امس الاول ..جلست اتابع مباراة الاهلي مدني والمريخ...قلت اشوف (اللوردات) بتاعين (الشركات) ديل بعملوا شنو؟. شركاتكم دي طلعت شركات (وهمية) ساكت.
ما شفنا اي (اثر) للشركات البتتكملوا فيها دي.
فالحين في النقة ..والمؤتمرات الصحفية ...والصور.
مرات بتعمل ليك (عصير ليمون) ..تدخلو التلاجة عشان يبرد شوية..بتجي تلقى شربوه.
الشربو منو ما بتعرفو.
البيت كلو ينكرو.
دي مباراة المريخ.
خسارة (90) دقيقة راحت ساكت.
مباراة مسيخة ...فيها (22) ضفر.
اللوردات ذاتهم طلعوا (اضفار) على الشمال.
اقصد (اصفار) على الشمال.
يعني بقت على (النقطة).
ضفر واحد ممكن يعمل مشكلة ...فكيف يكون الحال لو بقى فيها (22) ضفر؟.
عبدالباسط (ضفر).
وطارق عثمان (الزومة).
لوراتكم زي (باكاتكم).
المباراة دي ..البرنس حقها ..هو ذاتو كان (ضفر).
(ضفر) عام كدا.
(ضفر) جماعي.
ظنيت ان (الدولار) يمكن ان يظهر في (كورة) سعيد السعودي ..ويمكن ان احس ب (المول) في المظهر العام لموسى الزومة.
لكن والله العظيم (طبلية) ما شفتها في المباراة.
اخير زمن (تقشف) عصام الحاج.
على الاقل وقتها كان الاداء مبرر.
اي واحد تهبشو يقول ليك دا (التقشف)...نحن (كهربة) ما عندنا.
قاعد في المباراة ..ضيعت لي (90) دقيقة من عمري ..عشان اشوف اثر (الشركات) البتكلموا عنها دي.
بفكر براي كدا.
قلت يمكن (ضفر) يبقى بتاع (نادي اسري) كدا ....وتنعكس (المدينة الطبية) في لعب احمد الباشا.
احتمال تبقى (عكسيات) الطاهر سادومبا ريحتها (فراخ ..فراخ)...واتوقعت (امير كمال) يظهر ليه ب (انبوبة غاز) بين الشوطين.
لكن لا دا ..ولا دا ..ولا دا ..ظهر.
زمان في اواخر السبعينيات ...ظهرت اغنية ..نشرها الفنان عبدالعزيز محمد داؤد ...بقول فيها : (يا دا ..يا دا ..الليلة ما جا).
الاغنية دي وقت كانوا يغنوها في الحفلة ...الحفلة كلها بتقعد تتلفت.
اي زول بقول انا المقصود.
الدودوه دي هسع ما موضوعنا.
موضوعنا مباراة الاهلي والمريخ في مدني.
مباراة اي حاجة فيها (مسيخة)...حتى الهدف الذي احرزه (كلتشي)...سجلوا على طريقة فاترة زي عداد الكهربة القديم (حاجة تقليدية) ..انت يا كلتشي ما شفت تراوري دا بجيب في الاهداف كيف؟.
معقولة ما سمعت بيه.
ما بتقعد في التلفزيون.
ما في زول بضرب ليك تلفون.
تراوري اول حاجة بفرتك ليك المدافع (رباط ..رباط)..ثم بسجل بعد ذلك.
المدافع يقعدوا يلقطوه متل (الفحم).
يعني قبل القون ..تراوري بعمل (معاينات) لخط الدفاع كلو ..بشيل عينه من اي مدافع للفحص...من دا ومن دا ومن دا...(زي اغنية عبدالعزيز محمد داؤود).
وبعد داك بجيب قونو.
المريخ امس الاول ..كان في اسوأ حالاته.
سخينة بس.
سخينة بصلة ما فيها.
سخينة يوم (29) من الشهر.
حتى هيثم مصطفى ..كورتو في المباراة كانت متل (القزازة) البكسروا بيها الفول.
عاوزين تخربوا للزول (كورتو).
قالوا ليك...(والكلام دا ما يطلع من العمود دا)...قالوا ليك هيثم مصطفى مرة لعب ليه (باص) لي محمد موسى مهاجم المريخ.
عارفين محمد موسى عمل شنو؟.
والله ما بتصدقوا.
محمد موسى طلع ليه (بخرة) من (الشنكار)...عشان يعرف الشيء دي شنو اللعبها ليه هيثم؟.
البخرة البكتبوها الطلاب في الامتحانات ويدسوها من المراقب.
محمد موسى بعد ما عرفها (تمريرة).. ما عرف يتصرف معاها كيف ؟..عارفين عمل شنو؟.
والله ما عارفين.
محمد موسى طلع ليه (خريطة)...عشان يعرف كيف يتصرف مع (الداهية) دي.
طلع ليه (كتلوج).
اتذكرت طرفة.
طرفة او هي حكمة ...وجدتها في احد الكتب القديمة.
ما عارف انا غايتو ..احكمو براكم.
عاملين كدا زي رمضان الباقى ليه (52) يوم.
قالوا ليك : ( القاعدة الذهبية عندما تقرأ قائمة الطعام التى تقدم لك في المطعم » اذا لم تستطع نطق اسم الصنف ...فانك لن تستطيع احتمال ثمنه !«...).
دي نظرية او قاعدة ..اعمل بيها.
يعني الحاجة الما بتقدر تنطقها ...ما بتقدر تدفع تمنها ....(ما تشابروا ساكت).
وناس المريخ ديل ..بي حالتهم دي ما قادرين يتعاملوا مع هيثم مصطفى.
حمدان كرع الموية دا جاء الخرطوم ...شايل ليه (قريشات) معاهو..ظروفو كانت ما كعبة.
قال يغير ليه جوا شوية في الخرطوم...قال يتفسح شوية ..ويشم ليه هوا.
الكلام دا زمان ..قبل ما يحولوا (المواقف).
قبل موقف (شروني) يظهر في الوجود.
زولكم حمدان كرع الموية دا كلو يوم يمشي ليه افخم مطعم في الخرطوم2.
يعزل ليه افخم مطعم...ويدخل عليه.
النادل ..يجيب ليه (قائمة الاطعمة) ...زولكم ما يفهم فيها اي حاجة...يقعد يتلفت تقول راجي ليه (كورة معكوسة).
يحاول يقرأ ..عشان يطلب ليه حاجة ...ما يعرف يقرأ اي صنف فيه.
يتبكم عديل كدا ..يضهم.
دي شنو القائمة دي (فطائر الفواغرا .... ستيك كوبي...... فطر ماتسوتاكي...... مكرونة بالماشروم وشرائح البيكون.... خضار مشوية مع الماشروم والموزاريلا مع خل البلسميك).
الشيء دي غلبتو عديل كدا.
تقول في امتحان (كيمياء).
زولكم عرقو يتقاطر ...(الجرسون) يمشي ويجيه ...وهو يطلب المزيد من الوقت.
دي شنو الاسماء دي؟.
والله ما فاهم فيها اي حاجة.
معقولة في اصناف بالشكل دا ...اسم الصنف زي (اسم الشركة الصينية).
نحن عايشين وين ؟...كاتلننا بي ام رقيقة ..وموية الفول....والعدس.
