانضباطا ومساهمة فعالة داخل وخارج الملعب ولنفرض ان (الخواجة) ركب رأسه وأصر على ابعاد هيثم ..ماذا فعلت القيادة ؟ فالذي اعرفه عن جمال الوالي ان له القدرة على التدخل ليس بوضعه في كنبة الاحتياطي وانما وضعه ضمن التشكيلة . فجمال يتدخل ولا احد يقول له »لا« فالخواجة يعلم ان دولاراته عند جمال وخلال مجلسنا ونحن نسافر لمباراة الرد الافريقية على ايام (الحضري) وعند سفره المفاجيء للقاهرة لوالدته قررنا ان نسافر بالحارس يس وحارس الرديف ولو تذكرون فاننا استبعدنا من السفر اكرم الهادي والكابتن العجب وجهز لهم تذاكر السفر ومنح كل واحد منهم الف دولار للنثرية ، ولم يعترض احد منا لا المدرب ولا الاداريين وقلنا : لا بأس بالرغم من اننا هزمنا الانضباط الذي يتحدث عنه البعض اليوم يجعلونه شماعة لابعاد هيثم مصطفى الاكثر انضابطا منهم). كلام خطير...يمكن ان نتوقف عند بعض العبارات التى ذكرها عصام. عصام الحاج سلّم بتدخل جمال الوالي في التشكيلة ...وهو له سلطة ان يجعل اللاعب اساسي وليس احتياطيا. ولا احد في المريخ يستطيع ان يقول له : (لا). يا عالم ..يا ناس ..دا بحصل في المريخ ..وعاوزين تتأهلو. عصام ضرب امثلة على تدخل جمال الوالي ..المؤسف ان عصام الحاج (الهائج) الان ..موقفه كان في منتهى (السلبية) عندما تدخل الوالي في التشكيلة ..وذنب عصام الحاج هنا اكبر من ذنب جمال الوالي. اما (كروجر) الذي يقبل بذلك من اجل الدولارات التى تأتيه من جمال ..فهو ان صدق ذلك القول لا (خواجة) ولا حاجة ، دا (ترزي) ساكت ..ولا تغشوا نفسكم ..اذا كان كروجر قد قبل بهذه التدخلات من اجل (الدولارات). كروجر طلع مجرد (برمودة). اقوى عبارة قالها عصام الحاج في المقطع السابق هو ان تدخل جمال الوالي في موضوع الحضري واكرم والعجب ..وتحفيزهم كمان على تسيبهم كل واحد اخد (1000) دولار. عصام قال ان فعلة جمال تلك جعلتهم يهزموا (الانضباط). لا خطير والله. يقول عصام الحاج: (شكل غياب هيثم خللين واضحين في الفريق فقد الفريق بفقده القائد الخبير الموجه لزملائه داخل الملعب والذي ينشر الطمأنينة في ساعات الهزيمة والتوتر كما حدث في الحصاحيصا هو ما كنا نحتاج اليه بعد ولوج الهدفين في الخرطوم ، وكان الوقت كافيا في وجود القائد للتعادل على الاقل ! وفقد الفريق بفقده صانع الالعاب ..فتاه الفريق وكنا ومازلنا وسنظل نطالب بتسليم الكابتنية لهيثم فهو القائد الحقيقي وليس بيننا وبين السعودي عداء فهو لاعبنا ابننا ونقدره ونحترمه ولكن نقول للذين يصرون على تسليمه القيادة انه احتياطي شبه دائم فكيف يكون القائد قائدا من كنبة الاحتياطي). نرد على عصام الحاج من الجزء الاخير ونذهب تصاعدا...السعودي يا عصام الحاج (احتياطي)..هذه حقيقة ..ولكن هيثم مصطفى الان في (البيت)..وانت الذي رفضت (قائدا) من (الكنبة) ..كيف لك ان تقبل به من (منازلهم). منطق غريب. الامر الثاني قال عصام الحاج ..ان هيثم مصطفى كان السبب في انتصار المريخ على النيل في الحصاحيصا. وماذا عن اللاعب الذي سجل هدف التعادل وتسبب في ضربة جزاء الفوز...(محمد موسي) الذي شطب من المريخ ولم يذكره عصام الحاج بحرف واحد. سريعا نأخذ مقتطعات اخيرة من مقال عصام الحاج ونعلق عليها. قال عصام الحاج : (السعودي ادخل في مباراة نهائي الممتاز قبل دقائق فقط من نهاية المباراة ليستلم الكأس حتى لا يستلمه هيثم). الزول دا مالو مع (السعودي)؟. لكن واضح ان هيثم مصطفى يتعرض لحرب قذرة في المريخ..(الجابرك على كدا شنو؟). يقول عصام الحاج ايضا عن هيثم مصطفى : ( هيثم الذي لولاه لما كان الدوري والكاس). علما ان مباراة الكأس فاز بها المريخ بعد انسحاب الهلال للظروفه المعلومة لديكم. يعني ما في اي بطولة في الموضوع دا. عصام الحاج يكون قاصد كاس 1998م. كدا كفاية ..سرحنا عديل كدا. ملحوظة : يا عصام الحاج انت شايل الحاجات دي كلها وساكت ..(دا انت غلبان). هوامش كلمو عصام الحاج قولوا ليه المشكلة في (المدلك) وليس (المدرب). هيثم مصطفى كان طبيعي ان يبعده (المدرب) الخفي من مباراة المريخ ومريخ الفاشر اليوم بعد مقال عصام الحاج. بعد كلامك دا يا عصام ..هيثم تاني ما بيلعب. السعودي الليلة ح يكون الكابتن. إلّا يسحبوه بعد كلامي دا. يا سلك ..عصام الحاج دا تاني ما بديكم فرصة في الصفحة الاخيرة. الزول دا لو فتح ..بشيل ليك معاوية الجاك برة الصفحة. الهلال اليوم مباراة ما ساهلة امام هلال كادوقلي ...نتمنى ان ينتصر الهلال ويعود ان شاءالله بالنقاط الثلاثة. المريخ امام مريخ الفاشر. عاوزين نشوف العجب. كفاية كدا صاح. في الغراء (عالم النجوم) نتابع ملف الاستاذ محمد بابكر بلال عن (الصحافة الساخرة)..ونرجو ان نستفيد من الملاحظات والانتقادات التى توجه للصحافة الساخرة السلبية والايجابية. وتسعدنا كل الاراء بالطبع..الطالح منها والصالح ونعتبر كل الاراء من (الصالح)..ولا (طالح) في وجهات النظر. كلها فوائد. شكرا كثيرا. وتحايا للزميل محمد بابكر بلال على هذا الجهد. وان شاءالله يوم شكرك ما يجي يا (سلك). سلك الايامات دي قالوا ليك الشاي ما بعمل فيه (شاي) حب. الفول بيأكلو بدون فول. التلفزيون بفتحوا (صورة) فقط..بقفل الصوت. زعل شديد. العرضة بمشي ليها ب (الحلفايا). سلك زعلان. يا سلك ..بنخليك تحضر (شوط) في مباراة الهلال الافريقية القادمة. يلا ابسط. ولكم العتبي حتى تشرق. ..... عاجل : انصح عصام الحاج يدخل ليه كورس تدريب ..عشان المرة القادمة لو دخل المجلس يكون عندو فكرة في (التدريب).
