اولاً اذا اعتبرنا (افتراطا) كدا ...انو (البطيخ) من (الطيور). دا (اقتراع) مني. اقتراع جديد. لو اعتمد لينا المعلومة دي هيئة الابحاث. اصلهم بعتمدوا ساكت. وصدقنا النظرية. وجبناها في الجرايد. ودرسوها للطلبة في مقررات (الجغرافيا). واعتبرناها (انجاز) لينا... البطيخ من الطيور. في طيور (زاحفة) يا عالم؟. انت مالك عاوز تلخبط لينا من الصباح ..(عامل طاقيتك المشخطة دي). علاقة (الطاقية) ذاتها بالكلام دا شنو؟. الالماني (اتوفيستر) دا ..قعد يشخط. يعني قعد يلخبط. بقى يتكلم ساكت. بهضرب بالالماني. الكبر دخل عليه. اتوفيستر ابو (77) سنة ...البشوف ليك (الكشافات) متل (الشخيط). وبشوف ليك موسى الزومة ...متل مدير الاستاد. عارفين الزول دا قال شنو؟. في صحيفة الهدف جاء هذا التصريح (اشاد مدرب المريخ اتوفيستر بفريق الاهلي شندي ووصفه بالفريق الخطير ومنحه لقب الفريق الثاني في السودان و قال بأنه يملك لاعبين مميزين و مدرب متميز بدليل انه استطاع ان يحقق الفوز ب(4) من اصل 6 نقاط في مبارياته امام الهلال و المريخ في الممتاز و قال بأنه الان الفريق الثاني في السودان بعد المريخ وقال بأن الهلال فريق عادي و ليس بالمرعب و المخيف في الفترة الحالية رغم انه تأهل إلى المجموعات مشيرًا إلى انه لن يفرط في نقاط مبارياته المقبلة و سيعمل على تحقيق الفوز في المباراة المقبلة امام النيل في بطولة الدوري الممتاز). الكلام دا قالوا منو؟. قالوا اتوفيستر. اتوفيستر الذي سوف يلعب امام النيل. النيل دا هو عاوز ليه مدرب. لو رسلتوا الحصاحيصا ..صديق علي صالح ..بجيب ليكم (النقاط) ويرجع. ولا تتعبوا ناس بلة جابر ديل ساكت. الموضوع دا ما بستاهل. ما تبقوا (شفقانين). اتوفيستر قعد (يخرف) لينا. انتوا الزول دا بقى (يخرف) عينك عينك كدا وكمان في الجرايد. بقى يهضرب. الزول دا خرفو كعب عديل كدا. الخرف الالماني ...(عجيب)..قالوا ليك الالماني وقت يكبر بطلع في عمود الكهربة عشان يتحدث عن وعد بلفور. عليكم الله وعد بلفور دا ..عاوز ليه (الماني). وفي الالمان ...كمان يطلعوا ليه في العمود. دا خرف عجيب. اتوفيستر دا معقول (الكبر) اثر في قواه العقلية إلى هذا الحد. يعني معقولة يكون ما عارف ان المريخ طلع من دور ال (64). عمكم المخرف دا قال شنو؟...قال المريخ الفريق الاول في السودان. زولكم شطح. ونطح. وقال شنو؟. قال الاهلي شندي ..الفريق التاني في السودان. يعني الاندية التى خرجت من دور ال (64) والتى طارت من الكونفدرالية ..افضل من فريق مصنف على نطاق افريقيا ضمن التمانية الكبار. فريق بيلعب في المجموعات. انتوا الالماني دا ما بشوف. دا شغل زول (عميان) عديل كدا. اتوفيستر قال الهلال ليس بالفريق المرعب ولا المخيف ..(طيب بترجفوا مالكم زي نار القصب؟). مالكم بتجروا للتأجيل؟. مالكم بتجيبوا لينا حكام ..الواحد من قوتو عينو هدفين ما بحسبهم للهلال. البخليكم ترجفوا شنو؟. وقت الهلال دا ليس بالفريق (المرعب). دا انتوا بتترعبوا من ضلكم. يا اتوفيستر الكلام دا ..ابقى عليه ..وليك عليّ الهلال لمن يقابل المريخ ..يفرتكك يا اتوفيستر ضلعة ضلعة. الهلال ح يفرتك ناس بلة جابر ديل عصبة عصبة. كل عصبة تمشي ليها على حتة. خلوا الهلال بس يقابل المريخ في قمة الممتاز..لو ما لقيتوا موسى الزومة دا ..مفرتك قصبة قصبة..لوموني. فرتيك شديد. ما ح نخلي ليكم شيء. بعدين انت يا اتوفيستر لو مركز شديد كدا ..وما عندك مشكلة في الذاكرة تفتكر ناس جمال الوالي ديل كانوا جابوا ليك احمد ساري. احمد ساري دا انت عارف جايبنو ليه؟. احمد ساري دا ما جايبنوا لي ناس بلة جابر وموسى الزومة؟. ابدًا. احمد ساري دا جايبنو ..عشان يحرسك انت. انت ما بتشوف بعد المغرب ...عاوز ليك زول يبقى ليك دليل. وصاحبكم مع (خرفو) دا ..بتكلم عن الهلال. الهلال الذي يلعب في مرحلة المجموعات ..بتكلم عنو واحد فريقو طلع من دور ال (64). يا ود لا. انت عاوز ترجع سريع إلى المانيا يا اتوفيستر. عاوز تمشي اهلك من بدري. نحن خلاص حجزنا ليك ..ح نلحقك كروجر ..وعصام الحضري. انت عارف كروجر مشى وين؟. كروجر طفشناه انبي. عصام الحضري بعد العمر دا...مشى وادي دجلة. وانت يا اتوفيستر ليك عليّ...نرجعك (بتروجيت). طلعنا ليك التذاكر. عفشك داخل الميزان. بس انتظر لقاء القمة القادم ..وقابلنا بالاحساس دا ..عشان تشوف البحصل عليك شنو؟. عصام الحاج تاني ح يرجع يكتب. وتاني ح يطلع بيانات. وابراهومة ..تاني برجع بمسك الفريق ...ما بتلقوا غير ابراهومة في اللحظات الحرجة ديك عشان يمسك ليكم الفريق. وجمال الوالي ..ح يرجع يزعل مرة اخرى ..ويقول ما عاوز كورة. يقوم يعمل شنو؟. يقوم يشيل (شنطتو)..ويمشي البيت. المريخاب يقوموا يحنسوا فيه. يا جمال لازم ترجع. يا جمال نحن ما عندنا زول غيرك. يا جمال لا. يا جمال ما تعمل فينا كدا. يا جمال يا سيد المقصورة. يا جمال يا العملت الطابق التاني. يا جمال يا صاحب اكبر شعبية لرؤوساء الاندية العربية. يا جمال نحن ما ح نبقى براك. يا جمال لا. ح ترجعوا تاني تتجرسوا فينا ...نحن عارفين الحركات دي. الحاجات دي ح تحصل بعد مباراة القمة القادمة..انا الفيلم دا شفتو قبل كدا. جمال الوالي مشى يقعد ليه (6) شهور في البيت (نقاهة)..وتاني يرجع. اصلو ما في زول بقدر يستحمل المريخ دا سنة مستمرة كدا. لازم الواحد يزعل شوية كدا ..ويقعد في البيت (6) شهور. يزعل جمال الوالي ..يظهر عصام الحاج. يرجع جمال الوالي ..يزعل عصام الحاج. زعليبة شديدة. عليكم الله ما تقعدوا (تزعلو) فينا كدا. جمال الوالي وقت يرجع بعد (الزعلة)..تاني ح يغشكم. ح يقول ليكم ح اجيب ليكم محترفين كبار..وانتوا ح تصدقوا. تصدقوا زي حكاية البطيخ من الطيور الزاحفة. وجمال الوالي ح يقول ليكم ..ح نجيب لينا جهاز فني مقتدر. وح نعمل لينا طابق جديد. وانتوا تصدقوا..وتقعدوا تتفرجوا فينا. وح يغشوكم تاني ..وح يقولوا ليكم ح تلعبوا مع بايرن ميونخ. وانتوا (الضحك) ح يشرطكم. فرح شديد. الموسم الجديد يبدأ ..تلعبوا (تمهيدي). تلاقوا كمبالا سيتي أو القطن التشادي أو اتراكو البورندي..تقوموا تعملوا شنو؟. تقوموا تطلعوا من دور ال (64). تقولوا دي ما مشكلة. والكورة اصلها مدورة. والاعداد للموسم لم يكن جيدًا. تشوفوا ليكم اعذار من مافي كدا ...تطلعوها للناس ..وتقنعوا بيها (الصفيح) دا. نقوم نحن نقول ما مشكلة. يعني شنو؟. بتحصل على اعلى المستويات. نلم فيكم في قمة الممتاز ...نرجع تاني نفرتكم ..عصبة ...عصبة. جمال الوالي يزعل. عصام الحاج يقول انا ما قلت ليكم. اعلام المريخ يقول اشطبوا موسى الزومة. كلو من موسى الزومة. هسع عليكم الله (الافلام) دي يا مريخاب ..انتوا ما قاعدين تشوفوها في كل موسم. الغريبة ..صابرين ..وما قادرين تقولوا أي حاجة. الوحيد فيكم لمن يقرب (يتفقع)..يقول ليك والله نحن عندنا (مقصورة) جميلة. عليه ..وعطفاً على كلام (اتوفيستر)..ومن هسع بقولها ليكم يا جماعة ..نحن المريخ في مباراة القمة القادمة ح نفرتكو ليكم. ح نعمل ليكم عمايل. انتظروا القمة القادمة ..وشوفوا الكلام دا بحصل ولّا ما بحصل. من هسع قالوا ليك جمال الوالي بحضر في (زعلتو). يا عصام الحاج خليك حريف ..ادخل ليك في (صندوق) عشان المرة القادمة لمن جمال الوالي يزعل يكون عندك القروش البتقدر تمشي بيها حال المريخ. ملحوظة : ما تعملها لينا كلها (بيانات). هوامش التسجيلات باقى ليها شهر ونص. مطلوب من الهلال ان يحسم هذا الملف مبكرًا ..ويستلم اوراق اللاعبين من الان. اضافة حقيقية يحتاجها الهلال في جانب المحترفين. سيدي بيه ووارغو وسيسيه واتير توماس ..يجب استمرارهم. يمكن للهلال ان يبحث عن بدلاء لسيمبو وكوليبالي. اضافة إلى ان الهلال اصلاً عنده خانة لم يستفد فيها في التجنيس. المريخ فيه عدد اكبر من الاجانب. مباراة الهلال امام مريخ الفاشر إن شاء الله الهلال قادر على تحقيق انتصار في هذه المباراة. والانتصار في مباراة الفاشر ..سوف يجعل الهلال قاب قوسين أو ادنى من اللقب. فقط مطلوب الانتصار امام مريخ الفاشر. فيصل العجب سوف يلعب امام الهلال بدوافع كبيرة. اول هذه الدوافع وعد الهلال له ..دون ان يسجله. تاني الدوافع..سوف يحاول فيصل العجب اثبات ان ذهابه إلى الفاشر كان قرارًا صحيحاً للمريخاب ..وذلك بالتسجيل في شباك الهلال. لذلك فيصل العجب يجب ان يضع تحت رقابة قوية. المهم ان القطاع الرياضي في الهلال يهيئ الاجواء. لا بد من ان يتخلى النابي عن تلك الروح العدائية. صلاح محمد آدم عندما كان يقود الهلال ..خلق مجموعة كبيرة من اللاعبين الجاهزين. لم يكن هناك لاعب لا يشارك. بل ان صلاح محمد آدم ...كان يشرك حتى لاعبي الشباب. كان محمد عبدالرحمن يشارك بصورة مستمرة ..وكذلك اطهر الطاهر. الان نجوم كبار في الهلال لم نعد نشاهدهم. على النابي تصحيح الاوضاع بانتصار كبير إن شاء الله على مريخ الفاشر. اذا اتجه المريخ نحو مفاوضة اطهر الطاهر ..على الهلال ان يتجه نحو ابراهومة. وابراهومة اصلاً عاوز الهلال ..يعني ما ح تتعبوا معاه كتير. حسم ملف لاعب هلال الفاشر احمد حسن الان ..شيء لا بد منه. اللاعب مكانتو الهلال. وزير الشباب والرياضة بولاية الخرطوم بلة يوسف عليه ان يحسم امر مجلس الهلال. الهلال مقبل على مباريات مهمة في الدوري المحلي. والهلال مقبل على مرحلة المجموعات. والتسجيلات على الابواب. لماذا كل مرة يترك الهلال هكذا غير مستقر عند اقتراب فترة التسجيلات ..وعند الاقتراب من مراحل مهمة في الدوري المحلي والتنافس الافريقي. ننتظر من الخندقاوي ..ان يحضر للهلال (سادومبا). لو الخندقاوي عاوز ليه (دعاية) كاربة ..وجميل سوف يحفظه له الاهلة طويلاً ..عليه ان يتولى امر سادومبا ..وان يعيده للهلال مهما كلفه ذلك. حتى لو كان الهلال لن يستفيد من سادومبا في البطولة الافريقية. عاينوا لي بعيد. وارموا قدام. وانتظروا الفرح ..فهو قادم. ........... عاجل : اتوفيستر سوف يلعب امام النيل ..وبتكلم عن الهلال الذي يلعب في مرحلة المجموعات.