بالعربي الكسيح - محمد الطيب الامين حكمة الله (شجر الموز الكاذب) بيشبه (شجر الموز العادى).. لو دخلت ليك (جنينة) أو (مشتل) فيهو شجر موز ما ح تقدر تفرز شجرة الموز الكاذب من شجرة الموز غير الكاذب .. وشجر الموز الكاذب يتمتع بكل صفات شجر الموز غير الكاذب ولكنه في نهاية الامر لا (يلد موز) .. شجرة منظر ساكت ما بتلد موز .. تذكرت الموز الكاذب والموز الصادق امس الاول وانا اتابع مباراة المريخ عصرا في سيكافا ومباراة الهلال ليلا في الابطال.. الابطال وسيكافا كلاهما (بطولة في كرة القدم) ولكن سيكافا هى عبارة عن موز كاذب .. يعنى سيكافا عدد اللاعبين داخل الملعب (22) وفيها حكم وسط وحكم رأية وحكم رابع وزمنها (90) دقيقة .. سبحان الله .. سيكافا دى برضو المباراة زمنها (90) دقيقة.. حكمتو بالغة والله .. أنا كانت فاكر إنو مباراة سيكافا زمنها (70) دقيقة .. كنت فاكر كده .. واى زول طبعا حر في (إفتكاراتو) .. المهم .. الابطال بطولة مثل الموز غير الكاذب وسيكافا موز كاذب.. وبالعربى الكسيح كده سيكافا دى زي (الحِمل الكاذب) .. دى بطولة زي (الزواج العرفي) يا مولانا .. اعلام المريخ قال مباراة الهلال والزمالك ودية .. ما في مشكلة .. ودية ااااااى .. لكن سيكافا (وهميه) .. واظن وليس كل الظن اثم ان (الودية) افضل من (الوهميه).. الهلال (وديا) لعب مباراة العمر امام الزمالك .. والمريخ (وهميا) لعب مباراة الوهم امام كمبالا سيتي .. وكمبالا سيتي لولا انه يفقد (14) لاعب من تشكيلته الاساسية لما خسر امام المريخ .. تستاهلوا ياناس كمبالا .. معقولة (14) لاعب غايبين ؟؟ لكن الهلال صعب على بالقسم .. هلال مشرف .. عمل عرض محلى جنن العالم .. كورة الهلال امام الزمالك تشبه حفلات محمود عبد العزيز في نادى التنس .. كل لاعب في الهلال يقدم اغنية من اغنيات محمود .. هدف بشة اسمو (بفرح بيها) .. وبفرح بيها لانو بشة قدم هدفه هدية لخطيبتة .. في يوم الخطوبة بشة (عريس) .. وهدف بكرى المدينة اسمو (ما تشيلي هم) .. بكرى في ما تشيلو هم .. نيلسون (خوف الوجع) ، كاريكا (الكنت قايلو فات زمان) ، عمر بخيت (يا مدهشة) .. مباراة حفلة عديل .. والجمهور كان بمثابة اوركسترا منسجمة ومتناغمة وعالية التطريب .. جمهور الهلال اثبت ان اى انتصار للهلال يخرج من (الحناجر لا الاقدام) .. جمهور جعل قناة الجزيرة تتغزل في السودان بسببه .. اى زول دخل الاستاد قدم مجهود يوازي جهد بكرى المدينة داخل الملعب .. لكن بكرى ده غريب عديل .. مجنون .. لازم الحكومة تستفيد من بكرى ده .. امام الحكومة السودانية فرصة تاريخية لحسم الجدل في مدينة (حلايب) .. حلايب دى الحكومة ممكن تحسم امرها في دقيقتين بس .. قول لي كيف ؟؟ يعينو بكرى المدينة معتمد لمدينة حلايب .. دى كل القصة .. تعملوا بكرى المدينة معتمد في حلايب على بالنعمة اى مصرى يدخل (جحرو) .. الذى فعله بكرى المدينة بدفاع الزمالك لم يفعله (نجار حلتنا في خشب جارتنا) .. جيبو بكرى معتمد وبشة سفير في القاهرة .. اى زول شاف مباراة المريخ عصرا وجاء شاف مباراة الهلال ليلا مسكو سوء هضم .. مباريات سيكافا دى زي ملاح (أم رقيقة البارد) .. في سيكافا البطل والطيش واحد .. بطولة زي (كورسات التقوية في المدارس) بيعملوها كل (45) يوم .. سيكافا الاخيرة كانت في الخرطوم قبل خمس اسابيع وكان اسمها (نيل الحوض) تقريبا .. هسه مش ليوبارد طار من دور ال(16) لبطولة ابطال افريقيا؟؟ مش طار من ال(16) ؟؟ في افريقيا هو مقيم افضل من المريخ الذى سيلعب نهائي سيكافا اليوم .. وأنا والله ما خايف على الجيش الرواندى إلا من التحكيم.. المريخ سيفعل كل شئ من اجل هذا الكأس الميت .. الحكم لو بقى ادارى في فريق الجيش اليوم سيظلم الجيش ودى ما دايرة ليها درس عصر .. نحمدالله الهلال الان من افضل سبعة اندية في افريقيا ومن خلفه الاهلى المصرى والترجى والرجاء .. والمريخ هو النادى رقم (64) في افريقيا وامامه كمبالا سيتى وليبوبارد والملعب والقطن التشادى .. هسه مش المريخ ابعد كمبالا من سيكافا ؟؟ لكن ده في كشوفات الكاف لايعني شئ .. في تصنيف الكاف كمبالا افضل من المريخ لان كمبالا ابعد المريخ من بطولة معترف بها (الابطال) بينما المريخ ابعد كمبالا من بطولة هى مثل (الموز الكاذب) .. يعنى يا مولانا المريخ الليلة لو شال كأس وبعد شهر شارك في سيكافا تانية وشال كأسها برضو في تصنيف الكاف هو الفريق رقم (64) لانو طار من تمهيدى الابطال .. كأس سيكافا ده زي الكأس الشالو الهلال في الدورة الرباعية لنادى الخرطوم الوطنى او هو اقل من كأس بن ياس .. عموما انا حزين لان فريق الجيش فقير وهذا الفقر لن يعجب حكم مباراة اليوم وحزين اكثر لان فريق الجيش يفقد جهود تمانية من عناصره الاساسية .. و..و.. طريقك دايما فارشو ورد وطريقي دايما زارعو ...(موز كاذب)!!
