بالعربى الكسيح - محمد الطيب الأمين في الهلال (هبوط المستوى) مُعدي .. زي (القُحة) .. في الخرطوم تكون راكب (بص الوالى) لو في واحد من الركاب عندو (قُحة) البص كلو مصيرو يقُح .. زول واحد ب(قُحة واحدة) يضرب ليهو (60) راكب حتة واحدة .. وإتخيل ال(60) ديل بكرة كلو واحد يركب ليهو (بص والى) ويقُح وبرضو يعادى (60) راكب جديد .. يعنى شغلانية صعبة شديد .. في الهلال هبوط المستوى أشبه بهذه القُحة .. الليلة تلقى اتير توماس كعب في المباراة الجاية اتير يبقى كويس ويكون بوى كعب .. كاريكا يكون كعب في مباراة هلال كادوقلى يجى بشة يكون كعب امام الرابطة .. بيعادوا بعض .. ببقو كعبين بالتناوب .. بالدور .. الليلة دور فلان وبكرة دور علان .. نهائي ما بتلقى كل اللاعبين في مستوى واحد .. ومباراة الزمالك التى هى على الابواب تحتاج لتشكيلة خالية من الهبوط .. تشكيلة الزمالك يا كاريكا لازم تكون قدر التحدى .. نلعب مباراة الزمالك من أجل جمعة جينارو .. جمعة الذى نال منه المصور المصرى لابد ان نرد له الاعتبار .. ورد الاعتبار لابد ان يكون داخل الملعب .. إحنا بنرد اعتبارنا بأدب .. بنرد الاعتبار اقوان وليس اساءات كما فعل المصور المصرى .. ومستوى الهلال امام الرابطة لا يبشر بانتصار على الزمالك .. فريق الرابطة من الفرق المحترمة وقد لعب مباراة كبيرة امام الهلال .. وشكلت المباراة تجربة حقيقة للهلال قبل معركة الجمعة .. هبوط مستويات بعض اللاعبين في الهلال يتسبب في اختلال الشكل والمضمون .. وكل الذين مستوياتهم متراجعة تبدو درجة اهميتهم في مباراة الجمعة كبيرة جدا .. خاصة بشة .. بشة مهم جدا في مباراة الجمعة ومستواه الذى ظهر به امام الرابطة سبب كثيرا من الازعاج لجماهير الهلال .. لا يملك بشة خيارا افضل من استعادة مستواه امام بطل القاهرة .. نريد ان نسمع هتاف (روقت المنقة يا بشة) .. وما يجرى على بشة ينطبق على كاريكا ونزار حامد ومهند .. لابد ان يراجع كبار النجوم مستوياتهم قبل هذا النزال .. ثقتنا في جميع ابطال الهلال لا حدود لها ونثق ان هبوط مستوياتهم هو مجرد ظروف ستروح لحالها .. وحتما سيعود بشة كما كان وسيعود كاريكا والغزال ونزار الجامد .. وعلى اعلام الهلال ان يكف عن نقد اللاعبين في هذا التوقيت الحرج .. ده ما وقت نقد .. ومباراة الزمالك لا تقل عن مباراة الاهلى المصرى الشهيرة .. مباراة تحتاج لجمهور خيالى وتحتاج لروح عالية وعزيمة كبيرة .. كلمة عزيمة دى ذكرتني حاجة .. العزيمة هى (أم عزام) .. وعزام هو (ود العزيمة) .. الليلة المريخ سيواجه فريق عزام .. وعلى قدر اهل العزم ياتى (عزام) .. الهلال لو قابل عزام ده ممكن نلعب معاهو حفيانين .. فريق زي ده ما بيلعبو ليهو ب(كدارات) .. عزام محمد احمد الطاهر .. هسه عزام ده عندو رقم وطنى ؟؟ والله انا عاجبني الاسم .. اسم عزام سمح .. (عزامة التقيلة والعافية دراجة) !! المفروض الليلة لاعبو المريخ يخوضوا المباراة وهم يحملون في اياديهم (مناديل ورق) .. مناديل ورق لزوم الخجل وكده .. ده فريق لما تلعب ضدو بتكون خجلان ولما تفوز عليهو بتكون ميت من الخجل .. فريق عزام ده تم تكوينه في نفس اليوم الذى سجل فيه الهلال نزار حامد من الامل عطبرة .. وعلى بالنعمة إحنا عارفين اى حاجة .. وعارفين كمان فريق عزام ده عبارة عن اولاد حلة .. ديل اولاد حلة في تنزانيا ، وعزام هو اسم رئيس اللجنة الشعبية في (حله ود هشام) التى تم فيها تكوين الفريق .. إحنا عارفين اى حاجة .. والمعلومات دى لسة ما نزلت في (قوقل) لانو الفريق ده اصغر من (اسواق الخرطوم الجديدة) .. لما الخضر عمل اسواق الخرطوم الجديدة الفريق ده كان في رحم الغيب .. وعزام الذى هو رئيس اللجنة الشعبية في حلة ود هشام بتنزانيا يملك مصنع (ايسكريم) .. يعنى ديل في المعسكر بأكلوا ايسكريم .. حناكيش ساكت الجماعة ديل .. رئيس النادى بتاع ايسكريم .. يعنى لو رئيس النادى كان عندو مصنع (فراخ) كان شاركوا في الابطال .. ايسكريم بس شاركوا في سيكافا !! هو ذاتو يكون ما ايسكريم بيكون (داردومة) ساكت .. تنزانيا إحنا بنعرفها ما فيها ايسكريم .. عليك الله فريق يدفع حوالى (12) مليار في الدوحة ويلعب مع البايرن ويجى في نهاية المطاف يلعب مع عزام ؟؟ دى آخرتا يا عزو ؟؟ معقولة دى ؟؟ دى تجى كيف دى ؟؟ الكلام ده عيب عليكم والله .. هسه لما تجو راجعين إحنا نلعب معاكم كيف ؟؟ غايتو جنس غايتو ؟؟ و..و.. ومرت الايام حبيبي ولسه ...(الجماعة بيلعبو في سيكافا) ..