اجمل من غني للهمس في الوطن العربي كلو – هو محمد وردي عندما غني (لو بهمسة) – الحد الادنى من الطلب """""""""""""""""""""" ممكن تقول ليك ليزول (بكرهك) – لكن تقول ليه (بحبك) بقطعوا رقبتك """""""""""""""""""""""""""" ونحن مع (النعس) كنا بنقول ليه تمام – مية المية والله – مافي اي كلام – ايوا دا الكلام """"""""""""""""""""""""""""""" الدكتورعاين للمروحة– نحن قنعنا من (المرحوم) ..الدكتور من يعاين للمروحة اقنع من المريض """""""""""""""""""""" ·زمان في الهلال كان هناك لاعب سريع اسمه (امير موسي)...امير هذا مازال يعطي للامسيات (نكهتها). ·بعض الامسيات هنا ..من تجيب ليها سيرة (محمد وردي) تتكسر ليك (حنين). ·تشيل (الجك) وتطلع تعمل فيها بتفتش عن (الفول). ·محاولة للمخارجة. ·عاوز تطلع من الموضوع. ·اجمل من غنى للهمس في الوطن العربي كلو – هو محمد وردي عندما غني (لو بهمسة) – الحد الادنى من الطلب. ·ليس هناك رجاء اقل من ذلك (لو بهمسة قول احبك). ·ويذهب اسماعيل حسن ابعد من ذلك عندما يقول (لو بنظرة حتى عابرة قول احبك). ·يعني في النظر – حدد كمان ألا تكون النظرة مقصودة ..وهذا هو اجمل ما في الحب زمان ..كان يأتي بعيدا عن (الاصرار والترصد). ·يأتي (عفويا) لذا حب زمان ما بصرحوا عنو ..ما زي حب هذا الزمن الذي تحمله الرسائل الهاتفية والواتس آب والفيس بوك كما يحمل الحمار اسفارا. ·سوف احدثكم عن (امير موسى)...بمشي عليه – بس خلوني اكمل الكلام الفي رأسي دا. ·ما تقاطعوني. ·وخلوا (التلفونات)..اليوم لسع...فيها باقى (جمعة). ·في اغنية (لو بهمسة) انتقال (عاطفي) مهم في مسيرة الاغنية السودانية – الاغنية جاءت ايضا في مرحلة مهمة من مسيرة محمد وردي ..نقلته الى رحاب الاغنية الحديثة بتصرف. ·اغنية (لو بهمسة) في اعتقادي ...انها لعبت دورا كبيرا في نقل العواطف والمشاعر من حالة (السكوت) والموت بالحب الى مرافعة انتهت الى ان يكون التصريح عابرا بهمسة او بنظرة. ·في خضم اغنية الحقيبة كان التصريح بالحب ممنوع وغير مسموح الاعلان بالحب. ·لا بالهمس ولا بالنظر. ·ممكن تقول ليك لي زول (بكرهك) – لكن تقول ليه (بحبك) بقطعوا رقبتك. ·يمكن - هذا امر من حسن الحياء وغلبة الخجل في ذلك الزمن – زمن (حاول يخفى نفسو). ·الزول كان بندس عديل كدا وما بظهر. ·ما زي الزمن دا الواحد تلقاه في الواتس آب اليوم كلو. ·حتى في الاغنية الحديثة كان التصريح بالحب ممنوع وقد غني ابراهيم عوض من كلمات النعمان على الله (ما بقدر اقول وما بقدر اصرح). ·نهي حب. ·يلا بلا كسير معاكم. ·الى ان جاء محمد وردي واعلن مرحلة جديدة من مراحل المشاعر في السودان وهي مرحلة التصريح بالهمس. ·هذا طبعا منتهى الذوق. ·نعود الى امير موسى ولو بقى في فرصة تانية ممكن نعود تاني للاغنية السودانية. ·قبل ذلك طبعا محمد الامين عندو حالة مجابدة صعبة في التصريح بالحب في اغنية (الجريدة) الاغنية التى كتبها الصحافي الكبير فضل الله محمد. ·في الاغنية صورة واضحة للمعاناة التى يمكن ان تكون في التصريح بالحب. ·(عايزأقول لك – ولاسيبك أقري أحسن فى الجريدة- عايزأقول لك.. ليه أقول لك.. مابقول لك مش مخير). ·طيب يا ابو الشباب انت في زول جابرك. ·لكن زولكم في النهاية الوقت بعصرو ويقوم يعترف : (ساعة مرت ساعة واكتر .. والوقت روح تأخر زى عنادك.. عايزاعاند.. لكن يظهرماحأقدر – عايزاقول بحبك ياوحيدة). ·طيب وقت ما بتقدر من الصباح مالك؟. ·كلام ساكت. ·المهم الاغنية بتشرح حالة المعاناة في التصريح بالحب. ·عبدالكريم الكابلي عندو اغنية (يا الكل يوم معانا وما قادرين نقول ليك). ·الاغنية دي طبعا الزول وقت يكون مفلس بفهمها على اساس انه عاوز يقول ليه عاوز لي قروش. ·قاصدك يعني. ·وممكن تفهمها كل يوم معانا دا (الفول). ·في اكتر من (الفول) بصاقرنا اليوم كلو. ·زمان كان معانا طالب في الداخلية. ·طبعا معاناة قصص الحب كلها كانت بتظهر في الداخلية. ·الزول كان في الداخلية معذبنا بي قصة حبو دا. ·كان عاوز زميلتو في الجامعة ..ونحن كنا (4) طلاب بنمثل جمهور شعرو. ·كل يوم بقومنا الساعة اتنين صباحا عشان يقرأ لينا قصيدة عن الزول دا. ·ونحن مع (النعس) كنا بنقول ليه تمام – مية المية والله – ما في اي كلام – ايوا دا الكلام. ·زولنا دا كان مشكلتو في الدنيا دي انو ما قادر يصرح ليها – ما قادر يبوح ليها. ·ونحن نشيل ونشجع فيه عشان يمشي يعترف ليها. ·بقينا ليه زي جمهور الهلال نشجع فيه اليوم كلو. ·وهو في كل يوم بعلن انه خلاص ح يقول ليها الليلة ..ح يركب رأسو ويمشي يعترف ليها. ·يلبس ليه قميص جديد ونضارة سوداء ويمشي ينتظرها في الكافتريا. ·ما عارف علاقة النضارة السوداء بالاعتراف بالحب شنو؟. ·زمنا كان الواحد وقت يكون عاوز يعترف بالحب بلبس ليه نضارة سوداء. ·زولكم بمشي اول ما تظهر البنت بمشي عليها. ·البنت ظريفة ومقدره موقفو ..وشاعرة بي حالتو بتقوم تقول ليه : (نعم يا احمد عاوز تقول حاجة؟). ·احمد بقعد يتكبكب لينا زي (البيبسي) البدفق براهو كدا في القميص الابيض. ·ما عارف ليه البيبسي بدفق في القميص الابيض؟. ·نحن من بعيد متابعين الموقف من منافذ شتّى. ·يا احمد اتكلم – يا احمد قول. ·واحمد قاعد يرجف. ·اخر حاجة كدا الله يفتح ليه بي عبارة ويقول ليها : في الحقيقة انا ..كنت – كنت – كنت. ·البنت تقول ليه كنت شنو يا احمد اتكلم؟. ·احمد يتعتع لينا ..كنت ..كنت .. ·البنت تقول ليه انا مقدرة شعورك كنت شنو؟. ·احمد من تجيب ليه سيرة (الشعور) بقوم يتجهجه زيادة وشبكتو تطش. ·بقول ليها كنت عاوز (دفترك) عشان المحاضرة الاخيرة ما حضرتها. ·البنت تتفرس منو – وتقول ليه حقيقة كدا يا احمد (الدفتر) ما عاوز (الرجفيبة) دي كلها...انت ما عاوز تقول حاجة تانية. ·احمد يتشجع ..ويقول ليها ايوا عاوز اقول حاجة تانية. ·نحن من على الشبابيك نصفق ليه : ايوا كدا يا ابو حميد ..اضرب الحديد وهو ساخن. ·البنت عشان تشجعو تقول ليه طيب تعال اقعد ..تشرب شنو؟. ·احمد يقعد ويشرب كمان. ·البنت تقول ليه كنت عاوز تقول شنو تاني؟. ·احمد يقول ليها : (كورة الهلال امس انتهت كم؟). ·البنت تتفجر تقول ليه : لا – لا دي ما عيشة دي ...امشي يا احمد وقت تلقى في نفسك (جرأة) كافية تعال اتكلم. ·احمد يقوم على كدا ..عشان يقومنا ليكم الساعة اتنين صباحا ..اكيدح يكتب ليه قصيدة جديدة. ·بس فلاحتو في القصايد. ·بكرة احمد تاني بجيب ليه قميص جديد ونضارة سوداء ..وبقول خلاص انا قررت اصارحها. ·ح اقول ليها اي حاجة ..والببقي يبقى. ·ان شاءالله القيامة تقوم. ·يقوم من بدري ..يمشي يشرك ليها في (الكافتريا). ·احمد يولع ليه (سجارة) رغم انو ما بشرب سجائر..لكن الموقف صعب عليه. ·البنت تظهر شايله كتبها. ·احمد يمشي عليها. ·اهلين يا احمد. ·تعال – تعال يا احمد اقعد ..انت الظاهر عليك عاوز تقول حاجة. ·عاوز تقول شنو يا احمد؟. ·احمد يقعد يتعتع لينا زي سيد اللبن يوم ما يجي. ·نحن نراقب في الموقف من بعيد. ·نقة صاح. ·كلام كتير. ·احمد يشيل ويقص. ·والبنت ذاتها انفعلت معاه. ·نحن حسب فهمنا لمثل هذه المواقف ..افتكرناه صارحها. ·ساعة ونص قاعدين يقصوا ويحكوا. ·بعد ما قربت تمغرب ..البنت قامت. ·مشينا عليها قلنا نبارك الحكاية ..قلنا ليها : اها احمد قال ليك شنو؟. ·البنت قالت لينا بي زعل شديد : (احمد قال لي كورة الهلال امس انتهت كم؟). ·البنت قالت لينا قولو لي صاحبكم دي نتيجة مباراة الهلال ما عاوزة ليها (نضارة سوداء)...كان ممكن يسأل بدون نضارة – هي النضارات السوداء دي بلبسوها ساكت. ·عرفنا ليك الزول ما قادر يتجاوز المحطة دي. ·جبنا احمد وقعدنا ليك معاه في الواطة ..قلنا ليه لازم تشيل موضوع (الهلال) دا من حياتك. ·الهلال دا في قصتك العاطفية ما بنفعك. ·بعدين البنت من تجيب ليها سيرة الكورة ..بتطفش منك – خليك حريف ومفتح. ·احمد قال لينا خلاص انا بكرة بقول ليها – والبحصل ال (يحصل). ·قلنا ليه ايوا دا الكلام يا ابوحميد. ·اليوم التاني البنت ما جات الجامعة. ·احمد رأسو ضرب ..قال يعني عشان قررت الليلة اقول ليها. ·قلنا ليه انت ما كل يوم بتقرر زي (البرلمان) وما بتعمل حاجة. ·اليوم التاني البنت ما جات. ·قلنا يا ربي الحاصل شنو؟. ·اليوم الثالث البنت ما جات. ·قلنا لي احمد لازم تتحرك ..وتشوف الحاصل شنو؟. ·في اثناء تحركنا دا ..جات فينا صاحبتها. ·قلنا ليها وين (ايمان)؟. ·انا قلت (ايمان) ما كنت عاوز اقول اسمها. ·لكن ما مشكلة. ·وين ايمان يا هنادي؟. ·انا قلت هنادي – كدا الحكاية انكشفت. ·هنادي قالت لينا ايمان(عقدو) عليها – انتوا ما عارفين. ·احمد وقع لينا. ·جري على الحوادث – عندنا زميلنا فرصة زي دي اصلو ما بفوتها – طول مشاورنا للحوداث هو ماسك ليك احمد ما قلنا ليك كلمها – عاجبك كدا – البنت طارت – كلو منك – تستاهل تكتل لينا في ضلك كدا. ·دخلنا الحوادث. ·الدكتور مسك ايدو كدا – وقعد يفتش في النبض. ·واضح انو قاعد يفتش ليه في حاجة ما موجودة. ·الدكتور عاين للمروحة – نحن قنعنا من المرحوم - من الدكتور يعاين للمروحة اقنع من المريض. ·الدكتور (جلق) ليه شهقة عالية كدا وقال لينا الزول دا ميت ليه ساعة ونص. ·زميلنا (اللديح) قال ليه ساعة ونص ...دا نفس الوقت القالت لينا فيه هنادي – ايمان عقدو عليها. ·لكن يستاهل عشان تاني ما يتكلم. ·... ·ملحوظة : حكاية امير موسى دا بعد كدا إلّا في الهوامش. هوامش ·امير موسى كان لاعب سريع يلقب بالسياحي. ·باصات السياحي دي كانت يا دوب ظاهرة. ·تلقي ليك سياحي مكيف كدا ومشغل ليه شريط لمحمود عبدالعزيز لو ضبحوا ليك (عنبلوك) ما بتنزل. ·لو فكوا ليك (الجوكر) ما بتنزل. ·ليت عصام طمل في جولاته الصحفية الرائعة يشوف لينا امير موسى دا وين الليلة؟ ·المهم يا جماعة امير موسى كان زول سريع ..زي ياسر الريان. ·ياسر الريان دا زمان كان بفوت لينا في ناس المريخ زي (البرق). ·جماعتكم طوالي يقوموا يلملموا الكراسي. ·يا عصام طمل يا ريت في باقي رمضان دا تشوف لينا كمان وين رمضان حبني؟. ·يكون نفسو الى الان مقطوع. ·وين كمال شناق؟. ·دنيا. ·بالمناسبة دي. ·عندنا ناس في السرعة اصلو ما بتلحقو. ·ولا بتلفتو. ·يقوموا من الصباح كدا يجيبوا ليهم (خروف). ·الخروف قبل ما يضبحوه ليك ..(شيتو) تطلع. ·في سرعة اكتر من كدا. ·الموضوع دا نقيف فيه هنا – عشان نشوف بكرة كمان البحصل شنو؟. ·........... ·عاجل : تلقاكم هسع مع (الشيّة) دي فتشتوا ليكم (بصلة).
