اشتغلت في العقارات ورافع وكيلي لي الله وحايم هيثم النور جوكر الهلال الحريف الذي تالق مع الفريق الازرق وخقق معه عدد من الانجازات، يمتاز بالسرعة في الداء ويجيد اللعب في كل خانات الملعب بمستوي عالي اضافة الي انه لاعب هداف من طراز فريد، كان محبوبا للجماهير لتواضعه الكبير الي الي جانب انه مثقف ومطلع يحب الشعر، صعد بسرعة الصاروخ الي النجومية وفترته من اشبال الخرطوم(3) وتصعيده للفريق الاول ومنه الانتقال للهلال لم تتجاوز ال3 مواسم فقط، مهذب لابعد الحدود ومرح مع الجميع لايعرف الخصام مطلقا يحب الناس ومبتسم دائما رغم ان عمله مرهق وهو يجوب منطقة اركويت والصحافات يوميا في مشاوير مع مرتادي الركشات لكنه بشوش وصاحب نكته حاضره، بحثت عنه ولم اجده لكثرة تحركه من موقعه الذي ينطلق منه وهو موقف ركشات مستشفي القلب بالخرطوم، وبعد مساعدات من بعض زملائه السابقين وصلت الي منزل اسرته باركويت والذي يقع علي بعد امتار جنوب شرق مستشفي القلب، طرقت الباب رحبت بي والدته اطال الله في عمرها قبل ان ياتي هو وياخذني الي صالون الضيافة، قال لي: قبيل مشيت شلت قوون من المكتبة وقريت حوار الزين ادم وانا متابع لصفحة (الليلة اتذكرتوني من وين) لحدي جيتني الليلة، *……… انت شباب اكتر من الناس البلعبو هسع. انا لو الهلال استدعاني هسع دا انا اراهنك ومستعد اكون احسن زول في الشايفو انا هسع بحصل في خط الوسط، الكورة في واللياقة الحمدالله متوفرة رغم جري الشغل والبحث عن لقمة العيش، *…… بعد اعتزلت الكورة اشتغلت شنو. جربت حاجات كتيرة منها مجال العقارات وهسع سايق ركشة ومكتوب عليها الهلال بي ورا، *…… الركشة حقتك. لالا،، شغال سواق ومرات جوكي اي ركشة اطلع الشارع القاها بشتغل بيها واتخصصت في الركشات وبقيت خبير، *……. يعني معروف عند الناس. طبعا ناس الموقف كلهم بعرفوني، *……. شغال في ياتو محل. في موقف ركشات مستشفي القلب باركويت وهو قريب من بيتنا ودا محلي البكون قاعد فيهو ومنو بننطلق في المشاوير واليوم كلو حايم في اركويت والصحافات بنوصل الناس ودي برضها خدمة بنقدما للناس والمرضي البجو المستشفي، *……. وكشات الترخيص دي كيف معاك. الكشات دي حاجات عادية ضد المخالفات وطوالي نحن في الحالة دي لكن انا الشهرة والنجومية نافعاني وقاعدة تخارجني من ناس المرور كتير وبتعاملو معاي كويس جدا وكلو ما اقع في يدهم يقولو لي اتفضل يا كابتن، ودي طبعا حاجة انا قاعد اقدرا شديد من رجال المرور وبتعزبني لانو فيها تكريم من رجل المرور وكونو يكون اليوم كلو واقف في الشمس ورغم كدا بذكر انك نجم ويحترم الحاجة دي ويفكك، وبصراحة لو ما النجومية دي كان الواحد ما قدر يشتغل زاتو، *……. الناس قاعدين يعرفوك. انا طبعا شكلي ما اتغير،، مرات بركب معاي زول ولامن ينزل ويجي يحاسب يتفاجا بي يقوم يحاسبني ويرفض يشيل الباقي ومرات في زول بعرفني قبال يجاسب ولامن ينزل يديني اكتر من حقي ويمشي طوالي، وردت فعلي بتاثر بالحاجة دي ومرات افكر اخلي الشغل دا من مواقف الناس والتعاطف معاي، *…… بعد الهلال شطبك عملت شنو. ما عملت حاجة ورفعت وكيلي لي الله،، ومشيت حمتا كتير في الاندية بداية من الاهلي الخرطوم وبعدو الاهلي مدني وبري والزومة والصبابي وحاليا خليت اللعب في الاندية لكن بلعب في فريق الدفاع المدني وبرضو دخلت كورس تدريب، *……. الهلال شطبك ليه. كنت سايق عربيتي في الشارع جاي علي البيت ضرب لي واحد صحافي قال لي (الهلال داير يشطبك هسع رايك شنو، قلت ليهو دي حال الدنيا) والهلال دا زي الدنيا تكون ماشي يقولو ليك فلان مات عشان كدا انا متوقع الموت في اي وقت لحدي قالو لي متا والشطب من الهلال دا خبر موت بس، *……. سجلت الهلال كيف. سجلت الهلال في عام 98 وكان ورا تسجيلي فوزي المرضي وهو عمل توصية انو يسجلوني وسجلو معاي في نفس الوقت ادوارد جلدو والرشيد يكيني وكاشان ووليد ادريس وكانو معانا المحترفان زولو وانقيدي وفي الموسم البعدو جانا المحترف الاميرو، *…… الهلال سجلك من وين. من الخرطوم(3) وانا اصلا يديت الكورة في رابطة اركويت للناشئين مربع 45 مع فريق سانتوس ومنو مشيت اشبال الخرطوم(3) سنة 96 وفي 97 صعدوني الفريق الاول وفي 98 الهلال سجلني وشطبني في 2001، *……. اول مباراة مع الهلال. كانت دولية ضد فريق السكة حديد النيجري في النيجر في البطولة الافريقية وفزنا فيها واول مباراة محلية ضد بري في كاس السودان، *…… اجمل مبارياتك مع الهلال. ضد الاهلي الخرطوم، *……. اول مباراة هلال مريخ. فزنا فيها 2/صفر احرزهما خالد بخيت، *…….. اجمل هدف احرزته. في شباك اهلي الخرطوم وفزنا عليه واحرزنا الاهداف انا والمرحوم والي الدين، *……. افضل مدرب دربك. فوزي المرضي، *…… افضل تشكيلة هلالية شاركت فيها. ضد المريخ وفزنا فيها بهدفي صلاح الضي وحنظلية وكانت تضم كل من احمد النور ياسر رحمة بسطاوي المرحوم ودالجنيد انا طرف يمين محمد حمدان طرف شمال ادورد جلدو ابوشامة هيثم مصطفي صلاح الضي وحنظلية، *……. افضل لاعب حالي. صمت طويلا وقال: لايوجد، *……. افضل اداريين مرو علي الهلال. نحن عاصرنا الراحل الطيب عبدالله والبرير وحضرنا طه علي البشير اخر ايامو، *…….. متابع الهلال حاليا. ما خالص، مرة مرة وما قاعد ادخل المباريات مرات عبر الصحف ومرات من الاخوان القدام زي خالد بخيت لامن يضرب لي او اضرب ليهو، *……. صحافيين في داكرتك. خالد عزالدين وياسر عائس واستفدت من نقدهم لي كتير جدا لاني كنت بقرا الجرايد وانا بفتكر انو بنقدهم البناء غيرو سلبيات كتيرة واقول ليهم رمضان كريم وكل سنة وانتو طيبين وهلال متطور يحصد البطولات الافريقية، *……. وانت هسع يوميا جوار مستشفي القلب بذكرك بشنو. بالمرحوم والي الدين رحمة الله عليه وبدعو ليهو في الشهر الكريم دا ربنا يتقبلو وتحياتي لاسرتو، *…… قبل الوداع قبل ان نودعه طلبنا منه صورة داخل المنزل، قال لي دايرك تصورني مع امي، ذهب اليها وهي تجلس في ساحة المنزل والساعة ما بعد السادسة مساء وقال ليها يا امي ديل ناس الجريدة دايرين يصورني معاك ويجوبوك في الجريدة، ردت له بلهجة اهلنا النوبيين في شمال السودان مرحب بناس الجريدة هسع يعني كان صوروني معاك يجيبوني في الجريدة،، كان كدي صورونا مع ولدي،،
