* الشئ الوحيد في السودان الذى لم يتأثر بثورة الإتصالات و(الواتساب) و(الفيسبوك) هو (بيت البكي) و(المريخ) .. * كل حاجة بخلاف بيت البكي والمريخ تأثرت ب(الواتس) وأخوانه .. * شوف أى حاجة من حولك ستجد ثورة الاتصالات قد اثرت فيها .. * اى حاجة بخلاف بيت العزاء والمريخ .. * والمريخ هو في الاصل عبارة عن بيت بكي مصغر .. * آخر كل سنة ناس المريخ بيبكو .. * النادى بيكون عبارة عن (صيوان عزاء) نهاية كل موسم .. * ومن بعد (رفع الفراش) مباشرة المريخ يشارك في دورة تأبينية مثل دورة (حوض النيل) و(سيكافا) .. * المهم .. * بيت البكي في السودان سيتأثر يوما ما بهذه الثورة الهائلية .. * يمكن ان تكون الفاتحه في بيت البكي ب(الواتس) .. * بعد خمس سنين بالعدد سينتهى العزاء في (الواتس) .. * أهل المرحوم يقول ليك : الواتساب للرجال والفيسبوك للنسوان أو كما قال لي احدهم .. * لو في زول راجل داير يعزي في المرحوم يرسل في الواتس ولو في زولة دايرة تعزي ترسل في الفيسبوك .. * ولا حتى تكلف نفسك بالحضور .. * ترسل تعزيتك بالواتساب وترسل صورة دموع وانتهى البيان .. * أنا لاحظت حاجة .. * لما الجماعة يقولوا فلان مات الناس طوالى بيدخلوا الواتساب .. * يقول ليك كده نشوف آخر ظهور للمرحوم كان متين ؟؟ * يا اخ مالك ومالو إنت ؟؟ * زول ومات .. الشمار ليك شنو ؟؟ * غايتو جنس غايتو ؟؟ * هذا فيما يتعلق ببيت البكي .. * نجي للمريخ .. * آخر جدعات ناس المريخ أمبارح قالوا دايرين يضيفو مدربين للجهاز الفنى .. * سيتم تعيين اتنين مدرب بجانب برهان تيه ومحسن سيد .. * الاتنين ديل واحد قالوا يكون شغال يراقب الخصم .. * بيدوهو مرتب عشان يمشى يرصد ليهم الخصوم قبل ملاقاة المريخ .. * يعنى مثلا المريخ في كأس السودان لو لاعب مع بطل كريمة يقوم المدرب ده بالسفر إلى كريمة ومتابعة تمارين الخصم ورصده ثم ياتى الخرطوم ويجتمع مع برهان ومحسن ويشرح لهم تفاصيل الخصم .. * ده المدرب الأول .. * بالنسبة للمدرب التانى قالوا يكون (محلل للأداء) .. * يحلل الأداء اثناء المباراة ويقوم بمناقشة الجهاز الفنى .. * عليك الله وربنا بيسألك والدنيا رمضان ناس المريخ ديل ما قاعدين يهظروا ؟؟ * هسه بالذمة ده ما ضحك على الدقون ؟؟ * خصم شنو وتحليل شنو ؟؟ * كأس السودان ده داير ليهو محلل ؟؟ * الممتاز ده داير ليهو زول يتابع الخصوم ؟؟ * أخجلوا عليكم الله .. * ناس المريخ ديل عندهم تصرفات كده مرات لا تعرف تبكي ولا تضحك .. * حاجات كده ما بيعملها إلا زول خيالو واسع .. * طبعا حكاية تجيب ليك محلل للأداء موجودة في كل أنحاء العالم .. * ما فيها حاجة .. * لكن كمان ما لدرجة يعملها المريخ .. * ممكن يعملها الهلال لكن المريخ لا حاجه له بها .. * ولا يكون الجماعة ديل لسه عايشين في وهم (العالمي) ؟؟ * الهلال مشارك في مجموعات الابطال ومشغول بمباريات كبيرة ولو استعان بمحلل وطبيب نفساني لاصبح ذلك مقبولا .. * ناس الهلال والترجى ومازيمبى ممكن يعملوا الحاجة دى .. * لكن ناس قريعتي راحت ديل ممكن يلعبوا بدون مدرب .. * وبعيدن في حاجة مهمة جدا .. * هو وينو الأداء عشان يحللوا ؟؟ * (11) سنة المريخ ده ما لعب ليهو (كرة قدم) .. * المحلل البتجيبوهو ده والله إلا يحلل ليكم التربة التحت النجيلة .. * إنتو لو بتسمعوا كلامنا ما دايرين ليكم محلل .. * إنتو دايرين شخصية .. * فريقكم ده لو ما عمل ليهو شخصية زي باقي الفرق ما بينفع .. * للأسف طبعا جمال الوالى الشهير ب(عزو) مفتكر إنو شخصية الفريق في (بنيان الاستاد والنادى) .. * هو مفتكر كده .. * عشان كده مرة يعمل طابق شاخور ومرة مقصورة طايرة ومرة نفق ومرة حوض سباحة واخيرا عمل مقصورة ماسية .. * على بالنعمة يا جمال الوالى لو عملتو (ناطحة سحاب) المريخ ده ما بيفارق التمهيدى والوصافة .. * البنيان ما بيعمل شخصية للفريق .. * ولا حتى المقصورة الماسية ما ممكن تعمل ليها شخصية للمريخ .. * هسه مش مشاركين في سيكافا بعد العيد ؟؟ شوف كلامي ده لو ما طرتو من دور ال(16) .. * مجال الكورة ده ما عندكم فيهو نصيب .. * شوفو ليكم حاجة تانية بخلاف كرة القدم .. * أنا مستغرب إنتو مصرين على كرة القدم دى ليه ؟؟ * يا أخ ما في قسمة .. * الشغلانية دى واضحه زي الشمس .. * ما دارية ليها درس عصر .. * أقنعوا منها .. * أول أمبارح في صحيفة من الصحف عملت حوار مع عصام محمد نور .. * عصام قالوا هو مريخابي على السكين .. * المحاور قال لعصام : (لو بقيت رئيس المريخ ما هو اول قرار ستصدره) ؟؟ * عصام قال ليهو : بدخل كل اللاعبين ديل معسكرات الخدمة الوطنية .. * وانا بفتكر كلام عصام ده منطقي جدا .. * بفتكر كده .. * وأى زول طبعا حر في (إفتكاراتو) ..
