قصة الزول (الحمش)..لو بابو دق (بضبح). لو لقى في الباب بتاع النفايات ..بجبدوا في الواطة ويضبح ليه. وبعد كدا بقعد يناقشوا في (الفاتورة). ما بتلفت في الحاجات دي. لو مسكلوا ليه بنزل (صينية الغداء). صينية الغداء عندو لافه زي خليفة لاعب الهلال (حايم الميدان كلو). زول كريم كرم مبالغ فيه. والله تمشي ليه ساعة (عالم الرياضة) لو بقيت شمسون الجبار ما بتطلع منو؟. زولكم دا ساعة (عالم الرياضة) بكون حايم في الشارع ...كايس ليه زول يحلف عليه بالغداء. الما بكرمو بضبح ليه (عنبلوك). الزول دا كلكم عارفنو ..وعارفين قصتو. موش الزول دا عندو ولدو بالغلط ..قام ضرب للمطافي قال ليهم عندنا (حريقة) في البيت. وهي ما في اي حريقة..ولا حاجة. ناس المطافي كتر خيرهم ...دوروا عربياتهم ..وركبوا خراطيشهم ومشوا على العنوان. وصلوا البيت المعني ..لقوا ما فيه اي حريقة ..وعمك قاعد يشرب في (القهوة). مصنقر زي الكورة (الكورنر) الما لاقيه لاعب ينفذها. قالوا ليه يا حاج ...ولدك ضرب لينا ..قال عندكم حريقة في البيت ..ونحن على ضوء (حريقتكم) دي اتكركرنا وجينا عليكم. عمك قال ليهم دا يكون (الافيتر) جنايا غلباوي ..ودايما شايل مني (الموبايل) وقاعد يبعبص فيه. الود المجنون دا يكون ضرب ليكم ..وتلتلكم في (الهجيرة)...لكن يمين ما بترجعوا في (النهارية) دي ساكت. ناس المطافي افتكروه عاوز (يضبح) ليهم. اتشمروا ليك في مقاعدهم. عمك كورك لي (الخرطيش ود امنة)..قال ليه تمشي تجيب ليك جالون بنزين من عمك (سعد) ...وتجي تولع النار في (الراكوبة) الفوق ديك...خليها تحرق بي بصلها. ناس المطافي اضايقوا ..وقالوا ليه : (يا حاج انت عاوز تعمل شنو؟). قال ليهم : عاوز احرق ليكم (الراكوبة) يمين ما بتمشوا ساي ..بعد جيتكم دي. الراكوبة بي (بصلها) ما غالية عليكم. غايتو الزول وقت يمسك ليك في (البصل). تاني الاممالمتحدة ما تفكوا. ناس المطافي ديل قدر ما حاولوا يقنعوا (عمك)..وقدر ما اتحولفوا ليه ..عمك ما اقتنع ليهم. ولع ليهم الراكوبة ..وقعد بعيد. وقال ليهم : يلا شوفوا شغلكم. هسع ناس الهلال ..عملوا نفس الشيء مع ناس المريخ. ناس الهلال ..حسب (كرمهم)...وحسب (الضكرنة) حقتهم ..لقوا ليك ناس المريخ مدورين في بعض. مشاكل وصراعات ...وخلافات ..لا حصر لها ولا عدد. مشاكل تقيلة. عصام الحاج كل يوم يكتب ليه في مقال عن جمال الوالي ...(ما خلى ليه شيء). وجمال الوالي بضرب ضرب تقيل في المعارضة. لمن المعارضة قالت نحن ما عندنا خلاف حول جمال الوالي. نحن خلافنا بس في الناس الحوالي جمال الوالي. وجمال الوالي الناس الحواليه ...عندو اهم منو. عشان كدا يا ناس المعارضة ...نكون معاكم واضحين ..البهبش الناس الحوالي جمال الوالي ..كأنو هبش جمال الوالي. كلو ولا صديق علي صالح. كلو ولا مصطفى توفيق. ديل البرشهم بالموية ..جمال الوالي برشهم بالدم. ناس المعارضة ديل ما يقعدوا يلفوا لينا في الفاضي ساكت. عندهم معارضة ..خليهم يعارضوا عديل. معارضة (كسير التلج) دي لا بتنفع ولا حاجة. انا اول مرة اشوف لي معارضة (بتكسر تلج). تتخيلوا يا جماعة المعارضة في المريخ ..بتكسر تلج لي جمال الوالي. دي حصلت قبل كدا؟. دي سمعتوا بيها؟. دي شوفتوها؟. طيب وقت المعارضة بتكسر تلج ..ناس مصطفى توفيق وصديق علي صالح ديل يعلموا شنو؟. خليتوا شنو؟..لي ناس متوكل أحمد علي. المهم ناس الهلال عشان يطلعوا ناس المريخ من الحالة دي ..قالوا ما في طريقة إلا يتغلبوا ليهم من الاهلي شندي. ما في حل غير الهلال يتغلب من الاهلي ..زي حكاية الزول الولع النار في (الراكوبة) عشان ناس المطافي ما يرجعوا ساكت. الهلال اتغلب ليكم ...يمكن ترجع ليكم شوية روح كدا...وينبعث فيكم (امل). على الاقل يمكن (مشاكلكم) دي تبرد شوية. ويمكن عصام الحاج ذاتو يبطل المقالات البكتب فيها دي. ناس طلعوا من دور ال (64) يطلعوهم من الحالة دي كيف؟. الهلال ضحى واتهزم ليكم ..عشان تمرقوا من حالتكم دي. موش مرات الزول بكون عندو (مريض) حالتو صعبة ..ونفسياتو تعبانة ..وواقعة في الواطة. يقوم الدكتور يقول ليكم ...يا جماعة لو عاوزين زولكم دا يتعالج لازم تتطلعوه من الحالة دي. حاولوا اعملوا ليه برنامج ..عشان يطلع من الاحساس الكئيب العايش فيه دا. تقوموا انتوا تعملوا ليكم ليه برنامج ...تختلقوا ليكم اي مناسبة عشان يطلع من حالتو دي. هسع نحن عملنا نفس الشيء للمريخ. قلنا نطلعهم من الحالة (التمهيدية) العايشين فيها دي. عاوزين نمرقهم من حالة الضياع الفيها المريخ الان. قمنا عملنا شنو؟. قمنا عملناها كبيرة ..واتهزمنا ليهم من الاهلي شندي. تتخيلوا الجماعة عملوا شنو؟. نسوا (التمهيدي) حقهم. نسوا الطلوع من دور ال (64). ونسوا عصام الحاج ..وموسى الزومة. نسوا اي حاجة. ودوروا ليكم في الهلال الذي تأهل لمرحلة المجموعات. دي لاقتكم قبل كدا؟. دي سمعتوا بيها؟. دي شفتوها يا جماعة؟. ناس المريخ الذي خرج فريقهم من قولة تيت..قاعدين هسع يسخروا من (الهلال) الذي تأهل لمرحلة المجموعات. نحن منتظرين القرعة. جماعتكم منتظرين اجتماع اللجنة المنظمة. نحن يمكن نمشي تونس. يمكن مصر. جماعتكم ح يمشوا الحصاحيصا. عليكم الله في تواضع اكتر من كدا. حصل لاقتكم (طولة لسان) بالشكل دا. نحن خلاص اتشفرنا. يعني ناس سلك ومعاوية الجاك ..لو عاوزين يشوفوا مباريات الهلال تاني إلا يغيروا جهاز (الريسفير). طبق ..طبقين ما بجيبوا ليكم. تغيروا (الريسفير) عديل كدا. وتشتروا ليكم (كرت جديد)..عشان تشوفوا كأس العالم..وتشوفوا الهلال في مرحلة المجموعات. طبقكم دا ..تاني يا سلك إلّا تشوفوا بيه نشرة عشرة. يعني ما بجيب ليكم اكتر من (عمر الجزلي). وعمر الجزلي لو بالغ معاكم ح يجيب ليكم (اسماء في حياتنا). الهلال بي اخوي واخوك ما بتشوفوه. خلاص نحن اتشفرنا. تابعوا (نجوم الغد). مرة قلت ليكم تابعوا (طيور الجنة)..زعلتوا ..وحبكتوا ..وعملتوا لي فيها انتوا ناس كبار. خلاص تابعوا (نجوم الغد). احسن ليكم. نحن والله تاني (كورنر) ما تشوفوا مننا. ولا بنجامل في الموضوع دا. ولا بنغشكم. نحن بقينا في القنوات البتجيب كأس العالم. خلاص طلعنا فوق. نحن في مرحلة المجموعات ...وانتوا بتطلعوا من التمهيدي دور ال (64). تقول زارعين ليكم (بصل). بصل تاني. الليلة (البصل) الشابكنا بيه دا من الصباح جايبو من وين؟. هسع في زول عاقل كدا بطلع من دور ال (64). يطلعوا من (التمهيدي) ويتفرغوا لينا للفارغة. ما عندهم شغلة. ما في حاجة وراهم. غايتو لو لاقيتونا بي فريقكم الكلو (باكات) دي في نهاية الدورة الاولى للممتاز ...إلا تجيبوا (سيحة) يحكمها ليكم. طبعا انتوا ما عندكم مشكلة ..ناسكم ديل كلهم (سيحة). ما بقصروا معاكم. ناس سيحة ديل مع الاهلي شندي ما بقصروا. هسع سيحة يوم الجمعة يجي يقول لينا الصورة ما واضحة. ورضا مصطفى الشيخ يقول ليك (جهاز الاعادة) اتعطل. وكدا ارجع لينا شوية يا مخرج البرنامج. وسيحة تاني يقول ليك لون النجيلة...ومن هنا ما بنقدر نحدد صحة القون. الحاجات دي نحن شربناها شراب. حفظناها حفظ. فترنا منها. عشان كدا يوم الجمعة القادمة ..شوفوا ليكم (بث مباشر) كدا ..اتخارجوا بيه من الموقف دا. ان شاءالله تشوفوا ليكم (وضع حجر اساس). افتتاح كوبري. اي حاجة. او كلموا (سيحة) يعتذر..كلموه ما يجي ..عشان ما يتحرج ساكت. ملحوظة : مفتاح كادوقلي كم؟. هوامش الفلق دا فلق جماهير المريخ. ناس الهلال ما بفقلوا. الجمهور البفلق دا ما جمهور الهلال. اقول ليكم حاجة. دا جمهور سيكافا. المشجع دي مشجع سيكافا. نحن لا بنعرفو ..ولا شفناه. مباراة المريخ وسيمبا مرة مات فيها (صحفي) تنزاني. ناس المريخ ..قالوا لينا الصحفي المات دا كتلو جمهور سيكافا. الهلال قبل مباريات المجموعات ..محتاج الي ان يلعب مباريات اعدادية من اندية افريقية قوية..من اجل ان يدخل البدلاء في الفورمة. لا بد من ان الاستفادة من صلاح الجزولي ووارغو وسيمبو ومالك وسامي عن طريق مشاركتهم في مباريات ودية قوية. تصريحات الفاتح النقر ...ح تزيد الايام القادمة بصورة كبيرة. تاني زولكم دا في (الطابونة) ح تلقوا قاعد يصرح. خلاص غلب الهلال ...ما مصدق. ان شاءالله يا الفاتح النقر تجي الاول. شابكنا السنة كلها ...الدوري مقلوب ..الدوري مقلوب. باقى للتسجيلات 53 يوم. طبعا نحن عندنا بطولة خارجية ..وبنمثل السودان عشان كدا مهتمين بالتسجيلات. انتوا تسجيلاتكم يا ناس المريخ لو عملتوها في (طوب) افضل ليكم. ..... عاجل : يا النابي ما ترفع القزاز...الموضوع دا بدري عليه.
