* بعد ما جمعة جينارو (شبع نبذ وشائم) جاء رئيس الزمالك لمعسكر الهلال وقدم إعتذاره.. * وإعتذارك ده يا مرتضى منصور لو قبلناهو منك ان شاء الله نلحس مكوة.. * اعتذارك ده مرفوض في الوقت الراهن.. * سنقبل اعتذارك بعد مباراة الرد.. * المصريين لسه بتعاملو معانا على اعتبار ان (الزول السودانى هو مجرد بواب) .. * وإحنا عشان بوابين ما بنقبل الاعتذار حاليا.. * موعدنا المقبره ، ولما نتلاقى في المقبره (الفيهو طيب بنشم) .. * تصل البعثة الهلاليه اليوم.. * ونرجو ان يكون (بص) المريخ المخطط في انتظار البعثة بالمطار.. * البص الأحمر المخطط بالاصفر التابع للحكومة يفترض يجى المطار عشان الهلال جاي.. * المريخ لم يستفيد من هذا البص ولذلك يجب منحه للهلال بقرار من مكتب والى الخرطوم.. * والله أنا لو عندى سلطة الاستاد بتاعكم ده بقلعو منكم ومعاهو البص.. * استاد شنو كمان ؟؟ * كورتكم دى ما دايرة ليها (استاد ملك) .. * تشوف ليكم (استاد إيجار) .. * السخف البتعملوا فيهو ده مفروض تلعبو في (النقعة) .. * سقوط المريخ من دورة (حوض النيم) كارثة.. * وأنا ما بقول كارثة بالنسبة للمريخ.. * المريخ تطيرو عيشتو.. * كارثة بالنسبة للهلال.. * عيب والله يكون المريخ هو ند الهلال.. * عيب كبير.. * إحنا ما بنتشرف بند زي المريخ ده.. * فريق بيطير من اى بطولة.. * في حقنا شينة شديد.. * اى فريق في الدنيا عندو (اطراف ملعب) إلا المريخ.. * المريخ بدل الاطراف عندو (جنحين) .. * جناح بالشمال واليمين ولذلك هو (فريق طيارة) .. * عشان كده إعتبارا من السنة الجايه بنشوف لينا ند جديد.. * الزول الشاطر اندادو بيكون شُطار والبليد كذلك.. * (الانداد) مستوياتهم بتكون قريبه من بعض.. * هسه أول الفصل ما بيصاحب طيش الفصل.. * ناس البيت لو عرفو إنو ولدهم اول الفصل مصاحب طيش الفصل ممكن ينقلو من المدرسة عديل.. * التلميذ (النجيب) هو الذى يتحصل على المركز الأول في (فصل مليان أولاد شُطار) .. * والتلميذ (البليد) بيجي التانى في (فصل ما فيهو ولا تلميذ) .. * يمتحن براهو ويجى التانى.. * والمريخ في إمتحان الابطال جاء ال(64) في فصل فيهو (32) فريق.. * الفصل فيهو (32) يعنى المريخ المفروض يجى في المركز (33) كشئ طبيعى.. * طيش افريقيا في حوض النيل جاء (التامن) ، مع إنو الفصل فيهو تلاته فرق.. * بطولة حوض النيل دى غير أهلى شندى ما فيها فريق ومع ذلك المريخ جاء التامن.. * عشان كده (الحمام) في السودان إعتزل الطيران.. * الأن يمكن ان تلف في الشارع اسبوع كامل لا تشاهد (حمامه طايرة) .. * الحمام تنازل عن الطيران للمريخ.. * المريخ هو خير خلف لخير سلف في الطيران.. * لكن أنا عندى اقتراح.. * بقترح لجمال الوالى يستغل سمعة المريخ في (الطيران) ويفتح (وكالة) .. * المريخ حقق سمعة رهيبه جدا في (الطيران) ولذلك اية مشروع استثمارى بهذا الخصوص سيدر مالا غزيرا لخزينة النادى.. * بقترح كده.. * وأى زول طبعا حر في (مقترحاتو) .. * مدرب ألمانى ومساعد مدرب مصرى وتسعة محترفين واعداد في الدوحة وبايرميونخ وبص جديد ومعسكر في برج الفاتح وبعد ده كلو طيران من بطولات (الرجال) وطيران من بطولات (الاطفال) .. * بطولة الرجال (ابطال افريقيا) وبطولة الاطفال هى (الحوض وسيكافا) .. * عليكم الله هسه ما خجلانين ؟؟ * أكتر حاجة مزعلانى هى (البص) .. * قالوا البص عشان يستقبل اللاعبين في المطار!! * ياتو لاعبين البيستقبلهم البص ديل ؟؟ * المريخ ده فيهو حاجة غلط.. * صدقونى الموضوع ما موضوع كورة .. في حاجة ما ياها.. * فريقكم ده ممحوق.. * في زول عامل ليكم عمل.. * بيكون ناس الترجى التونسى عملوا ليكم عمل يا سلك.. * أو احتمال يكون ناس الوحدات الاردنى هم العملوا ليكم عمل.. * آخرتها طيران امام (اكاديمية تشيتى) .. * ده شغل عمل عديل يا معاوية الجاك.. * ما في فريق نصيح كده بيطير قدام تشيتى.. * معقولة فريق اسمو زي (العطسه) يطيركم.. * يعنى الفريق ده لو كان اسم زي (القحه) كان غلبكم عشرة.. * تشيتى .. اسم (عطسه) .. * فريق زي ده دخل البلد دى بكرت صحى ولا ساكت كده.. * الطيران ما مشكلة لكن انا خايف كل لاعبو المريخ تجيهم (نزلة) على حس (تيشتى) ده.. * الله يكون في عيونك.. * حالكم يحنن الكافر.. * الناس وكت يكون ما عندها دم مشكلة.. * غايتو جنس غايتو.. * و..و.. * ومن حالتك الفوقك الله يصبرك يا ...(جمال الوالى) ..