لي خمس بنات 3 منهن بدرسن في جامعة الخرطوم وولد في الاساس سمعت انه جمال الوالي زول كويس بس انا ما داير منو قروش، بس يفتش لي وظيفة في محل حتي لو خفير في نادي المريخ
كتير مرات نكون شغالين في بيت سيدو يطلع مريخابي لامن الجماعة يقولو ليهو دا منصور سبت يستغرب وفي وحدين يتأثرو شديد ويبكوا! النجم الذي هتفت له الجماهير واوقف حركة المرور في شوارع الخرطوم يوما ما
اسم ملأ الدنيا ضجيجا وشغل الناس لسنوات،، وضع البسمة على الشفاه وزرع الفرح في كل بيت سوداني،، استقبلته جماهير الشعب السوداني في مطار الخرطوم الدولي ثلاث مرات وهي تهتف (فوق فوق سودانا فوق) ورددها معهم في احدي المرات الشهيد اللواء الركن الزبير محمد صالح نائب رئيس الجمهورية في ذلك الوقت، نجم اوقف حركة المرور في شوارع الخرطوم واجبر الرجال علي ذرف الدموع وتغنت الجماهير باسمه الذي صار علي كل الشفاه. انه اسطورة زمانه ونجم نجوم المريخ والكرة السودانية منصور سبت احد ابطال الكاسات الثلاثة المحمولة جوا التي احرزها المريخ بداية بكاس اندية شرق ووسط افريقيا (سيكافا) بموانزا ودار السلام مرورا بكاس دبي الذهبي الذي اقتلعه منصور وزملاؤه الاشاوس من الزمالك المصري ايام مجده وجبروته ثم كاس الكؤوس الافريقية (كاس مانديلا) من الاراضي النيجيرية. توارى عن الانظار، ظللت ابحث عنه بواسطة زملائه الذين يقاسمهم الانجازات حتي تمكنت من معرفة موقعه. ادرت محرك سيارتي وقصدت منزل نجم الهلال السابق عبدالرحيم برشم بالفتيحاب طلبت منه ان يرافقني وتحركنا قاصدين مربع 19 (درجة اولي) بالفتيحاب ووسط البنايات السامقات عثرنا علي نجمنا الفنان (الباك اليمين) الحريف الرشيق وهو يحمل اكواما من الطوب صعودا ونزولا في بناية من ثلاثة طوابق واحيانا في يده (كوريك) يبعثر بها (اكوام) الرمال في هجير الشمس، المنظر لايحتمل مهما كان صبرك حتي برشم الذي يعيش ظروفا اسوأ لم يحتمل ، لابد ان تنهار لنجم عاش زمانا تهرول الناس من خلفه، رغم المرارة والتعب الذي انهك جسده قابلنا بابتسامة سألنا عن احوالنا واهلنا واولادنا، وقال (تشربو شنو) وهو يتوكأ علي آلة حفر الرمال(الكوريك). *………. قلت له: مازلت تتمتع بقوة شبابك ورشاقتك. ضحك كعادته وقال،، الحمدلله الواحد شغال تمارين طوالي من الصباح لحدي العصر شايل قدح مونة طالع وشايل بواقي طوب نازل من سلم لسلم ولو ما عملنا كدا نأكل الاولاد لقمة حلال من وين وندفع حق المدارس والكتب والكراسات من وين وانت عارف الظروف بقت صعبة وانا عندي تلاتة بنات دخلوا جامعة الخرطوم وواحدة في الثانوي والخامسة مع اخوها في الاساس، هنا قاطعته بسؤال قلت له في ياتو كليات البدرسن في جامعة الخرطوم ، ضحك وقال لي الكليات دي خليها عشان مافي واحد من الجامعة يشيل الجريدة ويمشو يقولو ليهم دا ابوكم اللعب في المريخ شغال (طلبه) مع انو شغل شريف. *…… من متين شغال في الشغلانه دي. من سنة 2008 لانو قبال كدة كان عندي كارو بتاع موية والشغل بتاع بيع الموية ما مغطي معاي واتجهت اشتغل عامل بناء لحدي هسع، *………. وين الكارو لسع مابقي (ركشة) كعادته وسخريته ضحك وقال: والله رغم انو قدم لي مساعدات كويسة لكن الظروف خلتني ابيعو قبال زمن (الكارو والحمار) *……… شغل البنا دامعاك كيف واليومية بكم. هو شغل متعب شديد ومرهق كونك تكون عتال من الصباح لحدي العصر، لاكن مافي حل تاني واليومية كانت 15 جنيه لكن هسع زادت شوية. *…….. كنت تعمل في بنك السودان خليتو مالك. انا ماخليت البنك رفدوني عام 2002 وللاسف الشخص الرفدني رجل رياضي واداري في نادي الموردة وعارف ظروفي كويس جدا وكنت متخيلو ينظر للعيال ما لي انا *……. سبب رفدك شنو. انا كنت في بنك السودان سايق حافلة 14 راكب ترحيل موظفين وفي يوم من الايام اولاد من الحلة سرقو العربية والشرطة وجدت العربية وسلموها للبنك وناس البنك قالوا لي نحن حنعالج الموضوع دا اداريا وقاموا فصلوني بسبب الاهمال، بعد داك الظروف بقت صعبة واشتغلت حاجات هامشية كتيرة منها عملت كارو ومانفع واقتنعت بشغل البنا لحدي ما ربنا يفتحا علينا وانا مقتنع بقسمتي ……. ما مشيت لجمال الوالي مالك. والله انا بسمع انو هو راجل كويس واشتغل في المريخ شغل كويس لكن يوم مافكرت امشي والسبب انا بشوف انو نحن جيلنا ادي دورو وانتهى واصبحت الفرصة لجيل جديد ولكل جيل زمانه ونحن جيل (اجزلنا العطاء ولا نستجدي الوفاء) والمرحوم الصحفي عبدالمجيد عبدالرازق كتب عننا كثيرا وبرضو مافي نتيجة ولو لاقيت جمال الوالي وداير يساعدني ماداير منو قروش، بس يفتش لي وظيفة في محل حتي لو خفير في نادي المريخ اوالاستاد، وهمي كلو شغل ثابت عشان الاولاد وعشان ما ننسي الناس الساعدوني زميلكم مزمل ابوالقاسم وقف معاي انا ومنصور بشير تنقا وشغلنا في البترول ومشينا هجليج قعدنا ست شهور وجينا راجعين لانو ماثبتونا وانا بشكر مزمل شكر شديد وهو راجل ماساهل الله يدي العافية *…… لاقتك مواقف في شغلك دا. كتير مرات نكون شغالين في بيت سيدو يطلع مريخابي لامن الجماعة يقولو ليهو دا منصور سبت يستغرب ويبدأ يعاملني بطريقة مختلفة ويساعدني ويديني اكتر من حقي وفي ناس ما بتحملوا لامن الواحد يعرف انو دا منصور سبت شغال يومية في بيتو ويحمل قدح المونة يتأثروا شديد(بكاء) وكمان في ناس بجو بالشارع وانا بكون سامع واحد يقول للتاني معقول يكون دا منصور سبت ولي بس يكون كدا والمشاعر بتاعت الناس دي بتديني دافع وتشيل مني التعب وسخانة الشمس *…….. قاعد تتواصل مع زملائك. ايوا قاعد امشي ليهم وقبال ايام حامد بريمة جا من قطر في اجازة مشيت سلمتا ليهو ونحن كتير قاعدين نتلاقا في المحل بتاع الرجل المريخي الغيور صافي الدين في الخرطوم وعلاقتنا مازالت مميزة كمجموعة. *……. ماقاعدين تساعدو بعض. في تعاون كبير بينا ومرات نتمرن سوا مع النجوم الدوليين في الديم وانا شخصيا زملاي اللعبو معاي ماقعدين يقصرو برسلو لي وكل مايلاقوني بساعدوني وقبيل كنت بتكلم مع كمال عبدالغني في الابيض وهو برضو بدعمني في رمضان واقول ليك الكابتن طارق احمد ادم (ياسلام) عليهو راجل اخو اخوان، ودا كلو يوريك الترابط بينا *…….. واللاعبين الهسع عندك بيهم علاقة. انا ماقاعد امشي النادي ولا الاستاد لانو مرة مشيت والبوليس رجعني قال لي هوي يانت دا ماشي وين وماقدرت اتحمل الموقف ورجعت ، لكن علاقتي بابراهومة الصغير كويسة ووقت يلاقيني يسألني عن احوالي واولادي وما بقصر اصلو *……. انت سجلت للمريخ كيف. انتقلت للمريخ من مريخ جوبا عن طريق التحويل سنة 82 يعني من البيت الصغير جيت البيت الكبير والقصة انو جينا الخرطوم نشارك في دوري السودان وتم الغاء المنافسة ولعبنا مباراة ودية مع الموردة وكنت نجم المباراة وجاني في المعسكر صاحبي اسمو عادل من اولاد الجزيرة وقال لي ناس المريخ دايرنك وبالفعل جاني جورج فواز واتفق مع مريخ جوبا وتم التحويل في الزمن داك مافي زول بسأل من قروش *……… لقيت منو في المريخ من اللاعبين. جلال كباتة وضحية من كوستي ومقبول من الحاج يوسف وكنا جميعا نلعب في خانة واحدة وكذلك المرحوم سامي عزالدين وجمال ابوعنجة وحامد بريمة ومازدا والجيلي عبدالخير وعمار خالد وعادل امين وعاطف القوز وعطا ابوالقاسم وكمال عبدالغني والتاج حسن وبعد اول مشاركة رسمية لي دخلت التشكيلة ولم اخرج منها الا وانا مشطوب وقبلي كان مسيطر علي الباك اليمين جلال كباتة ومن الصعب ان تجد معه فرصة *…….. انجازاتك مع المريخ والمنتخب الوطني. مع المريخ جميع الانجازات المحمولة جوا سيكافا ودبي وكاس الكؤوس الافريقية الي جانب جميع البطولات المحلية من دوري محلي وكاس السودان من تسجيلي وحتي شطبي *……… منو من المدوبين دربك. جعفر ضرار سيد سليم الخواجة اليوغسلافي مستر مومو والالماني رودرف *…….. تشكيلة مريخية في ذاكرتك. تشكيلة غريبة جدا وضعها المدرب في نهائي سيكافا في يوغندا امام فيلا والكاس برة وخسرنا بهدف بسبب تلك التشكيلة الخاطئة لان المدرب قلب الخانات وكنا الاقرب للكاس *…….. مباراة في ذاكرتك. ضد الهلال سنة 84 انتهت بالتعادل 2/2 وكنت نجم المباراة *…….. لاعب في الهلال كنت تعمل له الف حساب. قالها بسرعة وقبل ان اكمل السؤال هو مصطفي النقر *……. كنت متخصص باك يمين. انا كنت العب جميع الخانات من الدفاع حتي الهجوم ماعدا حارس مرمى ما جربوني فيها
