3 اشخاص بينهم لاعب شطبوني وخماسية مازيمبى لا فيها شق ولا طق !! فتحت بلاغ في رئيس الهلال وخليت الجزء الاكبر من قروشي دعما للأزرق !! عمري ما شربت شيشه والحوت طلب مني العودة للمريخ وغنى لي في التلفون !! اللاعب البينتقل من المريخ للهلال بينجح اكتر من اللاعب البيمشى للمريخ !! إضاءة (مات) حموده بشير في حياته ثلاث مرات قبل ان يموت الموت الأخير الذى لا يعلم بمواعيده إلا الله العلى القدير ، وهذه الحلاقات المتتابعة من الموت ابرزت بشكل كبير قوة الإرادة عن ود بشير الذى إطلقت عليه جماهير الهلال لقب (الراجل) تقديرا لقوة شخصيته وحبه للشعار ، وليس سهلا ان تشطب من المريخ ثم تشطب من الهلال بوشاية وتاتى وتلعب في اهلى شندى بكل هذا الألق والامتاع ولكنه حموده إبن سنار الفارس والرجل الذى حفر على الصخر وصعد الجبل وقدم الكثير للسودان وللهلال فصار واحدا من الاسماء المهمة في تاريخ نادى الهلال الحديث وهو الآن يبني تاريخا حافلا في قلعة النمور مع الارسنال ، (قوون) ذهبت لحموده بشير بمنزله العامر بمدينة بحرى وحاورته عبر باب (60 دقيقة ونسه على الريق) فكانت الحصيلة شفافية واجابات صادقة وزاخر بالجديد وسنقدمها عبر حلقتين . مشاكل إداريه شطبتني من المريخ !! *كابتن حموده نستكمل اليوم الحلقة الثانية من الحوار ؟؟ جدا أنا جاهز . *في الحلقة الأولى أثار قولك (في المريخ كنت ماشى كداري وفي الهلال ركبت الأتوس والتوسان) أثار كثير من ردود الفعل ؟؟ نعم ولكن تبقى الحقيقة إنني في المريخ لم اركب عربة واول عربة إمتلكتها كانت ابان فترتي في الهلال وهذا قطعا لا ينقص من قدر المريخ كفريق كبير له قاعدة جماهيرية عريضة . *حموده كثير من الناس لا يعلموا الطريقة او السبب الذى شطبت به من المريخ ومن الهلال ؟؟ بالنسبة للمريخ أنا كنت مقيد تحت السن ومع ذلك كنت ألعب مع الفريق الأول وعندما إنتهت فترتي القانونية تحت السن يفترض اجدد العقد ولكن لبعض المشاكل الإدارية مع المجلس ذهبت للهلال . ود الياس والكيماوى وحسن وقفوا معي بشدة !! *كيف تقيم فترتك بالمريخ ؟؟ أنا جيت المريخ (صغير في السن) وحققت نجاحا معقولا ولعبت مباريات كبيرة ومهمة ومن خلال المريخ تم إختياري للمنتخب الوطنى الاول ، المريخ فريق كبير وله قاعدة جماهيرية وأنا حقيقة احب ان اشكر الأخوة في المريخ على تلك الفترة واخص بالشكر الريس محمد الياس محجوب والأخ حسن ادريس وعادل ابو جريشه وجمال الكيماوى ومحمد الجاك ضقل فهؤلاء وقفوا معى وقفات كبيرة ومشرفة اشكرهم وكل الأخوان . ثلاثة اشخاص شطبوني من الهلال ومن بينهم لاعب !! *شطب حموده من الهلال وهو في قمة النضج الكروى ولعل ما قدمته لأهلى شندى فيما بعد خير دليل على قسوة الهلال وظلمه لك بالشطب ؟؟ والله انا الهلال ده بيتي ومهما حدث يبقى بيننا محبة وتقدير ، قصة الشطب لم تكن واضحة بالنسبة لي كل الذى حدث طلبوا مني ان اخلي خانتي وفعلت ولكن فيما بعد علمت ان شطبي وقف من خلفه ثلاثة اشخاص اثنين من مجلس الإدارة وواحد زميل من اللاعبين . *حموده بما ان هذا حوار للتاريخ يجب ان تكشف لنا هذا الثلاثى ؟؟ لا لا طبعا هذا ليس مهم في الوقت الراهن أنا شطبت من الهلال واى حديث بعد هذا لا فائدة منه ، هم ثلاثة إلتقوا في جلسه وقرروا شطبي وقد حدث ذلك . *طيب البعض ارجع شطبك للاصابة والبعض الاخر ارجعه بسبب العلاقة القوية التى تربطك بصلاح ادريس ؟؟ في الأول لم اكن اعتقد ان التفكير سيذهب إلى هذا الحد ، لو قالوا اصابة فربما يكون معقولا ولكن علاقتي بصلاح فهذا امر مرفوض ، صلاح في يوم من الايام كان رئيسا للهلال وعلاقته بكل نجوم الهلال جيدة وليس حموده وحده وإذا كان الفهم هكذا يفترض شطب الفريق بكامله . البرير غلط في شطبى وحاول يصلح غلطو !! *ظاهريا شطبك البرير ، ماذا بينك وبينه ؟؟ والله البرير غلط في شطبي من الهلال بحكم انه رئيس النادى وأنا اقول البرير (بيسمع) أكتر مما (يشوف) ودى مشكلة لكنه في النهاية حاول يحصل غلطو وإتصل علي هاتفيا وطلب مني العودة للهلال واظنه احس بانه ظلمني ، أنا رغم كل الذى حدث بشكر البرير فهو رغم ما حدث إتصل وكان عندو رغبة يرجعني تانى ولكن لاسباب اخرى لم اعد لأن البرير في ذلك الوقت كان يواجه مشاكل تتعلق باستمراره في النادى . *طيب انت فتحت بلاغ في رئيس الهلال ؟؟ نعم فتحت بلاغ والحاجة دى ما بتشبهني لكن هم خلوني اعمل كده انا سلكت كل الطرق الأخويه ولكن شكل التعامل كان (شين شديد) من جانبهم . *بعد البلاغ ادوك قروشك ؟؟ والله عملنا تسويه منحتهم الجزء الاكبر وشلت الجزء الاقل لانو هم قالوا محتاجين للقروش ووافقت لهم تقديرا للهلال . *ماذا لو طلبوا منك ان تختم حياتك بالهلال ؟؟ دى ما دايره ليها كلام انا رهن إشاره الهلال ولكنني الأن مرتبط بعقد مع الأهلى شندى واقول لك حتى في حالة إعتزالي للكرة سأكون قريب من الهلال. تسجيل هيثم للمريخ غلط !! *صلاح إدريس إعتبر تسجيل هيثم للمريخ (جنون) فهل توافقه فيما ذهب إليه ؟؟ هيثم في الهلال عندو تاريخ كبير ولذلك افتكر انه إتخذ قرارا غير موفق نهائيا وبعض الناس من حوله انا لا اعلمهم ولكن كان يفترض ان ينصحوه بعدم الذهاب لان تسجيله للمريخ غلط . الخرطوم ما علمتني الايسكريم !! *حموده انت جيت الخرطوم للمريخ ولا جيت قبل ذلك ؟؟ لا علاقة بالخرطوم سببها المريخ وجيت للعب في المريخ . *علمتك شنو الخرطوم ؟؟ علمتني كيف اتعامل من الناس وعلمتني عدم الإنفعال والحرص في كل شئ . *وهل علمتك (الايسكريم) ؟؟ لا لا أنا حتى الآن لم اتعلم أكل الايسكريم . في حياتي ما شربت شيشه !! *بصراحه شديده هل شربت (شيشيه) ابان فترتك بالهلال ؟؟ لا لا لماذا انت ربطها بالهلال ؟؟ أنا في حياتي لم اشرب شيشيه ولا (نفس) وأزيد كمان لا شربت سجارة ولا سفيت نهائيا ، وهذا ليس في الهلال وإنما في حياتي على الاطلاق ، أنا رأسي ده للقطعيه بس ومرات القطعيه ذاتا ما بشتغل بيها . أنا (حواتي) ومحمود غني لي في التلفون !! *حموده (حواتي) من الدرجة الاولي ؟؟ نعم أنا حواتي وفي هذا الشهر المبارك اسأل الله ان يرحم محمود عبد العزيز رحمه واسعه بقدر ما قدم . *حسب ما اعلم هنالك علاقة خاصة ربطتك بالراحل محمود عبد العزيز ؟؟ نعم محمود أخ وصديق وربطتني به علاقة قويه جدا وهو (زول صاحبي شديد) ويكفي انه قد طلب من اسرته ان تسمح لي بالدخول إليه في كل لحظه . *يوم رحيله اين كنت وماذا فعلت ؟؟ والله ده يوم صعب شديد وبصراحه انا ما عرفت اعمل شنو ، كل الذى فعلته ركبت العربة وظللت متجول في شوارع الخرطوم دون اى هدف ولكن بعد فترة من التجوال إستغفرت الله وعدت إلى المنزل وكنت في قمة الحزن . *شاركت في الدورات الرمضانية التى نظمها محمود بمدينة بحرى ؟؟ نعم شاركت وهذا الكأس فزت به كهداف للدورة التى نظمها محمود وقد كنت هداف ونجم الدورة والحمدلله وأنا اعتبر هذا الكأس اغلى هدية لانه إرتبط بانسان جميل . *محمود إشتهر بحبه للمريخ فهل طلب منك ترك الهلال ؟؟ نعم ذات مرة إتصل علي محمود من (رقم اريبا) لم يكن مسجل في هاتفي وعندما رديت له كان صوته وهو يغني (ارجع تعال عدى ليا ورجع حنانك ليا) وكان هذا في العام (2007) وبعد ان خلص الأغنية طلب مني العودة للمريخ وقال لي : (يا اخ نحن دايرنك ترجع المريخ وانت ود المريخ ونحن ناسك) . *طيب وأنت رفضت ولا شكل الإعتذار كان كيف ؟؟ أنا شكرتو اولا على الشعور الطيب وقلت ليهو الرجوع للمريخ صعب لانو الناس ديل عندى معاهم مشاكل وخلاف ذلك انا في الهلال عملت لي قاعدة جماهيرية وعندي وضع خاص وغير مستعد للعودة والبداية من الصفر في المريخ . *وهل اقتنع بكلامك ؟؟ والله يعنى هو قال إنو كلم جمال الوالى في موضوعى وقال ليهو لازم ترجع حموده ولكن في النهاية واصلت في الهلال . ناس المريخ إتعاملوا مع الكوكى باعتباره اقل منهم !! *طيب حموده الكوكى نجح في شندى وفشل في العرضة ؟؟ الكوكى في شندى نجح باستقرار الاهلى الادارى وعدم تركيز الاعلام ، في المريخ فشل لانو المريخ ما كان فيهو استقرار هذا إلى جانب إنو ناس المريخ كانو شايفين الكوكى اقل قامة منهم هذا حتى على مستوى اللاعبين الذين ربما كانوا يروا ان الكوكى اقل منهم . مازيمبى غلبنا كورة وكامبوس سبب الخسارة !! *حموده انت من ابطال خماسية مازيمبى ؟؟ ايوه كنت قاعد في الكنبة وتقدر تقول شاركت في تلك الهزيمة من الخارج . *بعض الناس قالوا ان مباراة مازيمبى لم تكن طبيعيه ؟؟ لا لا هى مباراة طبيعيه لا فيها (شق ولا طق) الجماعة ديل غلبونا (كورة عديل كده) . *من وجهة نظرك سبب الخسارة شنو ؟؟ بصراحة سبب الخسارة هو المدرب كامبوس ، كامبوس قام بتغيير التشكيلة قبل ساعات من إنطلاقة المباراة ، التشكيلة التى لعبت مباراة الاياب بالكنغو وفازت هى نفس التشكيلة التى كان مقررا ان تلعب مباراة الذهاب التى خسرناها واعتقد ده السبب الاول والاخير . اللاعب البيجى من المريخ للهلال بينجح اكتر من اللاعب البيمشى للمريخ من الهلال !! *حموده ايهما اوفر حظا في النجاح اللاعب البيجى من الهلال للمريخ ولا اللاعب المن المريخ بيجى الهلال ؟؟ والله حسب معطيات التاريخ اللاعب البيجى من المريخ بينجح في الهلال مثلا علاء الدين والشغيل وادوارد وغيرهم ولكن هنالك نماذج للاعبين ذهبوا للمريخ من الهلال ولم يقدموا المطلوب مثل طمبل والبلدوزر وريتشارد وغيرهم من اللاعبين ولذلك انا شايف نجاح البيجى من المريخ كبير عكس البيمشى من الهلال للمريخ . *طيب بنهاية هذا الموسم هنالك ثمانية لاعبين من الهلال ستنتهى عقوداتهم ؟؟ والله أنا بنصحهم يعيدو تسجيلهم في الهلال بدون اى مساومات لانهم في النهاية هم اولاد النادى وعارفين كل شئ وأنا متأكد إنو هم ح يعيدو تسجيلهم . *حموده نحن في الختام نفتح لك الباب للحديث ؟؟ وانا داير اتكلم عن اهلى شندى بطلب من الجمهور إنو يقترب من اللاعبين لانو ده فريق المنطقة ونحن محتاجين للجمهور ويجب ان نشيل بعض ونترك التنظير حتى تمضى مسيرة الاهلى بكل قوة وحماس لانه مؤهل الان للمنافسه على الكأس وبوقفة جمهورنا سنحقق كل المراد ، وايضا بتمنى ان يلعب الهلال النهائي واقول الهلال لو حقق نتيجة ايجابيه في المباراتين بالكنغو سيلعب النهائي بأذن الله . كلمات على لسان حموده !!! *عبد المهين (راجل) ما في منو اتنين . *مباراة الهلال امام الزمالك نار حمرا ولابد من الجمهور ان يلعب دوره على الوجه الاكمل . *الهلال ما سجل لاعبين السنة دى بسبب (إنعدام المواهب) .. *الواتس والفيس شغل الشباب من ممارسه الكورة . *بسبب سندوتش تعرض لموقف محرج جدا . *افكر في اقتحام مجال العمل الاذاعي بعد الاعتزال .
