* أيها الناس * إذا كان الهلال قد شارك فى سيكافا قريب عشرة مرات * وغلبو يجيبها * بل غلبو يلعب فى نهائياتها *كيف نجى نصدق الأهلة فى كلامهم عن ضعف الدورة؟؟؟ * ولماذا تحبط جماهير المريخ من مجرد تريقة زول غالبو يتحصل على بطولة إستعصمت عليه طول عمرو؟؟؟ * ولماذا نحكم على البطولة بالفشل عن طريق مقاطعتنا لها؟؟؟ * وهل بساطة القول أن المريخ ينظم الدورة عشان خرج من الأبطال نصدقها؟؟؟ * وإذا كانت هى بطولة ضعيفة * كم مرة أحرزها الهلال القوى الكبير؟؟؟ * الهلال عندو مرضت بطولات قارية وإقليمية * لذلك يحاول تبخيس البطولة * مرضان عديل كده * عندو علة صفر متاوراهو خمس وتمنين سنة * عيان * يا شافى البلا * أيها الناس * سيكافا من أعرق البطولات الأقليمية الأفريقية * وأقواها * بدليل ان معظم الفرق التى فازت بها * فازت أيضاً ببطولات أفريقية قارية * وعندكم المريخ وقورماهيا وغيرهما * ومازيمبى ذاتو * لما غلب الهلال خمسة * كان يا دابو طاير من سيكافا * حتى الأهلة وقتها قالوا المريخ أعد مازيمبى بسيكافا * أيها الناس * لاتبخسوا أشيائكم لأقاويل لا تشبع ولا تغنى من جوع * صحيح كان علينا أن نشارك فيها ببعض الشباب والرديف * لصقلهم * ولإكتسابهم الخبرات * أيها الناس * الدفاع التكتيكى الذى لعبت به فكتوريا ضدنا ده * ناس روشا ديل شافوا زيو قبل كده؟؟؟ * ناس خليفة ديل بعرفوا إنضباط زى ده؟؟؟ * أيها الناس * هذه البطولة مفيدة جداً * وتقوى العود وتأهل الناس * لذا * إذا أسموها حوض البط(بعد إضافة حوض النيل للتسمية) * فنحن نقول لهم صاح حوض بط * والبط بعوم * لكن الحمام ما بعرف يعوم * بشتت الموية ساى وهو قاعد فى مكانو * الحمام ما بعوم * عشان كده الحمام ماشال سيكافا حوض البط * بعوم البط والوزين بس * الحمام بطير * الصباح او الضهر أو العصر بطير بطير * أى ان الوكت بطير * والسرير التانى بااااااااااارد * وحم حم يا حمام شتت ليك سكر * المهم * مستوى سيئ شديد ظهر به المريخ أول أمس * بل ظهر به طوال هذا الموسم * والسبب ببساطة يعود الى ان المريخ يلعب بدون صانع العاب * الحكاية ما لعب عشان نلعب بدون صانع لعب * ففيصل وشيميلس ماقدر طموحات الجماهير * وكل التسجيلات التى نسمع عنها * ما سمعنا فيها بى صانع لعب * يعنى كأننا ما سوينا اى شى * وصانع اللعب الوحيد بالمريخ حالياً * موش بالمريخ بالبلد كلها * هو سيدا * ومن الملاحظ ان العد التنازلى الذى بدأ هذا الموسم * بدأ منذ توقف سيدا أو إيقافه أو إعلان الحرب ضده * وزى ما قال سعيد السعودى * هيثم قائد لايحتاج لشارة قيادة حتى يقود الناس * هيثم قائد وصانع لعب * وكوننا ما نستفيد منو تبقى مشكلة * من هو صاحب المشكلة؟؟؟ * ولماذا عمل المشكلة؟؟؟ * وما هى أسباب المشكلة؟؟؟ * وهل تحل المشكلة بى مشكلة؟؟؟ * كل ذلك ستعرفونه * إبقوا معنا * المهم * نحتاج لجهود هيثم وخبراته حالياً وبعد الإعتزال * وإذا هيثم ما دايرنا(ودى طبعاً مستبعدة جداً جداً) * يبقى ده شى تانى * ولكن طالما هو متمسك بينا * ورافض لندنا * لو يخلى الكورة ما برجع هناك * فأنا أثق فى كلمته التى قالها لى * ويا فطومة هيثم تانى ببح * تشموهوا قدحة * المهم * هيثم صانع الألعاب الوحيد حالياً * ونتمى ان نسجل صانع العاب مهارى وقوى وصغير السن * فالمحاور عندنا أفضل محاور فى القارة * علولو وباسيرو وباسكال وكبير * يبقى صانع لعب شاطر * كلو فار بدخل جحرو من الدقيقة خمسة * يبقى يعود هيثم ونسجل صانع العاب تانى بمواصفات محددة * دقدق زى ناس شيميلس وفيصل وغيرهما ما بنفعوا * نحنا بنلعب أفريقياً ما بنلعب تايوانياً * المهم * ناس روشا لسه فى قصة المصور * كدى يا روشا عاينوا للكاميرا ما كاتب فيها شى الفرعون ده!!!! * أيها الناس * السرير التانى مفرش * وبااااااااااااارد * وبعد مشاهدتى لمباراة الترجى وسطيف * صدقونى السرير التانى حايتشرف بى سيدو ويتغرش خمسة وتمنين سنة تاني * المهم * أمس حضرت تمثيلية مصرية * فيها إتنين أصحاب * عبدالستار وعبد الشافى * عبدالستار عايش على الحظ * وعبدالشافى مؤمن بان من كّد وجد * عبدالستار قاعد فى محلو * وعبدالستار ماشى لى قدام * واحد فى التمثيلية قال لى عبدالستار * يا عب ستار فين عب الشافى؟؟؟ * عبدالستار قال ليهو * عب لاشافى راح خلاص بقى فى العلالى * قام قال ليهو * وانت لسه آعد يا عب الستار؟؟ * طول العمر آعدلى يا أخويا فى مطرحك وما عملتش حاجة؟؟؟ * خمسة وتمنين سنة آعدلى تتفاصح لا شغل لا مشغله؟؟؟ * يالا..فتح عينك يالا * عبدالستار * أقصد الهلال * مفروض يبطل فصاحة ويعرف كيف يجيب كاس زى الناس * فطوم أختى * دايرين بطولة جوية!!! * بتطولوا وتاخدوا مدة * أها * نجى لى شمارات والى الخرتوم * أكان شفت يا والينا * كنا بنتونس كتاااااااااار * بنتكلم عن كيف تعرف البلد متقدمة ومستقرة * واحد قال لينا * إذا عايز تعرف البلد وحالها عاين لى التكسى فيها * لو لقيتوا آخر موديل وشغال يبقى أكسر فيها * دى بلد بتدى الجميع مواطنيها والما مواطنيها * وإذا لقيت تاكسيها أمجاد سايقنها خريجين * حدك فيها يومين قبل ما يكمل التموين * دى بلد ما بيسكنها الضبع ولا المرفعين * واحد تانى قال لينا * لو درت تعرف حال البلد عين لى ناس البلد الكاسحين * لو لقيتم نايرين وقاشرين وقماشهم شوية حدو ركب الرجلين * وبالناس ما شغالين ومتنزهين متفسحين عاد دى بلد تمشى منها وين * لكن لو لقيت البلد كلها بعوض نوناى * ناسها دايشة ما حافظة أسم زول تناديهو هناى * بناتها بلقطن رزقن الحلال من كفتيرة شاى * وأطفالها يورنشو فى جزم الناس والجزم مقددة بى جاى وبى جاى * كسح يا حبيب دى ما بلداً بتحقق ليا مناى * نطة بتاع بحر كان قاعد معانا * قال اهم حاجة فى البلد حاجتين * النسوان والسياسيين * لو ماعندهم كرش يبقى البلد متين وآمين * ولو عندهم كرش يبقى إنتهينا يا حلوين سلك كهربا ننساك كيف والكرش أقبح مشهد فى البلد. والللللللللللى لقاء سلللللللللللللللك في السلك - بابكر سلك
